ខេត្តស្ទឹងត្រែង ៖ ក្រុមអភិរក្សសត្វផ្សោតរួមសហការជាមួយឆ្មាំទន្លេ និងគណៈកម្មការសហគមន៍នេសាទកាលពីយប់ថ្ងៃទី២៣ មេសា ឆ្នាំ២០២០ ស្ថិតនៅចំណុចភូមិស្វាយ ឃុំកោះស្រឡាយ ស្រុកសៀមបូក បានបង្ក្រាបមុខសញ្ញាឆក់ត្រីម្នាក់ ហើយបញ្ជូនទៅខណ្ឌរដ្ឋបាលជលផលកសាងសំណុំរឿងចាត់ការតាមច្បាប់។
លោក វង្ស សាវឿន នាយរងខណ្ឌជលផលខេត្តស្ទឹងត្រែងអោយដឹងថា ជនសង្ស័យឈ្មោះ ញិល រស្មី ភេទប្រុស អាយុ២៣ឆ្នាំ រស់នៅភូមិថ្មី សង្កាត់សាមគ្គី ក្រុងស្ទឹងត្រែង ។
លោកនាយរងខណ្ឌជលផលខេត្តស្ទឹងត្រែង បានឱ្យដឹងបន្តថា ជនសង្ស័យជាមុខសញ្ញាប្រើប្រាស់ឧបរណ៍ឆក់ត្រីល្មើសច្បាប់ខាងលើនេះបានធ្វើសកម្មភាពនៅឃុំកោះស្រឡាយ ស្រុកសៀមបូក ហើយត្រូវបានកម្លាំងជំនាញសហការគ្នា រួមមានក្រុមអភិរក្សសត្វផ្សោត ឆ្មាំទន្លេ និងគណៈកម្មការសហគមន៍នេសាទចាប់ខ្លួនបានកាលពីវេលាម៉ោង៩និង៤៥នាទីយប់ថ្ងៃទី២៣ មេសា ឆ្នាំ២០២០ ។
ក្រោយការបង្ក្រាបចាប់ខ្លួនជនសង្ស័យខាងលើ កម្លាំងជំនាញបានប្រគល់មកខណ្ឌរដ្ឋបាលជលផលដើម្បីកសាងសំណុំរឿងតាមនីតិវិធី ដើម្បីបញ្ជូនទៅតុលាការ ។
លោកនាយរងខណ្ឌជលផលខេត្តស្ទឹងត្រែង បានឱ្យដឹងបន្តទៀតថា ជនសង្ស័យម្នាក់ខាងលើគឺជាមុខសញ្ញាដែលមន្ត្រីជំនាញ រួមទាំងកម្លាំងសហការតាមចាប់រាប់ឆ្នាំមកហើយ ទើបតែចាប់បាន។
លោកនាយរងខណ្ឌជលផលខេត្តបានបន្ថែមថា វត្ថុតាងដែលរឹបអូសពីជនសង្ស័យខាងលើរួមមាន អាគុយកម្លាំង៧០អំពែចំនួន២គ្រឿង ទូកស្មាច់មួយគ្រឿង ម៉ាសីុនកម្លាំង២០សេសមួយគ្រឿង ក្បាលឆក់ប្រភេទត្រជាក់កម្លាំង៤១៨០០០វ៉ាត់មួយគ្រឿង និងថ្នងដងត្រីមួយ ៕
ចែករំលែកព័តមាននេះ