រាជធានីភ្នំពេញ ៖ អតីតគ្រូបង្វឹកក្រុមជម្រើសជាតិកម្ពុជា លោក ប្រាក់ សុវណ្ណារ៉ា ដែលកំពុងដឹកនាំក្រុមបាល់ទាត់នគរបាលជាតិ នាពេលបច្ចុប្បន្ន បានបញ្ចេញចំណាប់អារម្មណ៍ទាក់ទងជាមួយខ្សែប្រយុទ្ធជំនាញជើងឆ្វេង ចាន់ វឌ្ឍនាកា ថា ចាន់ វឌ្ឍនាកានៅតែជាកីឡាករសំខាន់របស់ក្រុមជម្រើសជាតិ បន្ទាប់ពីអ្នកគាំទ្រកីឡាកររូបនេះមួយចំនួននិយាយរិៈគន់ពីទម្រង់លេងធ្លាក់ចុះរបស់ចាន់វឌ្ឍនាកា មិនដូចមុន ។ ពួកគេក៏បានសាកសួរថាតើធ្វើយ៉ាងណាអាចកែប្រែសមត្ថភាពដែលល្អពីមុនរបស់កីឡាកររូបនេះឱ្យត្រឡប់មកវិញ?
លោក ប្រាក់ សុវណ្ណារ៉ា បានលើកឡើងថា៖«វឌ្ឍនាកា នៅតែជាកីឡាករសំខាន់របស់ក្រុមជម្រើសជាតិ ។ នេះជាអ្វីដែលខ្ញុំប៉ងនិយាយ។
ទោះជាយ៉ាងណា កីឡាករទាំងអស់ត្រូវតែយល់ពីរបត់ប្រែប្រួលរបស់បាល់ទាត់បច្ចុប្បន្ន ។ យើង
បានព្យាយាមយ៉ាងខ្លាំងដើម្បីនាំយកអ្វីដែលល្អបំផុតរបស់គាត់ ប៉ុន្តែគ្មាននរណាម្នាក់ល្អឥតខ្ចោះទេ ។ ចំពោះវឌ្ឍនាកា គាត់ត្រូវកែលម្អកម្លាំងរបស់គាត់ នោះភាពល្អពីមុននឹងត្រឡប់មកវិញជាមិនខាន»។ អតីតគ្រូបង្វឹកក្រុមបឹងកេតក៏បានបន្ថែមទៀតថា ឥឡូវនេះមានការផ្លាស់ប្តូរច្រើននៅក្នុងវិស័យបាល់ទាត់ ។ អ្នកត្រូវការពារ និងប្រយុទ្ធក្នុងពេលតែមួយ ។ អ្នកអាចមើលឃើញឥឡូវនេះ កីឡាករដែលមានទេពកោសល្យជាច្រើននៅកម្ពុជា ដូច្នេះនៅពេលនេះគ្មានវឌ្ឍនាកា ក៏គ្មានបញ្ហាសម្រាប់ក្រុមជម្រើសជាតិកម្ពុជាដូចគ្នា។
គួរឱ្យដឹងដែរថា គ្រូបង្វឹកដែលមានបទពិសោធន៍ច្រើនរូបនេះ ធ្លាប់បានដឹកនាំក្រុមបឹងកេត អំឡុងរដូវកាល២០១៥ និង២០១៦ ពោលគឺចំពេលដែល ចាន់ វឌ្ឍនាកា ស្ថិតក្នុងទម្រង់លេងដ៏ល្អបំផុត ដែលបានឈ្នះស្បែកជើងមាសក្នុងលីគកំពូលកម្ពុជា២រដូវកាលជាប់ៗគ្នានាឆ្នាំនោះ ហើយក៏ជាអ្នកស៊ុតបាល់បញ្ចូលទីបានច្រើនបំផុតក្នុងលីគដែលមិនធ្លាប់មានរហូតដល់៣៣គ្រាប់ក្នុងមួយរដូវកាលនាឆ្នាំ២០១៥ផងដែរ៕ (កែសម្រួលដោយ ៖ បុប្ផា)
ចែករំលែកព័តមាននេះ