ខេត្តព្រះវិហារ ៖ ដោយសង្កេតឃើញរយៈពេល៤ថ្ងៃ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរឆ្នាំនេះ នៅតាមគោលដៅតំបន់រមណីយដ្ឋានវប្បធម៌ប្រវត្តិសាស្ត្រ និងរមណីយដ្ឋានធម្មជាតិ ក្នុងខេត្តព្រះវិហារ មានសភាពស្ងប់ស្ងាត់ ដោយឡែកភ្ញៀវដែលមកកម្សាន្តក្នុងរមណីយដ្ឋាន សុទ្ធតែជាពលរដ្ឋក្នុងខេត្ត…
ខេត្តព្រះវិហារ ៖ ដោយសង្កេតឃើញរយៈពេល៤ថ្ងៃ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរឆ្នាំនេះ នៅតាមគោលដៅតំបន់រមណីយដ្ឋានវប្បធម៌ប្រវត្តិសាស្ត្រ និងរមណីយដ្ឋានធម្មជាតិ ក្នុងខេត្តព្រះវិហារ មានសភាពស្ងប់ស្ងាត់ ដោយឡែកភ្ញៀវដែលមកកម្សាន្តក្នុងរមណីយដ្ឋាន សុទ្ធតែជាពលរដ្ឋក្នុងខេត្ត ជាពិសេសអ្នករស់នៅក្បែរតំបន់រមណីយដ្ឋានតែម្តង ។
បើតាមលោក គង់ វិបុល ប្រធានមន្ទីរទេសចរណ៍ខេត្តព្រះវិហារ បានមានប្រសាសន៍ថា ការស្ងប់ស្ងាត់ភ្ញៀវនេះ មិនត្រឹមតែកោះកែរនោះទេ ចំពោះប្រាសាទព្រះវិហារ ក៏ដូចជារមណីយដ្ឋាននានាក្នុងខេត្ត មានភាពស្ងប់ស្ងាត់ដែរ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរឆ្នាំនេះ ដោយសារតែរាជរដ្ឋាភិបាលបានចេញបទបញ្ជាហាមប្រាមពលរដ្ឋផ្អាកការធ្វើដំណើរឆ្លងខេត្តពីខេត្តមួយទៅខេត្តមួយ ដើម្បីទប់ស្កាត់ការផ្ទុះរីករាលដាលនៃវីរុសកូវីដ១៩។ ដូច្នេះហើយភ្ញៀវទេសចរដែលមកលេងកម្សាន្តក្នុងតំបន់រមណីយដ្ឋានក្នុងខេត្តព្រះវិហារ សុទ្ធតែជាពលរដ្ឋរស់នៅក្នុងខេត្តព្រះវិហារតែប៉ុណ្ណោះ ជាពិសេសអ្នករស់នៅតំបន់ក្បែរៗរមណីយដ្ឋាននេះតែម្តង ។
លោកបន្តថា តាមការសង្កេតឃើញថា ប្រជាពលរដ្ឋមានការយល់ដឹងច្រើន និងបានចូលរួមក្នុងការទប់ស្កាត់ជំងឺនេះ ដោយភាគច្រើនពួកគាត់ស្នាក់នៅក្នុងផ្ទះរៀងៗខ្លួនជាធម្មតា ដោយមិនមានការធ្វើដំណើរខ្វាត់ខ្វែងទៅណាឡើយ ។
លោកក៏បានបញ្ជាក់ថា ក្នុងរយៈពេល៤ថ្ងៃ នៃពិធីចូលឆ្នាំខ្មែរឆ្នាំ២០២០នេះ ភ្ញៀវទេសចរទៅលេងកម្សាន្តក្នុងរមណីយដ្ឋានវប្បធម៌ប្រវត្តិសាស្ត្រ រមណីយដ្ឋានធម្មជាតិ និងគោលដៅទេសចរណ៍ផ្សេងៗ ក្នុងខេត្តព្រះវិហារ មានតិចតួចបំផុត ។ (កែសម្រួលដោយ ៖ បុប្ផា)
ចែករំលែកព័តមាននេះ