រាជធានីភ្នំពេញ ៖ កាលពីថ្ងៃទី១៥ ខែមេសា ឆ្នាំ២០២០ មកនេះ ក្រុមហ៊ុន ខ្មែរ ប៊ែវើរីជីស ដែលជាក្រុមហ៊ុនបុត្រសម្ព័ន្ធមួយរបស់ក្រុមហ៊ុន ជីប ម៉ុង បានឧបត្ថម្ភទឹកបរិសុទ្ធកម្ពុជា និងទឹកផ្លែឈើជូប សរុបជាង ២៥០០កេស ដល់សមត្ថកិច្ចដែលកំពុងប្រចាំការតាមរនាំងបិទផ្លូវឆ្លងព្រំប្រទល់ខេត្ត-ក្រុងនានាទាំងអស់ ។
ខ្មែរ ប៊ែវើរីជីស បានឧបត្ថម្ភក្នុងមួយទីតាំងនូវទឹកបរិសុទ្ធចំនួន ១០កេស ទឹកផ្លែឈើជូប ១០កេស និងឆត្រពីរផងដែរ ។
លោកស្រី គង់ កុសល នាយិការទីផ្សារក្រុមហ៊ុន ខ្មែរ ប៊ែវើរីជីស បានឱ្យដឹងថា៖ «ការឧបត្ថម្ភទឹកបរិសុទ្ធ និងភេសជ្ជៈលើកនេះ គឺជាការចូលរួមបន្ថែមទៀតក្រៅពីការចូលរួមជាថវិកា និង ផលិតផល ដែលក្រុមហ៊ុន ជីប ម៉ុង បានបរិច្ចាគជូនរដ្ឋាភិបាល ដើម្បីប្រើប្រាស់ក្នុងការប្រយុទ្ធប្រឆាំងនឹងមេរោគកូវីដ១៩» ។
ក្នុងឆ្នាំ២០២០ នេះ ក្រុមហ៊ុន ខ្មែរ ប៊ែវើរីជីស បានឧបត្ថម្ភទឹកបរិសុទ្ធកម្ពុជា ៣៣០០០កេសជូនដល់មន្ទីរពេទ្យចំនួន ៥ រួមមាន៖ មន្ទីរពេទ្យមិត្តភាពកម្ពុជា-ចិន, ព្រះកុសមៈ, មន្ទីរពេទ្យគន្ធបុប្ផា, មន្ទីរពេទ្យកាល់ម៉ែត, មន្ទីរពេទ្យកុមារជាតិ និងមន្ទីរពេទ្យមិត្តភាពខ្មែរ-សូវៀត ។ បន្ថែមពីនេះ ក៏បានជូនទឹកបរិសុទ្ធ ៣ពាន់កេស និងថវិកា ៥០ម៉ឺនដុល្លារ ដល់ក្រសួងសុខាភិបាល និង ៥០ម៉ឺនដុល្លារផ្សេងទៀតដល់កាកបាទក្រហមកម្ពុជា ។
ខ្មែរ ប៊ែវើរីជីស ជាក្រុមហ៊ុនផលិតស្រាបៀរ កម្ពុជា ភេសជ្ជៈប៉ូវកម្លាំងវើក WURKZ ទឹកក្រូចអាយស៍ IZE ទឹកបរិសុទ្ធកម្ពុជា ស្រាបៀរអ៊ិចស្ត្រាស្តោត Barrley Black និងស្រាបៀរ គូដូ ជាដើម៕ ដោយសហការ (កែសម្រួលដោយ ៖ បុប្ផា)
ចែករំលែកព័តមាននេះ