រាជធានីភ្នំពេញ ៖ បុរសម្នាក់ជាបុគ្គលិកក្រុមហ៊ុនដេគ័របានខ្ចីម៉ូតូពីមិត្តរួមការងារជិះទៅទិញបាយហូបមួយភ្លែត បែរជាយកទៅបញ្ចាំរួចគេចខ្លួនបាត់ លុះរំលងបានមួយអាទិត្យទើបម្ចាស់ម៉ូតូតាមរកឃើញក៏ឃាត់ខ្លួនប្រគល់អោយសមត្ថកិច្ច ដែលហេតុការណ៍នេះបានកើតឡើងតាំងពីវេលាម៉ោង១២និង៣០នាទីថ្ងៃត្រង់ថ្ងៃទី១០ ខែមេសាឆ្នាំ២០២០ នៅចំណុចក្រុមហ៊ុនដេគ័រមួយកន្លែង ក្រុមទី៧៨ ភូមិ១៤ សង្កាត់ទន្លេបាសាក់ ខណ្ឌចំការមន រហូតដល់យប់ថ្ងៃទី១៧ ខែមេសា ឆ្នាំ២០២០ ជនរងគ្រោះបានតាមរកឃើញជនសង្ស័យនៅម្តុំផ្សារដើមគរ ហើយបានប្តឹងសមត្ថកិច្ចមូលដ្ធានឱ្យជួយឃាត់ខ្លួនជនសង្ស័យនាំមកកាន់ប៉ុស្តិ៍នគរបាលទន្លេបាសាក់ដើម្បីចាត់ការតាមនីតិវិធី។
ជនសង្ស័យឈ្មោះ សុន សាវតារ ភេទប្រុស អាយុ៣០ឆ្នាំ ស្នាក់នៅផ្ទះជួល ផ្លូវ២០០៤ សង្កាត់ទឹកថ្លា ខណ្ឌសែនសុខ មុខរបរបុគ្គលិកក្រុមហ៊ុនដេគ័រ ។ ចំណែកជនរងគ្រោះឈ្មោះ ថាវ ចន្ធី ភេទប្រុស អាយុ៣១ឆ្នាំ មុខរបរបុគ្គលិកក្រុមហ៊ុនដេគ័រ ស្នាក់នៅផ្ទះជួល ផ្លូវបេតុង ភូមិតាឡី សង្កាត់ដង្កោ ខណ្ឌដង្កោ ។ រីឯសម្ភារៈបាត់បង់រួមមានម៉ូតូមួយគ្រឿងម៉ាកZoomer X ពណ៌ខ្មៅលាយក្រហម ពាក់ស្លាកលេខ ព្រៃវែង ១M-៣០៧៤ ប្រាក់៤០០ដុល្លារ និង២០ម៉ឺនរៀល ទុកនៅក្រោមកែបម៉ូតូ។
តាមប្រភពព័ត៌មានពីជនរងគ្រោះបានប្រាប់ដឹងថា មុនពេលកើតហេតុ កាលពីថ្ងៃទី១០ ខែមេសា គាត់បានជិះម៉ូតូចេញពីផ្ទះជួលមកធ្វើការនៅក្រុមហ៊ុន មានទីតាំងក្នុងកោះពេជ្រដូចសព្វដង លុះដល់វេលាម៉ោងកើតហេតុ គាត់បានសម្រាកហូបបាយថ្ងៃត្រង់ ហើយគាត់បានមកអង្គុយហូបបាយនៅមុខក្រុមហ៊ុនបានបន្តិចក៏លេចមុខជនសង្ស័យខាងលើដែលជាអ្នកធ្វើការជាមួយគ្នាបានមកខ្ចីម៉ូតូរបស់គាត់ ដោយប្រាប់ថា ខ្ចីជិះទៅទិញបាយហូបមួយភ្លែត ពេលនោះគាត់នឹកឃើញថាជាបុគ្គលិកធ្វើការជាមួយគ្នាក៏អោយម៉ូតូខ្ចី ស្រាប់តែជនសង្ស័យជិះម៉ូតូចេញទៅបាត់រហូត មិនឃើញយកម៉ូតូមកអោយវិញទេ ទាំងក្នុងកែបម៉ូតូនោះមានប្រាក់៤០០ដុល្លារ និង២០ម៉ឺនរៀល ដែលជាប្រាក់ខែគាត់ខំសន្សំទុក។
បន្ទាប់ពីកើតហេតុ ដោយសារទាក់ទងទៅជនសង្ស័យមិនបាន ទើបជនរងគ្រោះក៏បានទៅដាក់ពាក្យបណ្ដឹងនៅប៉ុស្តិ៍នគរបាលរដ្ធបាលទន្លេបាសាក់ ។ លុះដល់វេលាយប់ថ្ងៃទី១៧ ខែមេសា ឆ្នាំ២០២០ ជនរងគ្រោះ បានតាមរកឃើញជនសង្ស័យនៅម្តុំផ្សារដើមគរក៏បានប្តឹងសមត្ថកិច្ចមូលដ្ធានអោយជួយឃាត់ខ្លួនជនសង្ស័យ នាំមកកាន់ប៉ុស្តិ៍នគរបាលទន្លេបាសាក់ចាត់ការតាមនីតិវិធី។
ក្រោយឃាត់ខ្លួន ជនសង្ស័យបានសារភាពថា ម៉ូតូនោះខ្លួនបានយកទៅបញ្ចាំនៅហាងបញ្ចាំមួយកន្លែងនៅម្តុំឃ្លាំងរំសេវបានប្រាក់៨០០ដុល្លារ និងប្រមូលយកលុយនៅក្រោមកែបម៉ូតូនោះទៅចាយ និងសងបំណុលគេអស់ហើយ។
ក្រោយកើតហេតុ ជនរងគ្រោះក៏បានយកលុយទៅលោះម៉ូតូដែលជនសង្ស័យបញ្ចាំយកត្រឡប់មកវិញ ចំណែកជនសង្ស័យត្រូវបានបញ្ជូនខ្លួនទៅកាន់អធិកាដ្ធានខណ្ឌចំការមនចាត់ការបន្តតាមនិតិវិធី ៕ (កែសម្រួលដោយ ៖ ធីតា)
ចែករំលែកព័តមាននេះ