រាជធានីភ្នំពេញ ៖ ព្រឹត្តិការណ៍ប្រតកួតកីឡាអត្តពលកម្មធំៗចំនួន៤ ត្រូវបានលុបចោលដោយសារតែមេរោគកូវីដ១៩ វាយលុកនៅលើពិភពលោកយើងនេះ ។
បើតាមលោក ហ៊ុន បូរី អគ្គលេខាធិការសហព័ន្ធខ្មែរកីឡាអត្តពលកម្មស្ម័គ្រចិត្តបានឲ្យដឹងថា ព្រឹត្តិការណ៍ទាំង៤នៅមានកម្រិតតំបន់អាស៊ីអាគ្នេយ៍ ព្រឹត្តិការណ៍ទ្វីបអាស៊ី និងព្រឹត្តិការណ៍ពិភពលោកចំនួន២ ត្រូវបានសហព័ន្ធអន្តរជាតិបង្ខំចិត្តលុបចោលជាបណ្ដោះអាសន្នដោយសារតែពិភពលោកទាំងមូលកំពុងតែរងគ្រោះដោយសារមេរោគកូវីដ១៩ ។
ព្រឹត្តិការណ៍ទាំង៤នោះ រួមមានការប្រកួតជើងឯលទ្វីបអាស៊ីនៅប្រទេសចិន (ASIAN championship) ការប្រកួតជើងឯកពិភពលោក នៅចិន (World Championship) ការប្រកួតជើងឯកពិភពលោកកីឡាអត្តពលកម្មក្នុងសាលនៅចិន និងការប្រកួតជើងឯកអាស៊ីអាគ្នេយ៍នៅប្រទេសថៃ ។
លោកអះអាងថា លោកបានត្រៀមនូវកីឡាករ កីឡាការិនីក្មេងៗដែលមានកម្រិតខ្ពស់សម្រាប់ព្រឹត្តិការណ៍នេះ ពួកគេក៏មានការខកចិត្តដែរ ដោយសារអ្វីៗត្រូវបានលុបចោល ។
លោកអគ្គលេខាធិការបានឲ្យដឹងទៀតថា កម្ពុជាបានហ្វឹកហាត់ដើម្បីត្រៀមចូលរួមព្រឹត្តិការណ៍ទាំង៤នេះ តែពេលនេះការហ្វឹកហាត់ត្រូវបានរំសាយ ។ ចំណែកកីឡាករ កីឡាការិនី ពេលនេះបានត្រឹមតែហ្វឹកហាត់ដោយខ្លួនឯងនៅតាមផ្ទះ ឬតាមទីសុវត្ថិភាពដោយខ្លួនឯង និងអ្នកខ្លះ ហ្វឹកហាត់នៅក្បែរៗស្ដាតប៉ុណ្ណោះ ។
ចំណែកពហុកីឡដ្ឋានជាតិអូឡាំពិក ត្រូវបានបិទទាំងមហាជនដែលចូលហាត់ប្រាណ ទាំង កីឡាករ កីឡាការិនីមិនអនុញ្ញាតឲ្យចូលឡើយ គឺមានតែមន្ត្រីដែលបំពេញការងារនៅក្នុងនោះតែប៉ុណ្ណោះដែលអនុញ្ញាតឲ្យចូល ។
លោកបូរី ទទួលស្គាល់ថា ការហ្វឹកហាត់បែបនេះ គុណផល ( Performance) របស់គេស្រុតចុះច្រើន ។ បន្ទាប់ពីពិភពលោកស្ងប់ស្ងាត់ពីជំងឺកូវីដ១៩ គេត្រូវការពេលវេលាច្រើនដើម្បីស្ដារកម្លាំង និងបច្ចេកទេសឡើងវិញជាមួយនឹងអាហារូបត្ថម្ភដែលមានស្ដង់ដាសម្រាប់កីឡា ៕ (កែសម្រួលដោយ ៖ បុប្ផា)
ចែករំលែកព័តមាននេះ