ខេត្តបន្ទាយមានជ័យ ៖ បើតាមសេចក្តីរាយការណ៍បានឱ្យដឹងថា មានហេតុការណ៍គ្រោះថ្នាក់ចរាចរណ៍ដោយសារតែស្ត្រីម្នាក់ឱ្យប្តីរបស់ខ្លួនបង្រៀនបើកបរ បែរជាប៉ះលេខថយក្រោយ ហើយជាន់ហ្វ្រាំងច្រឡំជាហ្គាទៅបុកស្ត្រីលក់ដូរម្នាក់ និងបុកបង្កាន់ដៃស្ពានបាក់ធ្លាក់ចូលក្នុងអាងទឹកត្រពាំងថ្ម បណ្តាលឱ្យមនុស្ស៣នាក់រងរបួសធ្ងន់ បង្កឲ្យមានការភ្ញាក់ផ្អើលកាលពីម៉ោង១និង១០នាទីរសៀល ថ្ងៃទី១៩ ខែមេសា ឆ្នាំ២០២០ ចំណុចស្ពានទី១ រមណីយដ្ឋានអាងទឹកត្រពាំងថ្ម ស្ថិតក្នុងភូមិត្រពាំងថ្ម ឃុំប៉ោយចារ ស្រុកភ្នំស្រុក។
ជនរងគ្រោះទាំង៣នាក់ខាងលើមាន ស្ត្រីរងគ្រោះឈ្មោះ ព្រីញ ដា អាយុ៣២ឆ្នាំ (រងរបួសធ្ងន់បែកលើភ្នែកខាងឆ្វេង) បានឲ្យប្តីឈ្មោះ លាង ភាឡៃ អាយុ៣៦ឆ្នាំ (រងរបួសធ្ងន់បែកចិញ្ចើមឆ្វេង) ជាអ្នកបង្រៀនបើកបររថយន្ត អ្នកទាំង២នាក់រស់នៅភូមិមាត់ស្រះ ឃុំស្រះជីក ស្រុកភ្នំស្រុក ខេត្តបន្ទាយមានជ័យ ចំពោះរថយន្តដែលបើកបរម៉ាកតូយូតាហាយឡិនឌ័រ ពណ៌ទឹកប្រាក់ ពាក់ស្លាកលេខភ្នំពេញ 2A.9331។ ចំណែកស្ត្រីម្នាក់ទៀតជាអ្នកលក់ដូរនៅបង្ហាន់ដៃស្ពានឈ្មោះឈ្មោះសូ ស៊ីណា ហៅវិត អាយុ២៩ឆ្នាំ (រងរបួសធ្ងន់) រស់នៅភូមិត្រពាំងថ្មជើង ឃុំប៉ោយចារ ខេត្តបន្ទាយមានជ័យ។
បើតាមលោកអធិការនគរបាលស្រុកភ្នំស្រុក បានឲ្យដឹងថា មុនពេលកើតហេតុ គេឃើញស្ត្រីម្នាក់ឈ្មោះ ព្រីញ ដា បានឲ្យប្តីរបស់នាងបង្រៀនបើកបររថយន្ត ខណៈពេលបើកមកដល់ចំណុចកៀនស្ពានខាងលិចដែលជាកន្លែងចំណោតរថយន្ត ស្ត្រីរៀនបើកបររូបនេះក៏បានថយក្រោយ។ ស្របពេលនោះស្ត្រីរូបនេះក៏បានបញ្ចូលលេខ បែរជាទៅប៉ះលេខថយក្រោយ ហើយជាន់ហ្វ្រាំងច្រឡំជាហ្គា បណ្តាលឲ្យរថយន្តមានល្បឿនលឿនយ៉ាងខ្លាំងថយក្រោយទៅបុកស្ត្រីជាអ្នកលក់ផ្លែឈូកនៅក្បែរបង្កាន់ដៃស្ពាននោះ បណ្តាលឱ្យរបួសធ្ងន់ រួចរថយន្តនេះក៏បន្តបុកបង្កាន់ដៃដែកស្ពានបាក់ ធ្វើឱ្យរថយន្តនោះធ្លាក់ចូលក្នុងអាំងទឹកតែម្តង បណ្តាលឱ្យរងរបួសទាំង២នាក់ប្តីប្រពន្ធផងដែរ។
លោកអធិការបានបញ្ជាក់ថា ក្រោយពេលកើតហេតុខាងលើនេះ ស្ត្រីអ្នករៀនបើកបរ និងប្តីជាអ្នកបង្រៀនកំពុងសម្រាកព្យបាលនៅមន្ទីរពេទ្យបង្អែកស្រុកភ្នំស្រុក ចំណែកស្ត្រីអ្នកលក់ផ្លែឈូកក្បែរបង្កាន់ស្ពាន ត្រូវបានបញ្ជូនទៅព្យាបាលនៅមន្ទីរពេទ្យបង្អែកមិត្តភាពកម្ពុជា-ជប៉ុន នៅស្រុកមង្គលបូរី ។ រីឯរថយន្តនៅពេលនេះកំពុងតែស្ទូចយកទៅរក្សាទុកនៅអធិការដ្ឋាននគរបាលស្រុក ដើម្បីរង់ចាំធ្វើការដោះស្រាយនៅពេលក្រោយ៕ (កែសម្រួលដោយ ៖ បុប្ផា)
ចែករំលែកព័តមាននេះ