លោកមហាសេដ្ឋី ជេក ម៉ា (Jack Ma) ដែលជាស្ថាបនិករបស់ក្រុមហ៊ុន Alibaba បាននិយាយកាលពីថ្ងៃសុក្រក្នុងបទសម្ភាស៍អនឡាញមួយជាមួយនឹងសារព័ត៌មាន China Media Group ថា ក្នុងស្ថានការបច្ចុប្បន្ននេះ ប្រព័ន្ធអ៊ីនធើណេតកំពុងតែជួយសង្គ្រោះដល់សេដ្ឋកិច្ចពិភពលោក ហើយអ៊ីនធើណេតក៏ជាបច្ចេកវិទ្យាសម្រាប់ថ្ងៃអនាគតដែរ ។
លោកបាននិយាយថា «មិនមានប្រទេស ឬក្រុមហ៊ុនណាមួយដែលអាចផ្តាច់ខ្លួនចេញពីប្រព័ន្ធអ៊ីនធើណេតបានឡើយ» ។ ពេលដែលជំងឺកូវីដ-១៩ បានផ្ទុះឡើងដំបូង មូលនិធិសប្បុរសធម៌របស់លោក ជេក ម៉ា គឺ Jack Ma Foundation បានរៀបចំកម្មវិធីបរិច្ចាគមួយដែលសរុបមានថវិកា ១៤.២៦លានដុល្លារកាលពីថ្ងៃទី ២៩ខែមករា សម្រាប់ការស្រាវជ្រាវ និងផលិតវ៉ាក់សាំង ។ ក្នុងនោះមាន ២.៨៥លានដុល្លារត្រូវបានបរិច្ចាគទៅវិទ្យាស្ថានវិទ្យាសាស្ត្រ និងវិទ្យាស្ថានវិស្វកម្មចិន ។
លោក ម៉ា បានបកស្រាយថា «យោងតាមគំនិតរបស់ខ្ញុំ ការផ្ទុះជំងឺនេះនឹងមិនត្រូវបានបញ្ចប់ក្នុងរយៈពេលខ្លីទេ ហើយវាអាចត្រូវបានលុបបំបាត់ទាំងស្រុងដោយពឹងផ្អែកលើការបង្កើតថ្មីក្នុងផ្នែកបច្ចេកវិទ្យា និងការស្រាវជ្រាវផ្នែកសុខាភិបាល ។ ដូច្នេះពួកយើងត្រូវតែត្រៀមខ្លួនសម្រាប់រយៈពេលវែង» ។
ទោះជាបច្ចុប្បន្ន ពិភពលោកកំពុងតែជួបប្រទះនូវភាពមិនប្រាកដប្រជាខ្លាំងពិតមែន មានចំណុចមួយដែលមនុស្សអាចយល់ស្របលើគឺ កូវីដ-១៩ នឹងផ្លាស់ប្តូរការធ្វើអាជីវកម្មរបស់មនុស្សក្នុងរយៈពេលវែង ។
មនុស្សកាន់តែច្រើនបានងាកចេញពីការទិញទំនិញតាមហាង ទៅការទិញទំនិញអនឡាញវិញ ហើយទម្លាប់នេះមិនអាចបាត់បង់ទិញវិញដោយងាយៗទេទោះជាកូវីដ-១៩ ត្រូវបានកម្ចាត់ពិតមែនក្តី ។ ដូច្នេះការប្រើប្រាស់បច្ចេកវិទ្យាសម្រាប់ការធ្វើពាណិជ្ជកម្មតាមប្រព័ន្ធអេឡិចត្រូនិកពិតជាសំខាន់ណាស់ក្នុងការរក្សាអតិថិជន និងទាញអត្ថប្រយោជន៍ពីការផ្លាស់ប្តូរនៃទម្លាប់ចាយវាយរបស់មនុស្ស ។
លោក ម៉ា បានបញ្ជាក់ថា ការធ្វើពាណិជ្ជកម្មតាមប្រព័ន្ធអេឡិចត្រូនិកនឹងក្លាយជាកត្តាគោលសម្រាប់អាជីវកម្មក្នុងការឆ្លងផុតស្ថានការបច្ចុប្បន្ន និងសម្រាប់ការលូតលាស់សេដ្ឋកិច្ចរបស់ប្រទេស និងសេដ្ឋកិច្ចពិភពលោក ។ វីរុសនេះប្រៀបបានជាមុខសញ្ញាប្រាប់ដល់ពិភពលោកថា ប្រទេសជុំវិញពិភពលោកត្រូវតែខិតខំប្រេងប្រែងបន្ថែមក្នុងការពង្រឹងប្រព័ន្ធសេដ្ឋកិច្ចរបស់ខ្លួន ៕
ចែករំលែកព័តមាននេះ