លោកមហាសេដ្ឋី ប៊ីល ហ្គេតស៍ (Bill Gates) ធ្លាប់ជាក្មេងគំរូសម្រាប់ក្រុមហ៊ុនបច្ចេកវិទ្យាដែលឈានមុខគេ ។ ប្រមាណ ២០ឆ្នាំក្រោយមក លោកបានធ្វើឲ្យខ្លួនក្លាយជាអ្នកតំណាងដែលសំខាន់ជាងគេ…
លោកមហាសេដ្ឋី ប៊ីល ហ្គេតស៍ (Bill Gates) ធ្លាប់ជាក្មេងគំរូសម្រាប់ក្រុមហ៊ុនបច្ចេកវិទ្យាដែលឈានមុខគេ ។ ប្រមាណ ២០ឆ្នាំក្រោយមក លោកបានធ្វើឲ្យខ្លួនក្លាយជាអ្នកតំណាងដែលសំខាន់ជាងគេ និងមានឥទ្ធិពលជាងគេក្នុងពិភពអាជីវកម្មដែលកំពុងទប់ទល់នឹងកូវីដ ១៩ ។
ក្នុងរយៈពេលប៉ុន្មានសប្តាហ៍កន្លងមកនេះ លោក ហ្គេតស៍ ស្ថិតក្នុងចំណោមមហាសេដ្ឋីដែលចេញមុខមាត់ច្រើនជាងគេដើម្បីជួយឲ្យប្រជាពលរដ្ឋយល់ដឹងបន្ថែមពីកូវីដ ១៩ និងផ្តល់ជាដំណោះស្រាយដើម្បីទប់ទល់នឹងវីរុសនេះផងដែរ ។ លោកបាននិយាយយ៉ាងលម្អិតពីសុខភាពសាធារណៈ វិធីសាស្ត្រក្នុងការរក្សាគម្លាត និងតួនាទីរបស់រដ្ឋាភិបាលក្នុងការជួយស្តារសេដ្ឋកិច្ចជាដើម ។
លោកថែមទាំងបានចេញមុខរិះគន់ដល់រដ្ឋាភិបាលអាមេរិកដែលបានសម្រេចចិត្តផ្អាកការផ្តល់ថវិកាដល់អង្គការសុខភាពពិភពលោកថែមទៀតខណៈដែលពិភពលោកកំពុងតែព្យាយាមទប់ទល់នឹងកូវីដ ១៩ ។
កាលពីសប្តាហ៍មុនវិញ លោកបានចែករំលែកក្នុងបទសម្ភាសន៍មួយជាមួយនឹងសារព័ត៌មាន CNBC ថា លោកមិនគាំទ្រឲ្យមានការបើកដំណើរការសាលារៀនមុនរដូវស្លឹកឈើជ្រុះទេ ។ លើសពីនេះទៅទៀត លោកបានលោកឡើងពីទុក្ខកង្វល់របស់លោកដែលបានលើកឡើងម្តងហើយម្តងទៀតពីផលប៉ះពាល់បង្កឡើងដោយកូវីដ ១៩ លើប្រទេកំពុងអភិវឌ្ឍន៍ ។
លោកបានបកស្រាយថា «ខ្ញុំព្រួយបារម្ភពីផលប៉ះពាល់សេដ្ឋកិច្ច និងឥទ្ធិពលលើប្រទេសកំពុងអភិវឌ្ឍន៍ដែលមិនអាចអនុវត្តការរក្សាគម្លាតរវាងមនុស្សបានដូចប្រទេសអភិវឌ្ឍន៍ និងមិនមានលទ្ធភាពផ្នែកសុខភិបាលខ្ពស់ផងដែរ» ។ប្រសាសន៍របស់លោកបានជំរុញឲ្យលោកបរិច្ចាគថវិការាប់លានដុល្លារដើម្បីទប់ទល់នឹងកូវីដ ១៩ ។ កាលពីខែកុម្ភៈមូលនិធិសប្បុរសធម៌របស់លោកបានសន្យាថានឹងបរិច្ចាក ១០០លានដុល្លារដើម្បីទប់ទល់នឹងការផ្ទុះជម្ងឺនេះ ។ នៅខែមិនា មូលនិធិដដែលបានសន្យាថានឹងបរិច្ចាគ ៥០លានដុល្លារដើម្បីពន្លឿនការស្រាវជ្រាវលើវិធីព្យាបាល ។
ជាក់ស្តែង អ្នកដឹកនាំអាជីវកម្មធំៗដទៃដូចជាលោកមហាសេដ្ឋី ជេក ម៉ា (Jack Ma) របស់ Alibaba លោក ជេក ដ័រស៊ី (Jack Dorsey) និងមហាសេដ្ឋីដទៃទៀតក៏បានសន្យាថានឹងបរិច្ចាគជាថវិការាប់លានដុល្លារដែរ ។
ប៉ុន្តែសម្រាប់លោក ហ្គេតស៍ ក្រៅពីទ្រព្យសម្បត្តិហើយ លោកមានចំណេះដឹង និងបទពិសោធន៍ក្នុងផ្នែកសុខភាពសាធារណៈអស់រយៈពេលជាច្រើនឆ្នាំមកហើយ ។ វាមិនបញ្ជាក់ថាលោកតែងតែត្រឹមត្រូវគ្រប់ពេលទេ ប៉ុន្តែលោកប្រៀបបានជាគំរូល្អមួយសម្រាប់អាជីវករដទៃដែលមានចិត្តចង់ចូលរួមជួយក្នុងកំឡុងពេលអាសន្ន ៕
ចែករំលែកព័តមាននេះ