ប្រទេសវៀតណាម៖ នៅវៀតណាមដែលមានអ្នកឆ្លងវីរុសCOVID-19មិនដល់៣០០នាក់ផង និងគ្មាន
អ្នកស្លាប់ទៀត តែហាក់ដូចជាទទួលបានជោគជ័យក្នុងការទប់ការឆ្លងរាលដាលនៃវីរុសនេះ ដោយសារនយោបាយចត្តាឡីស័កហ្មត់ចត់បំផុត និងតាមដានមនុស្សដែលឆ្លង ។ ហាក់ជាជោគជ័យធំមួយប្រទេសនោះ ចាប់ផ្ដើមចាកចេញពីការការបង្ខាំងមិនឲ្យចេញក្រៅ ។
ការប្រមូលផ្ដុំមនុស្សនៅតែហាមឃាត់ ហើយមានការលើកទឹកចិត្តប្រជាជនឲ្យនាំគ្នាពាក់ម៉ាសការពារ នៅតាមទីសាធារណៈ បើបំពាននឹងមានការផាកពិន័យ ព្រមទាំងឲ្យប្រកាន់យកគម្លាតសង្គម ។ របបកុំមុយនីស្តវៀតណាមបានអនុញ្ញាតឲ្យហាងនានាបើកទ្វារវិញ ចាប់ពីថ្ងៃទី២៣ មេសា តទៅ ពិសេស នៅក្រុងហាណូយ និងក្រុងហូជីមិញ។
ថ្ងៃទី២៣ មេសា ចាប់ពីព្រឹកព្រលឹម ទៅហាងកាហ្វេនានា នៃរដ្ឋធានីហាណូយចាប់ផ្ដើមសកម្មភាពពួកគេឡើងវិញ ក្រោយពីផ្អាកអស់ពេលជាច្រើនសប្ដាហ៍មក ។ ចំណែកបណ្ដាសាលារៀន ក៏ត្រូវបើកទ្វារឡើងវិញនាសប្ដាហ៍ខាងមុខនេះ ក្នុងខេត្តជាច្រើន ។ ការបន្ធូរបន្ថយនោះ កើតមានខណៈប្រទេសនេះ ហាក់ដូចជាត្រួតត្រាសភាពការណ៍បានមកដល់ពេលនេះ ។
ចាប់តាំងពីរកឃើញអ្នកឆ្លងដំបូងៗពីខែមករាមក នៅវៀតណាមកត់សម្គាល់ឃើញអ្នកឆ្លងវីរុសតែ២៦៨នាក់ ហើយពុំមានអ្នកស្លាប់។ ការឆ្លងថ្មី ក៏គ្មានចាប់តាំងពី១សប្ដាហ៍មកហើយ។ ចាប់តាំងពីបណ្ដាថ្ងៃដំបូងនៃខែកុម្ភៈមក វៀតណាមបានផ្អាករាល់ការហោះហើរនៃយន្តហោះទៅកាន់ប្រទេសចិន ហើយបានបិទព្រំដែនគោកស្ទើរទាំងស្រុងជាមួយចិន ។
ភូមិមួយចំនួន និងប្រជាជននៃភូមិទាំងនេះប្រមាណជា១០.០០០នាក់ ត្រូវបានបង្ខាំងឲ្យនៅដាច់ពីគេ៣
សប្ដាហ៍ក្រោយរកឃើញអ្នកឆ្លងវីរុស ប្រមាណជា១២នាក់មក ។ បន្ទាប់ពីនេះ មនុស្សជាង៨០.០០០នាក់ត្រូវធ្វើចត្តាឡីស័កក្នុងទូទាំងប្រទេស ដាក់ឲ្យនៅដាច់ពីគេ ក្នុងបណ្ដាជំរំដែលយាមការពារដោយកងទ័ព។ ពលរដ្ឋវៀតណាមច្រើននាក់ ព្រមទាំងបណ្ដាជនបរទេសត្រូវជាប់ក្នុងជំរំទាំងនេះ ៕
ចែករំលែកព័តមាននេះ