រាជធានីភ្នំពេញ៖ កម្មករ-កម្មការិនីចំនួន ១៥៧២៦ នាក់នៃរោងចក្រចំនួន ៦៧២រោងចក្រនឹងត្រឡប់ពីស្រុកកំណើតក្នុងឱកាសបុណ្យចូលឆ្នាំខ្មែរ ចូលមករាជធានីភ្នំពេញ ដូច្នេះពួកគាត់នឹងត្រូវដាក់ឲ្យនៅដាច់ដោយឡែក ១៤ ថ្ងៃតាមវិធានចត្តាឡីស័ក ។…
រាជធានីភ្នំពេញ៖ កម្មករ-កម្មការិនីចំនួន ១៥៧២៦ នាក់នៃរោងចក្រចំនួន ៦៧២រោងចក្រនឹងត្រឡប់ពីស្រុកកំណើតក្នុងឱកាសបុណ្យចូលឆ្នាំខ្មែរ ចូលមករាជធានីភ្នំពេញ ដូច្នេះពួកគាត់នឹងត្រូវដាក់ឲ្យនៅដាច់ដោយឡែក ១៤ ថ្ងៃតាមវិធានចត្តាឡីស័ក ។ នេះបើយោងតាមប្រភពព័ត៌មានពីមន្ត្រីសាលារាជធានីភ្នំពេញបានប្រាប់នៅរសៀលថ្ងៃទី ១៦ ខែមេសា ឆ្នាំ២០២០ ។
ប្រភពដដែលបានបញ្ជាក់ថា សម្រាប់ការត្រៀមធ្វើចត្តាឡីស័កចំពោះកម្មករ-កម្មការិនីគឺមាន១- ខណ្ឌពោធិ៍សែនជ័យចំនួនប្រមាណ ៧២៥៨ នាក់, ខណ្ឌដង្កោ ប្រមាណ២៣៤១ នាក់, ខណ្ឌកំបូល ប្រមាណ១២៥១ នាក់, ខណ្ឌមានជ័យប្រមាណ ២១១៦ នាក់, ខណ្ឌសែនសុខ ប្រមាណ១០៦៨នាក់, ខណ្ឌព្រែកព្នៅ ប្រមាណ ៧៦ នាក់, ខណ្ឌច្បារអំពៅ ប្រមាណ ៨៧ នាក់, ខណ្ឌឬស្សីកែវប្រមាណ ១៣០២ នាក់, ខណ្ឌទួលគោក ប្រមាណ៧១នាក់, ខណ្ឌចំការមនប្រមាណ៩៥នាក់, ខណ្ឌដូនពេញប្រមាណ ២ នាក់ និងខណ្ឌជ្រោយចង្វារប្រមាណ ៦០ នាក់។ នេះបើយោងតាមឯកសារទទួលបាន ។
ប្រភពដដែលបានបញ្ជាក់ថា «ដើម្បីទប់ស្កាត់នូវការរីករាលដាលនៃជំងឺកូវីដ-១៩ តម្រូវឲ្យកម្មករ កម្មការិនី ដែលត្រឡប់មកពីបណ្តាខេត្តចូលមករាជធានីភ្នំពេញត្រូវធ្វើចត្តាឡីស័ករយៈពេល ១៤ ថ្ងៃ» ។ ដើម្បីសហការជាមួយក្រសួងការងារ និងបណ្តុះបណ្តាលវិជ្ជាជីវៈ និងក្រសួងសុខាភិបាល ក្នុងការធ្វើចត្តាឡីស័ក រដ្ឋបាលរាជធានីភ្នំពេញបានត្រៀមសាលារៀនចំនួន ៣៧ខ្នងស្មើនឹង ៦៩៩ បន្ទប់សម្រាប់អនុវត្តវិធាននេះ ។
ជាមួយគ្នានោះផងដែរ លោក កាំង ម៉ូលីកា អគ្គលេខាធិការរងសមាគមកាត់ដេរនៅកម្ពុជា ហៅកាត់ថា (GMAC) បានបង្ហោះសារលើហ្វេសប៊ុករបស់លោកដោយបានកោតសរសើរដល់បងប្អូនកម្មករផ្សេងទៀតដែលបន្តធ្វើការជាធម្មតាពេលបុណ្យចូលឆ្នាំខ្មែរ ដោយលោកបាននិយាយថា « គេដែលនៅធ្វើការ បន្តិចទៀតគេបានឈប់៥ថ្ងៃវិញហើយ» ។
បន្ថែមពីលើនេះ លោកបានចោទជាសំណួរថា «ចូលរួមសហការទេ ពេលនេះនាំគេឯងរវល់ពេញភូមិហើយ ឯណាលុយសម្រាប់ បាយ ទឹក កន្ទេល ខ្នើយ មុង ភួយ និងសម្ភារៈ បរិក្ខាពេទ្យ? អ្នកណាខ្លះត្រូវចូលរួមរៀបចំភស្តុភារ (logistics) អោយ? បាត់ប្រាក់ខែ បាត់ចំណូលទៀត ហ៊ឹម! រង់ចាំសេចក្តីណែនាំបន្ថែមទៀតពីក្រសួងការងារ» ។
ដោយឡែក ឯកឧត្តម ហេង សួរ អ្នកនាំពាក្យក្រសួងការងារមិនអាចទាក់ទងបានទេនារសៀលនេះ ជុំវិញករណីការវិលត្រឡប់មកវិញរបស់កម្មកររោងចក្រដែលត្រូវដាក់ដាច់ដោយឡែក១៤ ថ្ងៃ ៕
ចែករំលែកព័តមាននេះ