ជំងឺកូវីដ-១៩ បានរាតត្បាតស្ទើរតែគ្រប់ផ្នែកនៃពិភពលោកទៅហើយដែលបានបង្កជាភាពមិនប្រាកដប្រជាយ៉ាងខ្លាំងផ្នែកការងារ ប្រាក់ចំណូល និងប្រាក់ចំណេញពីការវិនិយោគ ។ ជាលទ្ធផល មនុស្សជាច្រើនបានធ្វើការសម្រេចចិត្តខុសឆ្គងដែលធ្វើឲ្យពួកគេខាតបង់ថវិកាដែលខ្លួនខិតខំប្រឹងប្រែងរក និងសន្សំ ។ ខាងក្រោមនេះ…
ជំងឺកូវីដ-១៩ បានរាតត្បាតស្ទើរតែគ្រប់ផ្នែកនៃពិភពលោកទៅហើយដែលបានបង្កជាភាពមិនប្រាកដប្រជាយ៉ាងខ្លាំងផ្នែកការងារ ប្រាក់ចំណូល និងប្រាក់ចំណេញពីការវិនិយោគ ។ ជាលទ្ធផល មនុស្សជាច្រើនបានធ្វើការសម្រេចចិត្តខុសឆ្គងដែលធ្វើឲ្យពួកគេខាតបង់ថវិកាដែលខ្លួនខិតខំប្រឹងប្រែងរក និងសន្សំ ។ ខាងក្រោមនេះ គឺជាកំហុសឆ្គងសំខាន់ៗដែលអ្នកគួរតែចៀសវាងប្រសិនបើអ្នកមិនចង់ខ្ជះខ្ជាយលុយក្នុងកំឡុងពេលប្រទេសកំពុងប្រឈមមុខនឹងកូវីដ-១៩៖
១. ធ្វើការសម្រេចចិត្តដោយយោងតាមការភ័យខ្លាច
ការធ្វើការសម្រេចចិត្តដោយអាស្រ័យលើការភ័យខ្លាចអាចធ្វើឲ្យមនុស្សជ្រើសរើសជម្រើសដោយមិនបានថ្លឹងថ្លែងគ្រប់គ្រាន់ ហើយភាគច្រើនវាមិននាំយកលទ្ធផលល្អៗទេ ។ អ្នកជំនាញផ្តល់យោបល់ឲ្យមនុស្សរក្សាភាពស្ងប់អារម្មណ៍ពេលដែលគិតពីស្ថានភាពហិរញ្ញវត្ថុរបស់ខ្លួនដូចជាប្រភពចំណូលរបស់អ្នក ការចាយវាយរបស់អ្នក អ្វីដែលអ្នកអាចកាត់បន្ថយដើម្បីសន្សំច្រើនជាងមុន និងធនធានដែលអាចរក្សាតម្លៃបានយូរនៅថ្ងៃអនាគទជាដើម ។
២. ចាយវាយដោយមិនទុកប្រាក់សន្សំ
ជាទូទៅមនុស្សតែងតែកាត់បន្ថយការចាយវាយពេលដែលពួកគេស្ថិតក្នុងគ្រាអាសន្ន ដូច្នេះបច្ចុប្បន្ននេះជាពេលដ៏ល្អក្នុងការពិនិត្យមើលប្រាក់សន្សំរបស់អ្នកឡើងវិញ ។ ជាមួយប្រាក់ដែលសេសសល់ អ្នកគួរតែចេះទុកដាក់វាឲ្យបានល្អ និងចៀសវាងចាយវាយលើអ្វីដែលនឹងបាត់បង់តម្លៃទៅវិញក្នុងពេលឆាប់ៗ ។
៣. មិនសួរយោបល់អ្នកមានបទពិសោធន៍
ជាក់ស្តែងមនុស្សគ្រប់គ្នាមិនមានចំណេះដឹង ឬជំនាញគ្រប់ជ្រុងជ្រោយក្នុងការគ្រប់គ្រងចំណូល និងចំណាយផ្ទាល់ខ្លួន ឬក្នុងគ្រួសារទេ ។ វាជាហេតុដែលអ្នកគួរតែសាកសួរពីយោបល់របស់អ្នកដែលមានជំនាញច្បាស់លាស់ ឬមានបទពិសោធន៍ច្រើនមុនពេលធ្វើការសម្រេចចិត្តធំៗ ។
៤. ប្រញាប់លក់ទ្រព្យសម្បត្តិ
ភាគច្រើនមនុស្សប្រញាប់លក់ទ្រព្យសម្បត្តិរបស់ខ្លួនចេញពេលដែលមើលឃើញតម្លៃចាប់ផ្តើមធ្លាក់ចុះ តែវាអាចជាកំហុសឆ្គងធំមួយប្រសិនបើអ្នកមិនគិតគូរឲ្យបានច្បាស់លាស់ជាមុនសិនទេ ។ ប្រវត្តិសាស្ត្របង្ហាញឲ្យឃើញថា បន្ទាប់ពីមានវិបត្តិ សេដ្ឋកិច្ចតែងតែងើបឡើងវិញដូច្នេះអ្នកមិនគួរលក់ទ្រព្យសម្បត្តិចេញក្នុងបរិស្ថានដែលពោរពេញទៅដោយភាពមិនប្រាកដប្រជាទេលុះត្រាតែការវិនិយោគរបស់អ្នកពិតមជាមិនល្អ ហើយការមានវាជាកម្មសិទ្ធិរបស់អ្នកបង្កផលវិបាកដល់អ្នក ៕
ចែករំលែកព័តមាននេះ