ប្រទេសសិង្ហបុរី៖ សិង្ហបុរីប្រកាសនាថ្ងៃទី២០ មេសា ពីការកើនខ្ពស់នៃចំនួនអ្នកឆ្លងវីរុស COVID-19 ជាមួយអ្នកឆ្លងថ្មីដល់ទៅជាង១.៤០០នាក់ រកឃើញជាពិសេសក្នុងបណ្ដាទីតាំងស្នាក់នៅរបស់បណ្ដាពលករអន្តោប្រវេសន៍ក្នុងប្រទេសនោះ។
ប្រទេសសិង្ហបុរីនាគ្រាដំបូងអាចទប់ការឆ្លងរាលដាលនៃវីរុសនេះ ដោយសារយុទ្ធសាស្ត្រនៃការត្រួតពិនិត្យមឺុងម៉ាត់បំផុត និងការតាមប្រមាញ់រកបណ្ដាមនុស្សដែលប៉ះពាល់ជាមួយអ្នកឆ្លង។ ប៉ុន្តែប្រទេសនោះបានប្រឈមមុខជាមួយរលកទី២នៃការឆ្លង ដែលចាប់ផ្ដើមពីខែមេសាមក។
អាជ្ញាធរសុខាបាលសិង្ហបុរី ប្រកាសនាថ្ងៃទី២០មេសា ពីអ្នកឆ្លងវីរុសថ្មី១.៤២៦នាក់ នាំឲ្យចំនួនអ្នកឆ្លងសរុបកើនដល់៨.០១៤នាក់ និងអ្នកស្លាប់១១នាក់ ។ ចំនួនអ្នកឆ្លងថ្មីបានកើនឡើងក្នុងប្រទេសនេះ តាំងពីចាប់ផ្ដើមយុទ្ធនាការនៃការធ្វើតេស្ត ក្នុងបណ្ដាទីតាំងដែលមានពួកពលករអន្តោប្រវេសន៍រស់នៅច្រើន ក្នុងលក្ខខណ្ឌគ្មានអនាម័យ។
សិង្ហបុរីមានកម្មករសំណង់ប្រមាណជា២០០.០០០នាក់ ដែលភាគច្រើនមកពីអាសីុខាងត្បូង ដែលធ្វើការខាងសំណង់អគារខ្ពស់ៗនិងបណ្ដាមជ្ឈមណ្ឌលពាណិជ្ជកម្ម ដោយទទួលបានប្រាក់រវាងពី៤០០ ទៅ៥០០ដុល្លារក្នុង១ខែ ៕
ចែករំលែកព័តមាននេះ