ប្រទេសសិង្ហបូរី បានមានវិធានាការកាន់តែក្តៅ ដើម្បីទប់ស្កាត់ការរាលដាលមេរោគកូវីដ១៩ដោយចេញច្បាប់អាចដាក់គុករហូតដល់៦ខែ ចំពោះអ្នកដែលមិនរក្សាគម្លាតសង្គម ។
ចំណែកអ្នកអត់ពាក់ម៉ាសវិញនឹងត្រូវផាក៣០០ដុល្លារសាំងហ្គាពួរ ។ យោងតាមច្បាប់ដែលកោះសន្តិភាពទទួលបានពីវេបសាយក្រសួងសុខាភិបាលសាំងហ្គាពួរបានអោយដឹងថា អ្នកដែលមិនគោរពតាមការរក្សាគម្លាតយ៉ាងតិចមួយម៉ែត្រពីគ្នានឹងត្រូវផាកលុយចំនួន១ម៉ឺនដុល្លារសាំងហ្គាពួរ ហើយអាចប្រឈមមុខនឹងការដាក់ពន្ធនាគាររហូតដល់៦ខែ ។
ទន្ទឹមជាមួយគ្នានេះ អ្នករស់នៅសិង្ហបូរីទាំងអស់ រួមទាំងជនបរទេសផងតម្រូវអោយពាក់ម៉ាសគ្រប់ពេលចេញមកខាងក្រៅ ។ នរណាហ៊ានលើ្មសនឹងផាកពិន័យ ជាលុយ ៣០០ដុល្លារសាំងហ្គាពួរ ។
សារព័ត៌មាន Straits Times រាយការណ៍ថា សិង្ហបូរីចាត់វិធានការខ្លាំងបែបនេះ ដោយសារតែមានអ្នកល្មើសច្រើននឹងការអំពាវនាវ ។ ដូច្នេះនឹងលែងមានការអំពាវនាវទៀតហើយ ។ អ្នកធ្វើខុសត្រូវតែផាកពិន័យ ។
សិង្ហបូរីមានអ្នកជំងឺកូវីដ១៩ សរុប៣២៥២នាក់ គិតត្រឹមថ្ងៃទី១៤ ខែមេសា បន្ទាប់ពីបានរកឃើញករណីថ្មីរហូតដល់៣៣៤ករណី ដោយឆ្លងក្នុងប្រទេសតែម្តង ។
ក្រសួងសុខាភិបាលសិង្ហបូរីបានអោយដឹងថា បច្ចុប្បន្នមានអ្នកជំងឺចំនួន១៣១៥ កំពុងសម្រាកព្យាបាលក្នុងមន្ទីរពេទ្យដោយក្នុងនោះអ្នកស្ថិតក្នុងស្ថានភាពធ្ងន់មានចំនួន២៨ករណី ។
ចំណែកអ្នកចេញពីមន្ទីរពេទ្យ ហើយស្ថិតនៅក្នុងការដាក់នៅដោយឡែក ដើម្បីបន្តតាមដានទៀតមានចំនួន១៣១៥ករណី ។ ចំណែក៦១១នាក់ទៀតបានចេញពីមន្ទីរពេទ្យ និងវិលត្រឡប់ទៅផ្ទះវិញ៕
ចែករំលែកព័តមាននេះ