កាលពីខែមីនាកន្លងមកនេះលោកមហាសេដ្ឋី ដេវីដ ហ្គេហ្វេន (David Geffen) បានចែករំលែករូបភាពនាវា Rising Sun របស់លោកលើប្រព័ន្ធសង្គមដើម្បីបង្ហាញពីការរក្សាគម្លាតពីមនុស្សដើម្បីការពារខ្លួនពីកូវីដ-១៩ ។ ប៉ុន្តែវាបានធ្វើឲ្យមនុស្សជាច្រើនរិះគន់ខណៈដែលលោកបង្ហាញពីទុក្ខលំបាករបស់លោកលើនាវាតម្លៃ ៥៩០លានដុល្លារ ។
ជាលទ្ធផលលោកបានសម្រេចចិត្តលប់រូបភាពចោលវិញ ប៉ុន្តែវាបានបង្កឲ្យមនុស្សជាច្រើនមានការឆ្ងល់ពីជីវិតរបស់មហាសេដ្ឋីក្នុងកំឡុងពេលដែលប្រទេសជុំវិញពិភពលោកកំពុងតែប្រឈមមុខនឹងការរាតត្បាតនៃកូវីដ-១៩ ។ព្រោះតែការហាមឃាត់ធ្វើដំណើរជុំវិញពិភពលោក និងការសម្រេចពីរដ្ឋាភិបាលក្នុងការជំរុញឲ្យមនុស្សនៅផ្ទះ ឬចៀសវាងកន្លែងសាធារណៈដែលសម្បូរដោយមនុស្សមហាសេដ្ឋីមួយចំនួនបានចាកចេញពីផ្ទះដើម្បីទៅរស់នៅលើនាវារាប់លានដុល្លាររបស់ពួកគេវិញ។
លោក រូភើត ខរណឺ (Rupert Connor) ដែលតំណាងក្រុមហ៊ុន Luxury Yacht Group LLC បានប្រាប់ដល់សារព័ត៌មាន CNN Travel ថា «ពេលដែលអ្នកស្គាល់នាវា និងបុគ្គលិកធ្វើការលើនាវាច្បាស់ វាប្រៀបបានជាស្រះទឹកនៅកណ្តាលសមុទ្រខ្សាច់ដែលនៅឆ្ងាយពីភាពចលាចលផ្សេងៗលើលោក ។ នាវាជាច្រើនមានផ្ទុកនូវសម្ភាៈគ្រប់គ្រាន់សម្រាប់ការស្នាក់នៅយូរ ហើយប្រព័ន្ធដំណើរការរបស់ពួកវាអនុញ្ញាតឲ្យវាដំណើរការបានរាប់ខែ និងបុគ្គលិកភាគច្រើនថែមទាំងទទួលបានការហ្វឹកហាត់ផ្នែកសង្គ្រោះជីវិតថែមទៀត» ។
យោងទៅតាមលោក ខរណឺ បានឲ្យដឹងទៀតថា មនុស្សដែលជ្រើសរើសស្នាក់នៅលើនាវា ពួកគេមិនមានធ្វើដំណើរទៅណាទេ ។ ផ្ទុយមកវិញពួកគេភាគច្រើនស្ថិតនៅជុំវិញកោះដែលអនុញ្ញាតឲ្យពួកគេទទួលស្បៀង និងសម្ភារៈផ្សេងៗចាំបាច់សម្រាប់ការរស់នៅ ។
ប៉ុន្តែយោងទៅតាមលោក រុំាបល រ៉ូម៉ាណូលី (Rumble Romagnoli) ដែលជានាយកប្រតិបត្តិរបស់ Relevance លោកមិនគិតថាមហាសេដ្ឋីពេញចិត្តនឹងការស្នាក់នៅលើនាវារាប់សប្តាហ៍ ឬខែទេ ។ លើសពីនេះទៅទៀត ការស្នាក់នៅលើនាវាអាចនឹងល្មើសនឹងបទបញ្ជាក្នុងប្រទេសមួយចំនួនដែលប្រាប់ដល់ប្រជាជនឲ្យស្នាក់នៅផ្ទះ ៕
ចែករំលែកព័តមាននេះ