ខេត្តរតនគិរី ៖ បើតាមសេចក្តីរាយការណ៍បានឱ្យដឹងថា កម្លាំងសមត្ថកិច្ចនគរបាលស្រុកលំផាត់ បានធ្វើការឃាត់ខ្លួនជនសង្ស័យម្នាក់ពីបទចាប់បំពានសេពសន្ថវៈទៅលើកូនស្រីបង្កើតរបស់ខ្លួនសម្រេច២ដង បន្ទាប់ពីបែកធ្លាយរឿងដល់ម្តាយ ហើយម្តាយសួរថា ម៉េចក៏ធ្វើទង្វើអាក្រក់បែបនេះដាក់កូន តែជនសង្ស័យបដិសេធ រួចក៏ទាញពូថៅកាប់កូនដៃខ្លួនឯង និងចេញពីផ្ទះបាត់ លុះមកវិញក៏ត្រូវសមត្ថកិច្ចចាប់ខ្លួនបានតែម្តង។
សេចក្តីរាយការណ៍បន្តថា ការឃាត់ខ្លួនជនសង្ស័យត្រូវជាឪពុកខាងលើធ្វើឡើងកាលពីម៉ោង៣និង៣០នាទីរសៀល ថ្ងៃទី១៨ ខែមេសា ឆ្នាំ២០២០ នៅត្រង់ចំណុចផ្ទះជនសង្ស័យ ស្ថិតក្នុង ស្រុកលំផាត់ ខេត្តរតនគិរី។
សេចក្តីរាយការណ៍បានឱ្យដឹងថា ជនសង្ស័យជាឪពុកឈ្មោះ អ៊ីម ពឿន ភេទប្រុស អាយុ៤០ឆ្នាំ មុខរបរកសិករ មានទីលំនៅភូមិ-ឃុំខាងលើ ចំណែកជនរងគ្រោះអាយុ១៧ឆ្នាំ មុខរបរកសិករ ។
បើតាមក្មេងស្រីរងគ្រោះបានរៀបរាប់ប្រាប់សមត្ថកិច្ចថា ខ្លួនត្រូវបានឪពុកបង្កើតចាប់បំពានសេពសន្ថវ:នៅលើផ្ទះចំនួន២ដងមកហើយ គឺលើកទី១ នៅក្នុងខែកុម្ភៈ ឆ្នាំ២០២០ នៅលើផ្ទះរបស់ខ្លួន បន្ទាប់មកក៏បានចាប់ជាលើកទី២ម្តងទៀត ថ្ងៃទី១៦ ខែមេសា ម៉ោង១០និង៣០នាទីយប់ នៅលើផ្ទះរបស់ខ្លួនទៀត។
ប្រភពដដែលបន្តថា ក្រោយមក ដោយសារតែកូនស្រីទ្រាំនឹងទង្វើររបស់ឪពុករបស់ខ្លួនលែងបាន ក៏បានប្រាប់ម្តាយរបស់នាងឱ្យបានដឹង និងអ្នកភូមិតែម្តង។ បន្ទាប់ពីម្តាយជនរងគ្រោះបានដឹងរឿងនោះមកក៏ជជីកសួរទៅប្តីខ្លួនថា «អែងមិចបានធ្វើទង្វើអាក្រក់ទៅលើកូនស្រីបែបនេះចឹង?» ជនសង្ស័យឆ្លើយថា «ខ្ញុំមិនបានធ្វើចឹងនោះទេ..!»។
ប្រភពដដែលបន្តថា ក្រោយពីនិយាយរួច ជនសង្ស័យជាឪពុកបានទៅប្រមូលខោអាវ រួចហើយក៏ទាញយកពូថៅមកកាប់កូនដៃខាងឆ្វេងរបស់ខ្លួនចោលមួយទៅ រួចក៏បានចាកចេញពីផ្ទះគេចខ្លួនបាត់នៅថ្ងៃទី១៦ ខែមេសា ឆ្នាំ២០២០នោះដែរ។ បន្ទាប់ពីជនសង្ស័យជាឪពុកគេចខ្លួនបាន២យប់ក៏ឃើញបង្ហាញខ្លួនចូលមកផ្ទះវិញនៅល្ងាចថ្ងៃទី១៨ ខែមេសា នោះ ភ្លាមៗដែរក៏ត្រូវបានអ្នកស្រុក-ភូមិរាយការណ៍ប្រាប់សមត្ថកិច្ចឱ្យចុះមកធ្វើការឃាត់ខ្លួនបានតែម្តង។
ក្រោយធ្វើការឃាត់ខ្លួនជនសង្ស័យខាងលើ ត្រូវបានឃុំបណ្តោះអាសន្ននៅអធិការដ្ឋាននគរបាលស្រុកលំផាត់ កសាងសំណុំរឿងបញ្ជូនទៅអយ្យការអមសាលាដំបូងខេត្ត នៅព្រឹកថ្ងៃទី២០ ខែមេសានេះ ដើម្បីផ្តន្ទាទោសទៅតាមផ្លូវច្បាប់ផងដែរ៕ (កែសម្រួលដោយ ៖ បុប្ផា)
ចែករំលែកព័តមាននេះ