ហាណូយ ៖ សមាគមប្លាស្ទិកសវៀតណាមបានថ្លែងថា ឧស្សាហកម្មផលិតប្លាស្ទិកក្នុងស្រុកសម្រេចបាននូវកំណើនខ្ពស់នៅក្នុងការនាំចេញ ប៉ុន្តែនៅតែប្រឈមនឹងលំបាកនៃការរើបឡើងវិញពីកង្វះខាតនៃវត្ថុធាតុដើមដដែល ។ កាសែតក្នុងស្រុកបានដកស្រងសម្ដីសមាគមឱ្យដឹងថា ក្នុងត្រីមាសទី៣ឆ្នាំនេះឧស្សាហកម្មផលិតប្លាស្ទិករបស់វៀតណាមសម្រេចបាននូវកំណើន១៧,៩%ពីមួយឆ្នាំទៅមួយឆ្នាំ ក្នុងនោះតម្លៃទឹកប្រាក់នាំចេញសរុបនៃផលិតផលប្លាស្ទិកមានចំនួន២ពាន់លានដុល្លារ ។
នៅក្នុងអំឡុងពេលនោះដែរតម្លៃទឹកប្រាក់នាំចេញបានបង្ហាញឱ្យឃើញពីកំណើនខ្លាំងក្លា៧៨,២៨%ពីមួយឆ្នាំទៅមួយឆ្នាំ ចំពោះទីផ្សារប្រទេសមីយ៉ាន់ម៉ា៦៩,១៩% ទីផ្សារប៊ែលហ្សិក និង៦៧,៧៣% សម្រាប់ទីផ្សារស៊ុយអែត ។ លោក Ho Duc Lam ប្រធានសមាគមប្លាស្ទិកវៀតណាមបានបញ្ជាក់ថា នៅក្នុងអំឡុងត្រីមាសទី៣ ប្រទេសជប៉ុនជាទីផ្សារនាំចេញធំជាងគេបំផុតសម្រាប់
ផលិតផលប្លាស្ទិកវៀតណាម ។ ក្នុងនោះតម្លៃទឹកប្រាក់នាំចេញមានចំនួន២៤,៧៩%នៃការនាំចេញសរុប ។ សមាគមមានក្ដីរំពឹងថា តម្លៃទឹកប្រាក់នាំចេញនឹងកើនឡើង១៣%សម្រាប់ឆ្នាំនេះ ។ រីឯសហរដ្ឋអាមេរិកគឺជាទីផ្សារធំបំផុតទី២ ដែលតំណាងឱ្យ១២,៦៥%នៃបរិមាណទឹកប្រាក់នាំចេញសរុប ។
ទោះជាយ៉ាងណាដើម្បីសម្រេចបាននូវការអភិវឌ្ឍដែលអាចជួយទ្រទ្រង់បាននៅថ្ងៃអនាគតលោកLam បានស្នើផលិតករប្លាស្ទិកក្នុងស្រុកឱ្យផលិតវត្ថុធាតុដើមសម្រាប់ធ្វើប្លាស្ទិកចំពោះផលិតផលនាំចេញមិនប៉ះពាល់ដល់បរិស្ថានជាមួយនឹងការបន្ថែមតម្លៃខ្ពស់ដើម្បីទទួលបាននូវស្ដង់ដាសុវត្ថិភាពនិងសុខភាពអន្តរជាតិ គួបផ្សំនឹងការធ្វើឱ្យប្រសើរឡើងនូវបច្ចេកវិទ្យាផលិតកម្មរបស់ពួកគេផងដែរ ៕
ចែករំលែកព័តមាននេះ