ខេត្តរតនគិរី ៖ បើតាមសេចក្តីរាយការណ៍បានឱ្យដឹងថា បុរសម្នាក់ឡើងដើមឈើដ៏ធំមួយ ដើម្បីយកឃ្មុំ ស្រាប់តែរអិលរបូតដៃជើងធ្លាក់មកដី បណ្តាលបាក់.កបាត់បង់ជីវិតភ្លាមៗនៅនឹងកន្លែងកើតហេតុតែម្តងនៅក្នុងព្រៃជ្រៅឆ្ងាយពីផ្ទះ បង្កឱ្យមានការភ្ញាក់ផ្អើលកាលពីម៉ោង៨និង៣០នាទីព្រឹក ថ្ងៃទី១៣ ខែមេសា ឆ្នាំ២០២០ នៅត្រង់ចំណុចព្រៃអូររ៉ាពឿង ស្ថិតក្នុងភូមិអុល ឃុំបាតាង ស្រុកលំផាត់ ។
សេចក្តីរាយការណ៍បន្តថា ជនរងគ្រោះខាងលើមានឈ្មោះ ការ ផ្វា ភេទប្រុស អាយុ២២ឆ្នាំជនជាតិទំពួន មុខរបរកសិករ មានទីលំនៅភូមិ-ឃុំកើតហេតុខាងលើ ។ រីឯបុរសម្នាក់ទៀត ជាអ្នករួមដំណើរមិនទាន់បានស្គាល់អត្តសញ្ញាណនៅឡើយនោះទេ ។
បើតាមប្រភពពីសមត្ថកិច្ចបានឱ្យដឹងថា មុនពេលកើតហេតុ ជនរងគ្រោះ និងអ្នករួមដំណើរម្នាក់ទៀតបានដើរចូលទៅក្នុងព្រៃជ្រៅ ដើម្បីរកឃ្មុំដែលមានចម្ងាយឆ្ងាយពីភូមិប្រហែលជាង៣គីឡូម៉ែត្រ លុះដើរទៅដល់កណ្តាលព្រៃជ្រៅ ក៏បានឃើញឃ្មុំមួយសម្បុកនៅលើមែកដើមផ្ឌៀកយ៉ាងធំមួយដើមដែលមានកម្ពស់ជាង១០ម៉ែត្រ ។
សមត្ថកិច្ចបន្តថា ស្របពេលនោះបុរសម្នាក់ជាជនរងគ្រោះក៏បានវ៉ៃបង្អោងឡើងទៅយកឃ្មុំ ឯបុរសម្នាក់ទៀតនៅចាំខាងក្រោម ។ លុះពេលនោះជនរងគ្រោះបានឡើងដល់ពាក់កណ្តាលដើម ស្រាប់តែជនរងគ្រោះរអិលរបូតដៃជើងធ្លាក់ចុះមកដី បណ្តាលឱ្យបាក់.កបាត់បង់ជីវិតភ្លាមៗនៅនឹងកន្លែងកើតហេតុនោះតែម្តង។
ក្រោយពេលកើតហេតុភ្លាមៗ កម្លាំងជំនាញនៃអធិការដ្ឋាននគរបាលស្រុកលំផាត់ បាន សហការជាមួយកម្លាំងប៉ុស្តិ៍រដ្ឋបាលឃុំបាតាង ចុះទៅធ្វើការត្រួតពិនិត្យ និងធ្វើកោសល្យវិច័យលើសពជនរងគ្រោះ ហើយបានសន្និដ្ឋានថា ជនរងគ្រោះពិតជាបានបាត់បង់ជីវិតដោយសាររអិលដៃធ្លាក់ពីដើមឈើប្រាកដមែន ។ ក្រោយពីធ្វើកំណត់ហេតុរួច សមត្ថកិច្ចក៏បានប្រគល់សពជនរងគ្រោះឱ្យសាច់ញាតិយកទៅធ្វើបុណ្យតាមប្រពៃណីផងដែរ៕ (កែសម្រួលដោយ ៖ បុប្ផា)
ចែករំលែកព័តមាននេះ