ខេត្តបាត់ដំបង ៖ គិតត្រឹមថ្ងៃទី១៩ មេសា មន្ត្រីនគរបាលស្រុកបាណន់បានឃាត់ខ្លួនជនដៃដល់តែ៦នាក់ប៉ុណ្ណោះដែលសុទ្ធជាអ្នករស់នៅឃុំភ្នំសំពៅ ។ ប៉ុន្តែនៅមិនឃើញមុខជនដៃដល់ប៉ុន្មាននាក់ទៀត ដែលរស់នៅឃុំស្នឹងដែលសាក្សីបានចង្អុលបង្ហាញភ្លាមៗនៅកន្លែងកើតហេតុនៅភូមិសំរោងនោះទេ ។ ហើយបើតាមប្រភពចុងក្រោយ នាថ្ងៃទី២០ មេសា នេះត្រូវគេរាយការណ៍មកថា ក្រុមជនដៃដល់ដែលសេសសល់ទាំងនោះ គឺមានរថយន្តមួយគ្រឿងបានមកដឹកជម្លៀសពួកគេចេញពីភូមិឋានហើយ ហើយក៏គេមិនទាន់ដឹងថា ការដឹកជម្លៀសពួកគេចេញ នាំយកទៅកាន់ទីកន្លែងណាបន្តទៀតដែរ ។
គួរបញ្ជាក់ថា ចៅក្រមស៊ើបសួរនៃសាលាដំបូងខេត្ត បានសម្រេចចេញដីកាបង្គាប់ឱ្យសមត្ថកិច្ចបញ្ជូនខ្លួនក្រុមក្មេងទំនើងចំនួន៦នាក់ដែលដេញកាប់គ្នាផ្អើលតាមដងផ្លូវនៅក្នុងឃុំស្នឹង ស្រុកបាណន់ ទៅឃុំខ្លួនបណ្ដោះអាសន្ននៅក្នុងពន្ធនាគារខេត្ត កាលពីរសៀលថ្ងៃទី១៨ មេសា ក្រោយពីតំណាងអយ្យការចោទប្រកាន់ពីបទ «ហិង្សាដោយចេតនាមានស្ថានទម្ងន់ទោស» ។ នេះបើតាមមន្ត្រីការិយាល័យជំនាញបានផ្ដល់ព័ត៌មាន ក្រោយបញ្ជូនក្រុមនេះចូលដល់ទ្វារខ្មៅ ។
ជនទំនើងទាំង៦នាក់ ១-ឈ្មោះយ៉េន យីន អាយុ១៦ឆ្នាំ ២-ឈ្មោះព្រឿង សាវ៉ាន អាយុ១៦ឆ្នាំ ៣-ឈ្មោះរដ្ឋ ដារិទ្ធ អាយុ១៥ឆ្នាំ បីនាក់នេះរស់នៅភូមិក្រពើត្បូង ឃុំភ្នំសំពៅ ស្រុកបាណន់ ៤-ឈ្មោះម៉ៅ សាមិន អាយុ១៧ឆ្នាំ ៥-ឈ្មោះអន រ៉ាន់ អាយុ១៦ឆ្នាំ និង៦-ឈ្មោះយឿន សុខលីន អាយុ២៣ឆ្នាំ បីនាក់នេះរស់នៅភូមិក្រពើជើង ឃុំភ្នំសំពៅ ស្រុកបាណន់ ។ រីឯក្មេងទំនើងចំនួន៣នាក់ទៀត ជាជនរងគ្រោះដោយសារផ្លែកាំបិត និងផ្លែដាវ ១-ឈ្មោះប៉ិច ធារា អាយុ១៦ឆ្នាំ ២-ឈ្មោះណង សុថៃលិក អាយុ២០ឆ្នាំ និង៣-ឈ្មោះវ៉ាន់ សុធី អាយុ២៧ឆ្នាំ របួសធ្ងន់ ពួកគេរស់នៅក្រុងបាត់ដំបង ។
ពាក់ព័ន្ធសង្គ្រាមបង្ហូរឈាមយ៉ាងកក្រើករវាងក្មេងទំនើងទាំងពីរក្រុមនេះ មន្ត្រីជំនាញមួយចំនួនបានព្យាយាមលាក់លៀមមិនហ៊ានបំភ្លឺទេ នៅពេលសាកសួរអំពីព័ត៌មាន ។ សូម្បីពេលវេលា ទីតាំងកើតហេតុ ចំនួនជនបង្កនៃភាគីម្ខាងៗ ក៏គេហើបមាត់ដែរ ដែលនាំឲ្យមានការសង្ស័យថា«ទំនងអាចមានភាពមិនប្រក្រតីខ្លះៗនៅពីក្រោយឆាកប្រយុទ្ធគ្នា រវាងពួកក្មេងអន្ធពាលទាំង២ក្រុមនេះ»។ ប៉ុន្តែកំណត់ហេតុនេះ ត្រូវបានផ្សព្វផ្សាយជាសាធារណៈនៅក្នុងបណ្ដាញសង្គមរបស់«ស្នងការដ្ឋាននគរបាលខេត្តបាត់ដំបង»ជាបន្តបន្ទាប់នៅថ្ងៃទី១៥ និង១៦ មេសា ។ យោងលើរបាយការណ៍អំពើហិង្សាមានចរិកយ៉ាងសាហាវឃោរឃៅ ដែលបង្កឡើងដោយពួកក្មេងទំនើង២ក្រុមនេះបានប៉ះទង្កិចគ្នាផ្ទូនៗ២លើកនៅលើដងផ្លូវជាតិលេខ៥៧ ។
របាយការណ៍ដដែលបានបញ្ជាក់ថា លើកដំបូងក្រុមនេះជិះម៉ូតូដេញស្ទាក់កាប់គ្នា ចាប់ផ្ដើមនៅវេលាម៉ោង៥ និង៥៨នាទីល្ងាចថ្ងៃទី១៤ មេសា (ថ្ងៃចូលឆ្នាំខ្មែរ) នៅចំណុចភូមិបឹងចែង ឃុំស្នឹង ស្រុកបាណន់ នាំឲ្យភាគីម្ខាងមានគ្នា៣នាក់រ ងបួសដោយសារច្បាំងចាញ់ ហើយនាំគ្នាជិះម៉ូតូរត់បំរុងទៅផ្ទះ ។ ប៉ុន្តែត្រូវបានភាគីដែលឈ្នះមានគ្នាច្រើន នាំគ្នាជិះម៉ូតូដេញតាមទាន់ នៅចំណុចភូមិសំរោង ឃុំស្នឹងដដែល ។ ក្រុមដៃដល់ក៏បានធ្វើសកម្មភាពវាយបំផ្លាញម៉ូតូជនរងគ្រោះខូចខាតអស់១គ្រឿង ។ តែមុនពេលប៉ះគ្នាលើកទី២នេះ មន្ត្រីនគរបាលមូលដ្ឋាន ក៏ឃាត់ខ្លួនបក្សពួកជនដៃដល់បានម្នាក់ដែរ ឈ្មោះយឿន សុខលី អាយុ២៣ឆ្នាំ ។ យ៉ាងនេះក្ដី របាយការណ៍នេះហាក់មិនបាននិយាយពីមូលហេតុ ដែលនាំឱ្យមានអំពើហិង្សានេះឡើង ឬវត្ថុតាងដែលដកហូត ឬចំនួនជនបង្កនៃភាគីនីមួយៗនោះទេ ។
ប៉ុន្តែប្រភពខ្លះ បានផ្ដល់ចម្លើយហាក់ផ្ទុយគ្នាត្រង់ចំណុចទៅនឹងរបាយការណ៍សមត្ថកិច្ចខាងលើ ដែលបានពិពណ៌នាអំពីសកម្មភាពឆាកប្រយុទ្ធគ្នារវាងពួកក្មេងទំនើងទាំង២ក្រុមនេះ ។ សាក្សីខ្លះនិយាយថា ពេលដែលភាគីទាំង២បញ្ចប់ការស្ទាក់កាប់គ្នាលើកដំបូង នៅភូមិបឹងចែង គេឃើញក្រុមជនដៃដល់ដែលមានគ្នាច្រើន ម្នាក់ៗ កាន់ដាវ កាន់កាំបិតផ្គាក់ និងខ្លះកាន់ចំពាមកៅស៊ូផង បានជិះម៉ូតូទាំងហ្វូងដេញតាមភាគីដែលចាញ់ តាមដងផ្លូវជាតិលេខ៥៧ កាត់មុខប៉ុស្ដិ៍នគរបាលស្នឹង ឆ្ពោះទៅទិសខាងជើងទាំងព្រលឹងចុងសក់ ។ប្រភពដដែលថា ពេលកំពុងជិះដេញគ្នាយ៉ាងប្រកិតៗ គេឃើញក្រុមដៃដល់បានព្យាយាមលើកកាំបិត ឬដាវកាប់ទៅលើជនរងគ្រោះ ម្ដងត្រូវម្ដងខុស និងខ្លះបានបាញ់ក្រុមជនរងគ្រោះនឹងចំពាមកៅស៊ូ រហូតដល់ចំណុចភូមិសំរោង ទើបក្រុមដៃដល់តាមទាន់ រួចចុះដេញកាប់ជនរងគ្រោះទាំង៣នាក់យ៉ាងឃោរឃៅផ្អើលមនុស្សពេញភូមិ ។ គេឃើញជនរងគ្រោះទាំង៣នាក់រត់ចោលម៉ូតូចូលទៅក្នុងភូមិស្រែកឲ្យគេជួយ ដែលជនដៃដល់ម្នាក់ដេញតាមកាប់យ៉ាងប្រកិតពីក្រោយ ខណៈជនមួយក្រុមទៀត ព្រូតកាប់ចិញ្ច្រាំម៉ូតូជនរងគ្រោះឡើងខ្ទេចវ៉ល់។
ប៉ុន្តែប្រហែល១០នាទីប៉ុណ្ណោះ គេឃើញមន្ត្រីនគរបាលម្នាក់ និងប្រជាការពារ៣នាក់ ក៏បានមកដល់ដែរ ខណៈឃើញជនដៃដល់៣នាក់កាន់ដាវសស្ញាចម្នាក់មួយដើមៗ ដើរចូលទៅកាន់ផ្ទះក្បែរនោះ រួចពួកគេបោះដាវចោលក្នុងទឹកស្រះខាងក្រោយផ្ទះយ៉ាងស្ងាត់ស្ងៀមបំផុត ។ ប៉ុន្តែក្រោយមក គេក៏បានប្រទះឃើញបក្សជនដៃដល់មួយហ្វូងទៀត បានជិះម៉ូតូរត់ពីសមត្ថកិច្ចទៅឈប់នៅវាលបឹងត្រាវ (ព្រំប្រទល់ឃុំស្នឹង និងឃុំភ្នំសំពៅ) ហើយពួកគេបានប្ដូរអាវគ្នាពាក់ ប្ដូរម៉ូតូគ្នាជិះ ដែលទំនងចង់បំភាន់ភ្នែកមហាជន ឬសមត្ថកិច្ច រួចជិះទៅបាត់អស់ភ្លាមៗដែរ។
អ្នកភូមិបានព្យាយាមផ្ដល់ដំណឹងនេះភ្លាមៗ ទៅកាន់លោកនគរបាលម្នាក់ ដែលកំពុងឈរមើលម៉ូតូជនរងគ្រោះ ដើម្បីឲ្យចាត់វិធានការក្រុមជនដៃដល់ និងទៅយកវត្ថុតាង តែមិនត្រូវបានលោកនគរបាលម្នាក់នោះអើពើឡើយ ។ សាក្សីខ្លះបានស្គាល់ទាំងអត្តសញ្ញាណ និងទីកន្លែងរស់នៅរបស់ជនដៃដល់ប៉ុន្មាននាក់នោះ ហើយថែមទាំងបានបង្ហើបប្រាប់សមត្ថកិច្ចភ្លាមៗ តែនៅតែគ្មានបានការដដែល ព្រោះសមត្ថកិច្ចហាក់ធ្វើមិនដឹង មិនឮចំពោះការផ្ដល់ព័ត៏មាននេះ។
បើតាមអ្នកភូមិបាននិយាយថា ក្រោយកើតហេតុមួយថ្ងៃ សមត្ថកិច្ចបានចុះព្រោងព្រាតទៅសួរនាំអ្នកភូមិក្បែរៗនោះ និងបានដឹងយ៉ាងច្បាស់ពីតម្រុយនៃមុខសញ្ញាជនដៃដល់ទាំងនោះ តែសមត្ថកិច្ចហាក់ព្យាយាមគេចវែស មិនព្រមចាត់វិធានការលើក្រុមជនដៃដល់ទាំងនោះឡើយ បើទោះជាគេឃើញមន្ត្រីខ្លះជិះម៉ូតូឆ្វែលចុះឡើង ស្ទើរសឹកថ្នល់កាត់មុខផ្ទះជនសង្ស័យក្ដី ។ ប្រភពខ្លះខ្សិបប្រាប់ថា ប៉ុន្មានថ្ងៃនេះ (ក្រោយពីកើតហេតុ) គេឃើញសាច់ញាតិជនដៃដល់មួយចំនួន ហាក់ខ្វែងដៃខ្វែងជើងសម្បើមណាស់ តាមរយៈមន្ត្រីខិលខូចមួយចំនួន ដើម្បីសុំជួបលោកធំនេះ លោកធំនោះ ដែលគេសង្ស័យថា សកម្មភាពនេះទំនងចង់សុំអន្តរាគមន៏ជួយដោះស្រាយចំពោះ «ជនដៃដល់ដែលមិនទាន់ចាប់ខ្លួន»។ សកម្មភាពមិនប្រក្រតីនេះ គេសង្កេតឃើញតាំងពីថ្ងៃដំបូងម្ល៉េះ ហើយគេកំពុងសង្ស័យ«អាចមានមន្ត្រីខិលខូចមួយចំនួន ជាអ្នកផ្ដល់យោបល់ឲ្យជនដៃដល់នៅឃុំស្នឹង សម្ងំលាក់ខ្លួនសិន រួចចាំរត់ការដោះស្រាយតាមក្រោយ»។ ប៉ុន្តែយ៉ាងណា នេះគ្រាន់ តែជាការមន្ទិលរបស់ពលរដ្ឋមួយចំនួនតែប៉ុណ្ណោះ។
ពាក់ព័ន្ធនឹងសំណុំរឿងក្រុមក្មេងទំនើងច្បាំងគ្នា កក្រើកស្រុកបាណន់នេះ លោកឧត្តមសេនីយ៍ត្រី ជេត វណ្ណនី ស្នងការរងខេត្តបានមានប្រសាសន៍បញ្ជាក់យ៉ាងច្បាស់ថា «ជាក់ស្ដែងពេលនេះ សមត្ថកិច្ចពិតជាបានឃាត់ខ្លួនក្រុមជនដៃដល់បានត្រិមតែចំនួន៦នាក់មែន»។ ប៉ុន្តែលោកស្នងការរងរូបនេះ បានប្រាប់ថា មន្ត្រីការិយាល័យជំនាញ បានកសាងសំណុំរឿងនេះយ៉ាងល្អិតល្អន់ បញ្ជូនទៅតុលាការហើយ រីឯជនទាំង៦នាក់នោះ ក៏ត្រូវតុលាការឃុំខ្លួនហើយដែរ ។ ដោយឡែក បក្សពួកក្រុមដៃដល់មួយចំនួនដែលកំពុងរត់គេចខ្លួនអាចនឹងត្រូវតុលាការចាត់ការតាមនីតិវិធីបន្តបន្ទាប់ទៀត នៅពេលខាងមុខនេះ ព្រោះមុខសញ្ញាមួយខ្លះ យើងបានស្គាល់អត្តសញ្ញាណហើយដែរ ។
ចែករំលែកព័តមាននេះ