រាជធានីភ្នំពេញ ៖ ក្នុងន័យទប់ស្កាត់ការចម្លងវីរុសកូវីដ-១៩ ឲ្យកាន់តែមានប្រសិទ្ធភាព រាជរដ្ឋាភិបាលបានសម្រេចឈានដល់ការបិទសាលារៀន និងអាជីវកម្ម KTV ម៉ាស្សា ក្លឹបហាត់ប្រាណ ជាដើម…
រាជធានីភ្នំពេញ ៖ ក្នុងន័យទប់ស្កាត់ការចម្លងវីរុសកូវីដ-១៩ ឲ្យកាន់តែមានប្រសិទ្ធភាព រាជរដ្ឋាភិបាលបានសម្រេចឈានដល់ការបិទសាលារៀន និងអាជីវកម្ម KTV ម៉ាស្សា ក្លឹបហាត់ប្រាណ ជាដើម ក៏ប៉ុន្តែទន្ទឹមនឹងនោះគេសង្កេតឃើញថាប្រភេទកីឡា វាយគោល (Golf Course) គឺនៅដំណើរការធម្មតា ។
ឆ្លើយតបទៅនឹងសំណួរថា តើមូលហេតុអ្វីបានជាតារាងវាយកូនគោលនៅបន្តអាជីវកម្មបានធម្មតា ខណៈមានការព្រួយបារម្ភពីការចម្លងវីរុសកូវីដ-១៩ នោះ លោក សុខ វណ្ណា ប្រធាននាយកដ្ឋានគ្រប់គ្រងសេវាកម្សាន្តនិងកីឡាទេសចរណ៍ របស់ក្រសួងទេសចរណ៍បានមានប្រសាសន៍បញ្ជាក់ថា បើទោះបីជាអាជីវកម្មវាយកូនគោលនៅដំណើរការធម្មតាក៏ពិតមែន តែក្រសួងបានចាត់វិធានការការពារយ៉ាងម៉ឹងម៉ាត់ផងដែរ ។
លោក សុខ វណ្ណា បានមានប្រសាសន៍បញ្ជាក់ពីមូលហេតុយ៉ាងដូច្នេះថា «ក្លឹបហាត់ប្រាណនៅរួមគ្នា ជុំគ្នាច្រើន ដោយឡែកកន្លែងវាយកូនគោលរបស់យើងគឺ បិរវេណទីលានធំទូលាយ ។ ហើយយើងឃើញហើយអ្នកដែលគាត់លេងវាយកូនគោល គឺគាត់ដើរឃ្លាតឆ្ងាយៗគ្នា ហើយគាត់វាយម្នាក់ម្តង ។ ហើយម្យ៉ាងទៀត យើងអត់ឲ្យមានលក្ខណៈជាការប្រមូលផ្តុំទេ ។ យើងឲ្យលេងយ៉ាងច្រើន មួយក្រុម ៤នាក់ ប៉ុន្តែការដែលលេងវាយកូនគោល គឺអត់ជុំគ្នាទេ មួយលេងនៅចម្ងាយ ១០ ២០ ឬ ៥០ ម៉ែត្រ ឬ ១០០ មែ់ត្រពីគ្នា ។ ហើយមានតែបុគ្គលិកម្នាក់រើសកូនហ្គោល ដាក់ឲ្យភ្ញៀវគាត់វ៉ៃ ។ សូម្បីនៅក្នុងសេចក្តីណែនាំ ក៏យើងអត់មានឲ្យរៀបចំប្រកួតដែរ» ។
លោកបានបន្តថា ការលេងវាយកីឡាវាយហ្គោល មានការជួបជុំ លុះត្រាតែមានព្រឹត្តិ
ការណ៍ប្រកួតពានរង្វាន់រកកីឡាករលេខ ១ ជាឧទាហរណ៍ អញ្ចឹងយើងហាមអត់ឲ្យមានអាហ្នឹងទេ ។ លោកបានបន្តថា ការលេងវាយកូនគោល គឺពេលខ្លះគាត់ម្នាក់ឯង ហើយត្រង់នេះក៏វាចូលក្នុងន័យចូលរួមការរក្សាគម្លាតសុវត្ថិភាពកូវីដ-១៩ ហ្នឹងដែរ ។ ហើយកីឡានេះទៀតសោតគឺមិនមែននៅក្នុងម្លប់ទេ គឺកីឡានេះ លេងហាលថ្ងៃ ។
សូមរម្លឹកថា ថ្មីៗនេះក្រសួងទេសចរណ៍បានចេញសេចក្តីណែនាំមួយស្តីអំពីវិធានការការពារការចម្លងវីរុសកូវីដ-១៩ សម្រាប់អាជីវកម្មទីលានវាយកូនគោល (Gold Course) ដោយបានណែនាំចំពោះអ្នកគ្រប់គ្រង បុគ្គលិកបម្រើការងារនិងកីឡាករ កីឡាការិនីវាយកូនគោល ត្រូវអនុវត្ត៖ ១- មិនត្រូវរៀបចំឲ្យមានជាព្រឹត្តិការណ៍ ឬការប្រកួតដណ្តើពានរង្វាន់កីឡាវាយកូនគោលឡើយ, ២- ត្រូវមានកន្លែងសមរម្យដើម្បីពិនិត្យកម្តៅបុគ្គលិកបម្រើការងារនិងកីឡាករ កីឡាការិនីវាយកូនគោលមុនអនុញ្ញាតឲ្យចូលលេង, ៣- តម្រូវឲ្យឡានកូនគោល (Gold cart) មួយសម្រាប់ភ្ញៀវលេងម្នាក់ និងបុគ្គលិក (Caddy) ម្នាក់ឈរខាងក្រោយ ជាដើម។
ជាមួយគ្នានោះក្រសួងទេសចរណ៍ក៏បានបញ្ជាក់ថា «មិនអនុញ្ញាតឲ្យលេងលើសពី ៤ នាក់ ក្នុង១ក្រុម និងអាចយកបុគ្គលិក (Caddy) តែម្នាក់ប៉ុណ្ណោះសម្រាប់កីឡាករ កីឡាការិនីម្នាក់ និងមិនអាចប្រើប្រាស់ ឬប៉ះពាល់ឧបករណ៍សម្ភារៈក្រៅពីរបស់ផ្ទាល់ខ្លួនឡើយ» ។
លោក សុខ វណ្ណា ក៏បានឲ្យដឹងផងដែរថានៅកម្ពុជាគឺមានតារាងវាយកូនគោលសរុប ១០ កន្លែង ដែលតម្រូវឲ្យអនុវត្តដូចគ្នាទាំងអស់ដើម្បីទប់ស្កាត់ការឆ្លងវីរុសកូវីដ-១៩ ដែលតារាងវាយកូនគោលមានភ្នំពេញ ៣ ទៅ ៤ កន្លែង វឌ្ឍនៈកោះក្របី Grand ភ្នំពេញ កប់ស្រូវ នៅខេត្តសៀមរាប ខេត្តកំពង់ស្ពឺ និងតារាងកោះកុង ដែលជាតំបន់ដាច់ឆ្ងាយផុតៗ អត់មានលក្ខណៈប្រមូលផ្តុំទេ ។
អញ្ចឹងបានន័យថាវាស្របតាមលក្ខខណ្ឌ ព្រោះកូវីដ-១៩ គឺមិនឲ្យមានការប្រមូលផ្តុំហើយត្រូវនៅដាច់ដោយឡែក សូម្បីតែបរិវេណតារាងវាយកូនគោលក៏ឆ្ងាយពីគ្នាដែរ ខណៈកន្លងម៉ាស្សាអីគឺនៅក្នុងបន្ទប់ គ្រែជិតគ្នាអី និងក្លឹបហាត់ប្រាណជាទូទៅជាកន្លែងប្រមួលផ្តុំមនុស្ស ៕
ចែករំលែកព័តមាននេះ