ខណៈដែលសាលាឯកជន និងរដ្ឋត្រូវបានក្រសួងអប់រំប្រកាសអោយផ្អាកការរៀនសូត្របណ្តោះអាសន្ននោះ សាលាឯកជនមួយចំនួនបានងាកទៅរកការសិក្សា តាមបណ្តាញអនឡាញ និងតម្រូវអោយមាតាបិតាបង់លុយដូចធម្មតា។
ប៉ុន្តែទោះបីជាយ៉ាងណាក្តី ឪពុកម្តាយមួយចំនួនមិនសប្បាយចិត្តនឹងជម្រើសនេះឡើយ ដោយខ្លះយល់ថា កូនរបស់ខ្លួនក្មេងពេកមិនអាចសម្របខ្លួននឹងការសិក្សាអនឡាញហើយសំខាន់ជាងនេះ គឺមិនពេញចិត្តនឹងបង់តម្លៃសិក្សាកូនៗរបស់ខ្លួនពេញថ្លៃតាមរយៈការរៀនអនឡាញនេះ។
កាលពីថ្ងៃទី២២ ខែមេសា ឪពុកម្តាយរបស់សិស្សបានប្រមូលផ្តុំគ្នានៅមុខសាលា CIA នៅតាមបណ្តោយផ្លូវ២០០៤ ដើម្បីធ្វើការតវ៉ាមួយ ដើម្បីស្នើ សុំអោយសាលាបញ្ចុះ តម្លៃ៥០ភាគរយនៅក្នុងដំណាក់កាលនៃការបង្រៀនតានអនឡាញ ក្នុង ដំណាក់កាល មានការរាលដាលមេរោគកូវីដ១៩ រហូតដល់ពេលមួយដែលក្រសួងអប់រំប្រកាសអោយ សិស្សរៀនដូចធម្មតាវិញ។ ចំណែកឪពុកម្តាយខ្លះទៀត និយាយថា កូនរបស់ពួកគាត់ក្មេងពេកសម្រាប់ការរៀនអនឡាញ ហើយវានាំដល់ការរវល់បន្ថែមដល់ឪពុកម្តាយ។
បន្ទាប់ពីមានការផ្ទុះឡើងនៃការតវ៉ាសាលា CIA បានសម្រេចិត្តបញ្ចុះតម្លៃចំនួន ២៥ ភាគរយ ចំពោះសិស្សមតេយ្យ និងចំនួន១៥ភាគរយសម្រាប់សិស្ស ពីថ្នាក់ទី១ ដល់ ថ្នាក់ទី១២។
រហូតមកទល់ពេលនេះ គេនៅមិនទាន់ដឹងថា តើឪពុកម្តាយរបស់សិស្សយល់ព្រម ទទួលយកការផ្តល់អោយរបស់សាលានៅឡើយទេ?
មិនមែនតែឪពុកម្តាយនៅសាលា CIA ទេ ដែលមិនមានការសប្បាយចិត្តនឹងការបង់ លុយសាលាពេញថ្លៃ ខណៈដែលសិស្សត្រូវតម្រូវអោយរៀនអនឡាញ ឬក៏មិន បានរៀនសោះនោះ។
តាមរយៈបណ្តាញសង្គមហ្វេសប៊ុក ឪពុកម្តាយរបស់សាលា ហ្វូតព្រីនអន្តរជាតិ FIS ម្នាក់បានសម្តែងការមិនពេញចិត្តនឹងការបង់លុយពេញ ខណៈដែលកូនរបស់គាត់ត្រូវ សាលាអោយរៀនអនឡាញវិញ។ គាត់ថា គាត់នឹងមិនបង់ថ្លៃសាលារហូតដល់ពេល ក្រសួងប្រកាសចូលរៀនធម្មតាវិញ។
កូវីដ១៩ មិនត្រឹមតែកំពុងគំរាមកំហែងសុខភាព និងជីវិតរបស់ប្រជាជនកម្ពុជា និងពិភពលោកទេ វាថែមទាំងកំពុងបង្កផលប៉ះពាល់ផងដែរ ដល់ប្រាក់ចំណូលរបស់ប្រជាពលរដ្ឋកម្ពុជា និង សេដ្ឋកិច្ចរបស់ប្រទេសផងដែរ។
ជាមួយនឹងការធ្លាក់ចុះនៃប្រាក់ចំណួល ឪពុកម្តាយភាគច្រើន បំផុតនឹងកាន់តែមាន ការលំបាកនៅក្នុងការបង់ប្រាក់សាលារៀនសម្រាប់កូនៗរបស់ពួកគាត់។
វាក៏មិនទំនងដែរ បើសិនជាសាលារៀនឯកជនបន្តយកលុយថ្លៃបង់សាលារៀន ដោយ សិស្សមិនបានរៀន ឬក៏យកលុយពេញថ្លៃ ខណៈដែលអោយសិស្សរៀនអនឡាញ។
នៅក្នុងដំណាក់កាលដ៏លំបាកនេះ សាលាឯកជនត្រូវមានការយោគយល់ ខ្លះដល់ ឪពុកម្តាយរបស់សិស្សចំពោះបញ្ហាតម្លៃសិក្សារបស់កូនៗរបស់ពួកគេ។ ការបន្ថយ ការចំណេញ ហើយបន្ធូរតម្លៃខ្លះតាមដែលអាចធ្វើទៅបាននឹងមិនត្រឹមតែជួយដល់ឪពុកម្តាយរបស់សិស្សទេ ប៉ុន្តែវាក៏នឹងបង្ហាញពីសាមគ្គីភាពរវារសាលា និងមាតាបិតាសិស្ស។
នៅពេលដែលសាលាឯកជនមានការយោគយល់កាន់តែច្រើនដល់មាតាបិតាសិស្ស វានឹងធ្វើអោយឪពុកម្តាយសិស្សបន្តអោយកូនរៀនសូត្រនៅតាមសាលាឯកជនមួយដែលគេគិតថា ជាកន្លែងបណ្តុះគំនិត និងការចេះដឹងពិតប្រាកដនិងមិនមែនជាកន្លែងដែលគិតតែផលចំណេញហួសហេតុនោះឡើយ។
រហូតមកទល់ពេលនេះ គេមិនប្រាកដនៅឡើយថា តើក្រសួងអប់រំនឹងប្រកាសអោយ ចូលរៀនឡើងវិញនៅពេលណា?
ជាការចាំបាច់ដែលសាលាឯកជន និងឪពុកម្តាយរួមគ្នារកដំណោះស្រាយមួយដែលល្អសម្រាប់ទាំងសងខាង ដោយអាចធ្វើអោយឪពុកម្តាយអាចមានលទ្ឋភាពនៅក្នុងការបង់ ប្រាក់សាលារៀន សម្រាប់កូន ហើយ សាលារៀនអាចទទួលចំណូលបាន គ្រប់គ្រាន់ សម្រាប់ដំណើរការរបស់ខ្លួន៕ (កែសម្រួលដោយ ៖ បុប្ផា)
ចែករំលែកព័តមាននេះ