រាជធានីភ្នំពេញ ៖ កីឡាករមឿន សុខហ៊ុច មកពីក្លិបពុទ្ធសេរីវង្សពោធិ៍សែនជ័យ បានក្លាយជាម្ចាស់ប្រាក់លានពីកម្មវិធី «កម្ពុជា សង្វៀនគុនខ្មែរ» នៅក្នុងសប្ដាហ៍នេះ បន្ទាប់ពីគេបានប្រកួតយកឈ្នះកីឡាករ សួន ចាន់នី មកពីក្លិបបក្សីស្លាបដែក ដោយពិន្ទុនៅលើសង្វៀនស៊ីអិនស៊ី កាលពីថ្ងៃសៅរ៍ ទី១៨ ខែមេសា។
សម្រាប់ការជួបគ្នារវាងកីឡាករ មឿន សុខហ៊ុច និងសួន ចាន់នី បានប្រកួតគ្នាយ៉ាងស្វិតស្វាញអស់រយៈពេល៥ទឹកពេញ មិនតែប៉ុណ្ណោះបើទោះជា សួន ចាន់នី មានប្រៀបខាងកម្ពស់ជាងបន្តិចមែន ប៉ុន្តែមិនអាចធ្វើអ្វី មឿន សុខហ៊ុច បានឡើយ ព្រោះអីត្រូវកីឡាករ មឿន សុខហ៊ុច ទាត់ចូលពោះទឹកពេញៗជាមួយនឹងការបញ្ជូនស្នៀតកណ្ដាប់ដៃវាយសំដៅផ្ទៃមុខបន្ថែមទៀត ធ្វើឱ្យអ្នកប្រដាល់មកពីក្លិបបក្សីស្លាបដែកម្នាក់នេះ បាត់បង់ឱកាសជាច្រើនលើកច្រើនសា។
ទីបំផុតចប់ការប្រកួតទឹកទី៥ ចៅក្រមទាំង៥រូបបានផ្ដល់ពិន្ទុឱ្យ មឿន សុខហ៊ុច ឈ្នះពិន្ទុដោយឯកឆ្ឆ័ន គឺលទ្ធផល៥-០។
កីឡាករ សូត្រ ខេវិន មកពីក្លិបបក្សីស្លាបដែក ក៏ជាអ្នកដែលបានក្លាយជាម្ចាស់ប្រាក់លាននៅក្នុងការប្រកួតលើកនេះដែរ បន្ទាប់ពីគេបានប្រកួតយកឈ្នះកីឡាករ ផាន រះ មកពីក្លិបជ្រៃសែនជ័យ ខេត្តកំពង់ស្ពឺ ដោយពិន្ទុ។
សម្រាប់ការប្រកួតគ្នា៥ទឹកពេញរវាងគូនេះ គឹលទ្ធផលប្រហាក់ប្រហែលគ្នា ប៉ុន្តែផាន រះ រាងអន់កម្លាំងបន្តិច ខណៈការប្រកួតបានឈានចូលដល់ទឹកទី៥ ហេតុដូច្នេះហើយទើធ្វើឱ្យកីឡាករ ផាន រះ បាត់បង់ឱកាសក្នុងការដណ្ដើមយកប្រាក់លានរៀលទាល់តែបាន។
ដោយឡែកសម្រាប់ការប្រកួតរវាងកីឡាករ រឿង សោភ័ណ្ឌ មកពីក្លិបមកុដរាជសីហ៍ និង ឡុង សុវណ្ណឌឿន មកពីក្លិបសាលវ័ន្តកីឡាវិញនោះ បានត្រឹមតែស្មើពិន្ទុគ្នាប៉ុណ្ណោះ ដូច្នេះសម្រាប់រង្វាន់ប្រាក់លានត្រូវបានធ្វើការបែងចែកពាក់កណ្ដាលម្នាក់។
តែទោះជាយ៉ាងណា គេទាំងពីរបានរងនូវការរិះគន់ពីមហាជនយ៉ាងខ្លាំងដោយសាតែការប្រកួតតាំងពីដើមដល់ចប់ប្រៀបដូចជាឡើងទៅប្រឡែងគ្នាលេងអញ្ចឹង។ ប៉ុន្តែលោកមាស សុខគ្រី ដែលជាមន្ត្រីអជ្ញាកណ្ដាល និងចៅក្រម បានមានប្រសាសន៍លើកឡើងនៅមុនពេលប្រកួតថា ថ្វីដៃប្រកួតរបស់ រឿង សោភ័ណ្ឌ ឥឡូវនេះមិនដូចមុនទេ គឺធ្លាក់ចុះច្រើនណាស់៕ (កែសម្រួលដោយ ៖ បុប្ផា)
ចែករំលែកព័តមាននេះ