រាជធានីភ្នំពេញ ៖ យោងតាមការបញ្ជាក់របស់កីឡាករមិនខុសគ្នា សុទ្ធតែបានប្រកាសថា COVID-19 កំពុងធ្វើឱ្យកម្លាំង និងសមត្ថភាពរបស់ពួកគេថមថយ បើទោះជាកីឡាករម្នាក់ៗសុទ្ធតែបានអនុវត្តគោលការណ៍ហ្វឹកហាត់ក្នុងផ្ទះ ក្នុងដំណាក់កាលដែលមានបញ្ហាCOVID-19នេះក្ដី ។…
រាជធានីភ្នំពេញ ៖ យោងតាមការបញ្ជាក់របស់កីឡាករមិនខុសគ្នា សុទ្ធតែបានប្រកាសថា COVID-19 កំពុងធ្វើឱ្យកម្លាំង និងសមត្ថភាពរបស់ពួកគេថមថយ បើទោះជាកីឡាករម្នាក់ៗ
សុទ្ធតែបានអនុវត្តគោលការណ៍ហ្វឹកហាត់ក្នុងផ្ទះ ក្នុងដំណាក់កាលដែលមានបញ្ហាCOVID-19នេះក្ដី ។ កីឡាករមិនខុសគ្នា សុទ្ធតែអះអាងថា បើពួកគេគ្មានរយៈពេល៣ខែក្នុងការហ្វឹកហាត់ជាមួយនឹងអ្នកជំនាញទេ ពួកគេមិនអាចដូចដើមនោះឡើយ។
ជាក់ស្ដែងកីឡាករតេក្វាន់ដូ ITF បានលើកឡើងថា ដោយសារតែកីឡាមួយនេះ ប្រសិនបើពឹងលើការហ្វឹកហាត់ម្នាក់ៗដូចក្នុងដំណាក់កាលCOVID-19បច្ចុប្បន្ន គឺពិតជាមិនអាចបង្កើនសមត្ថភាព ឬរក្សាលំនឹងសមត្ថភាពកើតទេ ខណៈការលើកឡើងបែបនេះ អ្នកណាៗ ក៏យល់ស្រប។
គ្មានអ្នកណាមិនដឹងនោះទេថា ក្រសួងអប់រំ យុវជន និងកីឡា បានសម្រេចរំសាយ និងប្រកាសផ្អាករាល់សកម្មភាពហ្វឹកហាត់ជាក្រុមចាប់តាំងពីផ្ទុះCOVID-19 រហូតដល់ជាង៣០ប្រភេទកីឡា ដោយតម្រូវឱ្យកីឡាឬ សហព័ន្ធទាំងនោះ ហ្វឹកហាត់នៅផ្ទះរៀងខ្លួន ហើយតាមដានសកម្មភាពកីឡាករជាជំនួស។
កីឡាករដែលជាថ្នាលជម្រើសជាតិទាំងអស់ នៅតែត្រូវបានគណៈកមា្មធិការជាតិអូឡាំពិកផ្ដល់ជាប្រាក់ខែលើការហ្វឹកហាត់ និងថ្លៃអាហារដោយមិនមានការកាត់នោះផង ។ ប៉ុន្តែគ្រប់យ៉ាងវាមិនស្រួលដូចការមកហ្វឹកហាត់ជុំគ្នានោះទេ ទើបកីឡាករម្នាក់ៗ លើកឡើងពីបញ្ហាផ្សេងៗដែលនាំឱ្យកីឡាករភាគច្រើនត្រូវការពេលវេលាដើម្បីហ្វឹកហាត់ជុំគ្នា ។
កីឡាករតេក្វាន់ដូ ITF បានលើកឡើងថា សម្រាប់សហព័ន្ធមួយយ៉ាងហោចត្រូវការពេលវេលាពី២ទៅ៣ខែក្នុងការស្តារកម្លាំងនិងបច្ចេកទេសកីឡាករឡើងវិញ ។ នេះជាការយល់ឃើញរបស់កីឡាករប៉ាល់ ជីវ័ន ម្ចាស់មេដាយមាសពិភពលោកកីឡាតេក្វាន់ដូITF ។ លោកបន្តថា តេក្វាន់ដូITFជាកីឡាមួយស្ថិតក្នុងចំណោមកីឡាជាង៣០ប្រភេទដែលត្រូវបានក្រសួងអប់រំ យុវជន និងកីឡា ផ្អាកការប្រមូលផ្តុំហ្វឹកហាត់ដោយសារបារម្ភការរីករាលដាលនៃជំងឺCOVID-19 ។ ការលើកឡើងនេះ គឺស្របនឹងគោលការណ៍របស់ក្រសួងអប់រំ យុវជន និងកីឡា ដែលបានប្រកាសរំសាយការប្រមូលផ្តុំហ្វឹកហាត់ក្រុមជម្រើសជាតិថ្នាលដោយសារបារម្ភពីការរីក រាលដាលនៃជំងឺរលាកសួតបង្កឡើងដោយកូរ៉ូណាវីរុសថ្មី ។
ម្ចាស់មេដាយមាសពិភពលោកកីឡាតេក្វាន់ដូ ITF កីឡាករប៉ាល់ ជីវ័ន ថា ការហ្វឹកហាត់ដោយខ្លួនឯងនៅផ្ទះរបស់កីឡាករពុំមានប្រសិទ្ធភាពដូចការហ្វឹកហាត់ជាក្រុមក្រោមការត្រួតពិនិត្យនិងណែនាំពីគ្រូបង្វឹកនោះទេ។
ដ្បិតរូបគេជឿជាក់ថា ការហ្វឹកហាត់នៅផ្ទះកីឡាករទំនងជាគ្មានឆន្ទៈនិងហ្វឹកហាត់ដិតដល់ដូចការប្រមូលផ្តុំហ្វឹកហាត់នោះទេ ។ ការលើកឡើងរបស់លោក សូម្បីតែគ្រូបង្វឹកក្រុមជម្រើសជាតិផ្សេងទៀតក៏វាយតម្លៃថា ការហ្វឹកហាត់ងាយៗដោយគ្មានការជំរុញផ្ទាល់ពីគ្រូបង្វឹក អាចធ្វើឲ្យកីឡាករធ្លាក់ចុះទាំងកម្លាំងកាយនិងបច្ចេកទេសផងដែរ ។
ដកស្រង់ការលើកឡើងជាមួយនឹងសារព័ត៌មានក្នុងស្រុក លោកនិយាយថា សម្រាប់កីឡាតេក្វាន់ដូITF បើនិយាយពីគុណភាពកម្រិតខ្ពស់គឺត្រូវការពេលហ្វឹកហាត់យ៉ាងតិចពី២ទៅ៣ខែទើបអាចស្តារកម្លាំងកាយនិងបច្ចេកទេសឡើងវិញបាន ។ លោកថ្លែងបែបនេះដោយសារកន្លងមកមុនចេញទៅប្រកួតនៅក្រៅប្រទេសម្តងៗកីឡាករប្រភេទនេះត្រូវការហ្វឹកហាត់ទាំងព្រឹកទាំងល្ងាចរយៈពេលដូចគ្នាទើបអាចមានសមត្ថភាពគ្រប់គ្រាន់ចេញទៅប្រកួតបាន ។
ទោះបីយ៉ាងនេះក្តី ម្ចាស់មេដាយមាសពិភពលោកកីឡាតេក្វាន់ដូITFនៅប្រទេសប៊ុលហ្គារី កាលពីឆ្នាំ២០១៩រូបនេះ គាំទ្រចំពោះការអនុវត្តរាល់ថ្ងៃរបស់កីឡាករ ព្រោះជាវិធីសាស្ត្រមួយដ៏ល្អក្នុងការរក្សាកម្លាំងកាយនិងគុណផលរបស់កីឡាករកុំឲ្យមានការធ្លាក់ចុះខ្លាំង ។
គួររំលឹកថា ក្រោយកម្ពុជារកឃើញអ្នកផ្ទុកជំងឺCOVID-19 ក្រសួងអប់រំ យុវជននិងកីឡា បានចាត់វិធានការជាបន្តបន្ទាប់ដើម្បីរួមចំណែកបង្ការនិងទប់ស្កាត់ការរីករាលដាលនៃជំងឹរលាកសួតបង្កឡើងដោយកូរ៉ូណាវីរុសប្រភេទថ្មីនេះ ។ ក្នុងនោះក្រសួងសម្រេចផ្អាកការប្រមូលផ្តុំហ្វឹកហាត់ក្រុមជម្រើសជាតិថ្នាលផ្អាករៀបចំព្រឹត្តិការណ៍ប្រកួតកីឡាជាតិលើកទី៣ ការប្រកួតជើងឯកសិស្សបឋមសិក្សាថ្នាក់ជាតិ ការប្រកួតជើងឯកថ្នាក់ជាតិ និងហាមមិនឲ្យមានការជួបជុំលើសពី១០នាក់នៅពហុកីឡដ្ឋានជាតិជាដើម ។ កាលពីពេលថ្មីៗ ក្រសួងសម្រេចឲ្យផ្អាកដំណើរការក្លិបហាត់ប្រាណនិងការលេងកីឡានិងហាត់ប្រាណលក្ខណៈជួបជុំនៅតាមទីលានឯកជន និងសាធារណៈ ៕ (កែសម្រួលដោយ ៖ បុប្ផា)
ចែករំលែកព័តមាននេះ