ខេត្តសៀមរាប ៖ បើតាមសមត្ថកិច្ចបានឲ្យដឹងថា ក្រុមចោរប្លន់ប្រដាប់ដោយអាវុធច្នៃបានធ្វើសកម្មភាពភ្ជង់អ្នកលក់ចាប់ហួយនៅស្រុកជីក្រែង ហើយយកទ្រព្យសម្បត្តិ រួចគេចខ្លួន បាត់ ក្រោយមកក៏ត្រូវកម្លាំងនគរបាលមូលដ្ឋាន និងនគរបាលព្រហ្មទណ្ឌកម្រិតធ្ងន់នៃស្នងការដ្ឋានខេត្តសៀមរាប បានធ្វើស្រាវជ្រាវ…
ខេត្តសៀមរាប ៖ បើតាមសមត្ថកិច្ចបានឲ្យដឹងថា ក្រុមចោរប្លន់ប្រដាប់ដោយអាវុធច្នៃបានធ្វើសកម្មភាពភ្ជង់អ្នកលក់ចាប់ហួយនៅស្រុកជីក្រែង ហើយយកទ្រព្យសម្បត្តិ រួចគេចខ្លួន បាត់ ក្រោយមកក៏ត្រូវកម្លាំងនគរបាលមូលដ្ឋាន និងនគរបាលព្រហ្មទណ្ឌកម្រិតធ្ងន់នៃស្នងការដ្ឋានខេត្តសៀមរាប បានធ្វើស្រាវជ្រាវ រហូតឃាត់ខ្លួនបានចំនួន៤នាក់។ ហេតុការណ៍ឃាត់ខ្លួននេះ ធ្វើឡើងនៅថ្ងៃទី២០ ខែមេសា ឆ្នាំ២០២០ ត្រង់ចំណុចភូមិក្របៅ ឃុំសង្វើយ ស្រុកជីក្រែង។
បើតាមលោកស្នងការរងទទួលផែនកណ្តាលព្រហ្មទណ្ឌនៃស្នងការដ្ឋានខេត្ត បានប្រាប់ឱ្យដឹងនៅថ្ងៃទី២១ មេសានេះថា កម្លាំងនគរបាលស្រុកជីក្រែង និងនគរបាលព្រហ្មទណ្ឌកម្រិតធ្ងន់នៃស្នងការដ្ឋានខេត្ត បានសហការគ្នាស្រាវជ្រាវករណីក្រុមចោរប្លន់ផ្ទះអ្នកលក់ចាប់ហួយ រហូតឃាត់ខ្លួនជនសង្ស័យ៤នាក់ កាលពីម៉ោង៣ទៀបភ្លឺឈានចូលថ្ងៃទី១៩ ខែ មេសា ត្រង់ចំណុចភូមិក្របៅ ឃុំសង្វើយ ស្រុកជីក្រែង។
លោកស្នងការរងបន្តថា ជនសង្ស័យទាំងនោះមាន ១.ឈ្មោះ សំ សី ហៅម៉ី ភេទប្រុស អាយុ៥២ឆ្នាំ មុខរបរធ្វើស្រែ ២.ឈ្មោះ ឡុន ធុង ហៅថុង ភេទប្រុស អាយុ១៤ឆ្នាំ មុខរបរសិស្ស ៣.ឈ្មោះ ឡឹង ប៊ឿប ហៅប៊ឿក ភេទប្រុស អាយុ២២ឆ្នាំ មុខរបរគ្មាន និង៤.ឈ្មោះ សុត សំអុល ភេទប្រុស អាយុ២៥ឆ្នាំ មុខរបរកម្មករសំណង់ ។ ជនសង្ស័យទាំង៤នាក់នេះ បច្ចុប្បន្នរស់នៅភូមិក្របៅ ឃុំសង្វើយ ស្រុកជីក្រែង ។ ចំណែកជនរងគ្រោះឈ្មោះ ទុន បឿត ភេទស្រី អាយុ៥១ឆ្នាំ មុខរបរលក់ដូរ។
លោកស្នងការរងបន្តទៀតថា បើយោងតាមបណ្តឹងរបស់ជនរងគ្រោះកាលពីថ្ងៃទី១៩ ខែមេសា ឆ្នាំ២០២០ បានឱ្យដឹងថា មុនពេលកើតហេតុនៅម៉ោង៣យប់ឈានចូលថ្ងៃទី១៩ មេសា មានជនសង្ស័យមួយក្រុមមានគ្នា៤នាក់ស្លៀកពាក់ខោអាវប៉ារ៉ា ពាក់មួកការពារសុវត្ថិភាពពណ៌ខ្មៅ បានយកកាំភ្លើងកែច្នៃ (កាំភ្លើងបាញ់ខ្យល់) មកគោះទ្វារហៅជនរងគ្រោះដើម្បីទិញស្រា ។ លុះនៅពេលជនរងគ្រោះបើកទ្វារ ក្រុមជនសង្ស័យក៏យកកាំភ្លើងខ្យល់ ភ្ជង់ទៅលើជនរងគ្រោះគំរាមប្លន់យកប្រាក់ចំនួន៥០០ដុល្លារ និងខ្សែ.កមាសមួយខ្សែទម្ងន់៣ជីទៀតផង ។ ក្រោយពេលធ្វើសកម្មភាពហើយ ក្រុមជនសង្ស័យបាននាំគ្នាគេចខ្លួនបាត់។
លុះនៅថ្ងៃទី២០ ខែមេសា កម្លាំងជំនាញការិយាល័យនគរបាលព្រហ្មទណ្ឌកម្រិតធ្ងន់ចុះមកសហការជាមួយកម្លាំងអធិការស្រុកជីក្រែង ធ្វើការស្រាវជ្រាវ និងស៊ើបអង្កេត រួចឃាត់ខ្លួនជនសង្ស័យទាំង៤នាក់ខាងលើ យកមកធ្វើការសាកសួរ។ បើតាមចម្លើយសារភាពរបស់ជនសង្ស័យទាំង៤នាក់ ឆ្លើយសារភាពថា ពួកខ្លួនពិតជាបានធ្វើសកម្មភាពករណីខាងលើនេះពិតប្រាកដមែន។
លោកបញ្ជាក់ថា ករណីនេះ កម្លាំងនគរបាលជំនាញកំពុងកសាងសំណុំរឿងបញ្ជូនខ្លួនជនសង្ស័យទាំងនេះទៅសាលាដំបូងខេត្តសៀមរាបហើយ ដើម្បីចាត់ការតាមផ្លូវច្បាប់៕ (កែសម្រួលដោយ ៖ បុប្ផា)
ចែករំលែកព័តមាននេះ