ខេត្តព្រះវិហារ ៖ ព្រះមេគណៈខេត្តព្រះវិហារមានសង្ឃដីកាថា នៅទីវត្តអារាមនានាក្នុងខេត្តព្រះវិហារបានលុបចោលពិធីរាប់បាត្រ និងពូនភ្នំខ្សាច់ក្នុងរដូវចូលឆ្នាំខ្មែរឆ្នាំនេះ ដើម្បីទប់ស្កាត់ការរីករាលដាលនៃជំងឺកូវីដ១៩ ។ ប៉ុន្តែមិនសូវជាមានច្រើននោះទេ ដោយឃើញពុទ្ធបរិស័ទមួយចំនួនបានយកទេយ្យទាន ឬចង្ហាន់…
ខេត្តព្រះវិហារ ៖ ព្រះមេគណៈខេត្តព្រះវិហារមានសង្ឃដីកាថា នៅទីវត្តអារាមនានាក្នុងខេត្តព្រះវិហារបានលុបចោលពិធីរាប់បាត្រ និងពូនភ្នំខ្សាច់ក្នុងរដូវចូលឆ្នាំខ្មែរឆ្នាំនេះ ដើម្បីទប់ស្កាត់ការរីករាលដាលនៃជំងឺ
កូវីដ១៩ ។ ប៉ុន្តែមិនសូវជាមានច្រើននោះទេ ដោយឃើញពុទ្ធបរិស័ទមួយចំនួនបានយកទេយ្យទាន ឬចង្ហាន់ មកប្រគេនព្រះសង្ឃជាធម្មតា តែក៏មានការប្រុងប្រយ័ត្ដផងដែរ ។
តាមការសង្កេតឃើញក្នុងឱកាសបុណ្យចូលឆ្នាំថ្មីប្រពៃណីជាតិខ្មែរឆ្នាំ២០២០នេះ ប្រជាពលរដ្ឋនៅខេត្តព្រះវិហារបានចូលរួមគោរពតាមបទបញ្ជា និងស្តាប់ការណែនាំរបស់រដ្ឋាភិបាលកម្ពុជា ក្នុងការផ្អាកមិនអោយមានការជួបជុំគ្នា និងការធ្វើដំណើរឆ្លងខេត្ត ពីខេត្តមួយទៅខេត្តមួយ ដើម្បីទប់ស្កាត់ការឆ្លងរីករាលដាលនៃវីរុសកូវីដ១៩ តែអនុញ្ញាតឱ្យប្រជាជនខ្មែរធ្វើពិធីទទួលទេវតាឆ្នាំថ្មីនៅតាមផ្ទះរៀងៗខ្លួន ដោយឡែក មន្ត្រីរាជការ បុគ្គលិកឯកជនបម្រើការងារជាធម្មតា ។
ទោះជាបែបនេះក្តី ពលរដ្ឋជនខ្មែរនៅតែគោរពប្រណិប័តន៍នូវទំនៀមទម្លាប់ប្រពៃណី បន្ទាប់ពីទទួលទេវតាឆ្នាំថ្មីរួច ក៏បានធ្វើចង្ហាន់ នឹងនាំយកទ័យទានទៅប្រគេនព្រះសង្ឃជាធម្មតា ។ ហើយអ្វីដែលកត់សម្គាល់នោះ ពុទ្ធបរិស័ទដែលបានទៅវត្តអារ៉ាម មានការប្រុងប្រយ័ត្ន នឹងពាក់ម៉ាស ឬរបាំងមុខរៀងៗខ្លួន ដើម្បីការពារការឆ្លងជំងឺកូវីដ១៩ ។
ព្រះតេជគណ ឡុង សុមុន្នី ព្រះមេគណខេត្តព្រះវិហារ និងជាចៅអធិការវត្តប្រាសាទគោកបេង ស្ថិតក្រុងព្រះវិហារ មានសង្ឃដីកាថា ចាប់តាំងពីថ្ងៃទី១ មេសា ឆ្នាំ២០២០ រហូតមកដល់ថ្ងៃបុណ្យចូលឆ្នាំខ្មែរ ឃើញថា ពុទ្ធបរិស័ទនៅក្នុងក្រុងព្រះវិហារ បានមកទីអារាមប្រគេនចង្ហាន់ដល់ព្រះសង្ឃជាធម្មតា តែឃើញពួកគាត់មានការរក្សាអនាម័យរៀងៗខ្លួន ដោយឡែកចំពោះព្រះសង្ឃ និងអាចារ្យ យាយជី ក៏បានពាក់ម៉ាស ឬរបាំងមុខដូចគ្នាដែរ ។
លើសពីនេះទៅទៀត ដើម្បីរួមចំណែកទប់ស្កាត់ នឹងការពារការឆ្លងរីករាលដាលនៃជម្ងឺកូវីដ១៩នេះ នៅតាមវត្តអារ៉ាមក្នុងខេត្តព្រះវិហារ បានលុបចោលនូវពិធីរាប់បាត និងពូនភ្នំខ្សាច់ជាដើម ។
ចែករំលែកព័តមាននេះ