ខេត្តបន្ទាយមានជ័យ ៖ លោកយាយម្នាក់មានអាយុ៧៨ឆ្នាំ គ្មានកូនចៅ រស់នៅម្នាក់ឯង បានទទួលផ្ទះ១ខ្នងពីសាខាកាកបាទក្រហមកម្ពុជាកាលពីថ្ងៃទី១៨ ខែមេសា ឆ្នាំ២០២០ នៅស្រុកស្វាយចេក។
លោក លឿង សុភ័ក្រ អភិបាលស្រុកស្វាយចេក បានមានប្រសាសន៍ថ្លែងអំណគុណដល់សាខាកាកបាទក្រហមកម្ពុជាខេត្តបន្ទាយមានជ័យ ដែលបានកសាងផ្ទះ១ខ្នងប្រគល់ជូនលោកយាយ យឹម យឿន អាយុ៧៨ឆ្នាំ រស់នៅភូមិរការថ្មី ឃុំស្រុកស្វាយចេក ដែលគ្មានកូនចៅ រស់នៅម្នាក់ឯង។
ក្នុងឱកាសនោះដែរ លោក អ៊ុំ រាត្រី អភិបាលខេត្តបន្ទាយមានជ័យ បានមានប្រសាសន៍ថា ផ្ទះមួយខ្នងដែលត្រូវប្រគល់ជូនលោកយាយជរាគ្មានទីពឹងខាងលើនេះ គឺជាអំណោយសាខាកាកបាទក្រហមកម្ពុជាខេត្តបន្ទាយមានជ័យ ដោយសាងសង់ឡើងអំពីដែកប្រក់ស័ង្កសី មានប្រវែងណ្តោយ៤ម៉ែត្រ និងទទឹង៣,៨ម៉ែត្រ ចំណាយថវិកាអស់១.៧៦៨ដុល្លារ ហើយក៏ជាផ្ទះដែលប្រគល់ជូនលើកទី៦ ក្នុងខេត្តបន្ទាយមានជ័យ។
លោកអភិបាលខេត្តបានបញ្ជាក់ថា នេះជាការយកចិត្តទុកដាក់ពីសំណាក់សម្តេចកិតិ្តព្រឹទ្ធបណ្ឌិត ប៊ុន រ៉ានីហ៊ុន សែន ប្រធានកាកបាក្រហមកម្ពុជា ដើម្បីជួយដល់ប្រជាពលរដ្ឋជួបការលំបាក និងងាយរងគ្រោះ និងរងគ្រោះដោយធម្មជាតិ គឺតែងតែជួយទាន់ពេលវេលា ដោយមិនប្រកាន់ពីនិន្នាការនយោបាយ, ពណ៌សម្បុរឬពូជសាសន៍អ្វីឡើយ។
ក្នុងពិធីប្រគល់ផ្ទះជូនលោកយាយខាងលើ ក៏បានប្រគល់អំណោយជាសម្ភារៈនិងគ្រឿងឧបភោគបរិភោគដូចជា អង្ករ៥០គីឡូក្រាម ត្រីខ២០កំប៉ុង មី២កេស ទឹកស៊ីអុីវ ទឹកត្រី១២ដប ប្រេងឆា១ដប ប៊ីចេង១កញ្ចប់ កន្ទេល១ មុង១ ក្រម៉ា១ ភួយ១ សារ៉ុង១ អាវយឺត១ សាប៊ូលាងដៃ និងចាន ឆ្នាំង ស្លាបព្រា ផងដែរ៕ (កែសម្រួលដោយ ៖ ធីតា)
ចែករំលែកព័តមាននេះ