ខេត្តសៀមរាប ៖ បើតាមសេចក្តីរាយការណ៍បានឱ្យដឹងថា ជនសង្ស័យម្នាក់ដែលមានជំនាញខាងលេងកាំបិតប៉័ងតោ បានកាប់ទៅលើជនរងគ្រោះចំនួន៣នាក់ក្នុងករណី៣ផ្សេងគ្នានៅក្រុងសៀមរាប ហើយគេចខ្លួនបាត់មួយរយៈ លុះចូលស្រុកវិញ ក៏ត្រូវប៉ូលិសឃាត់ខ្លួនបាននៅនឹងផ្ទះតែម្តង។ ការចាប់ខ្លួននេះបានធ្វើឡើងកាលពីម៉ោង៦ល្ងាច ថ្ងៃទី១១ ខែមេសា ឆ្នាំ២០២០ នៅចំណុចផ្លូវបំបែកជាបួន ស្ថិតក្នុងភូមិត្រពាំងសេះ សង្កាត់គោកចក។
សេចក្តីរាយការណ៍បន្តថា ជនសង្ស័យខាងលើ ឈ្មោះ នុត សុកេត ហៅឡេវ ភេទប្រុស អាយុ២៩ឆ្នាំ ស្នាក់នៅភូមិក្រវ៉ាន់ ឃុំរំចេក ស្រុកបន្ទាយស្រី ខេត្តសៀមរាប។
បើតាមប្រភពពីសមត្ថកិច្ចនគរបាលខេត្តបានប្រាប់នៅល្ងាចថ្ងៃទី១៣ មេសានោះថា ការឃាត់ខ្លួនជនសង្ស័យប្រើកាំបិតប៉័ងតោ កាប់លើជនរងគ្រោះចំនួន៣នាក់ ក្នុងករណី៣ផ្សេងគ្នាក្នុងក្រុងសៀមរាបកន្លងមកនោះ ពេលនេះត្រូវបានសមត្ថកិច្ចបង្ក្រាបបានហើយ។
ប្រភពដដែលបន្តថា ដោយករណីទី១- កើតហេតុថ្ងៃទី៥ ខែមេសា វេលាម៉ោង១២រសៀល នៅចំណុចមុខបន្ទាយអាវុធហត្ថចាស់ ក្នុងភូមិត្រពាំងសេះ សង្កាត់គោកចក ខេត្តសៀមរាប ដែលជនសង្ស័យបានកាប់ទៅលើជនរងគ្រោះឈ្មោះ ឆាន់ ដារ៉ូ ភេទប្រុស អាយុ២៥ឆ្នាំ រស់នៅភូមិទក្សិណខាងត្បូង សង្កាត់គោកចក (របួសត្រង់ស្លាប្រចៀវឆ្វេង)។
ករណីទី២- កើតឡើងថ្ងៃទី០៩ ខែមេសា ឆ្នាំ២០២០ វេលាម៉ោង៦និង១០នាទីល្ងាច នៅតាមបណ្តោយផ្លូវ៦០ម៉ែត្រ នៅភូមិចុងកៅស៊ូ សង្កាត់ស្លក្រាម ជនសង្ស័យបានកាប់ទៅលើជនរងគ្រោះឈ្មោះ ទុយ ហ៊ាន ភេទប្រុស អាយុ៣៣ឆ្នាំ រស់នៅភូមិវត្តបូព៌ សង្កាត់សាលាកំរើក (រងរបួសត្រង់ស្លាប ប្រចៀវខាងឆ្វេង)។
រីឯករណីទី៣-កើតហេតុថ្ងៃទី១១ ខែមេសា ឆ្នាំ២០២០ វេលាម៉ោង៤ល្ងាច ស្ថិតនៅមុខចំណតរថយន្តប្រាសាទអង្គរ ក្នុងភូមិត្រពាំងសេះ សង្កាត់គោកចក ជនសង្ស័យបានកាប់ទៅលើជនរងគ្រោះឈ្មោះ ឃឹម សុឃីម ភេទប្រុស អាយុ២៣ឆ្នាំរស់នៅភូមិខ្វៀន សង្កាត់គោកចក ( របួសត្រង់ខ្នង)។ ប៉ុន្តែជនរងគ្រោះទាំង៣នាក់នោះកំពុងសម្រាកព្យាបាលនៅក្នុងមន្ទីរពេទ្យបង្អែកខេត្តសៀមរាប រហូតមកដល់ថ្ងៃទី១៤ ខែមេសា ឆ្នាំ២០២០នេះ។
ក្រោយពីមានកើតហេតុការណ៍រួច ជនសង្ស័យបានរត់គេចខ្លួនបាត់បានមួយរយៈ ក៏ត្រូវសមត្ថកិច្ចធ្វើការស្រាវជ្រាវរហូតឈានដល់ឃាត់ខ្លួនបាននាថ្ងៃទី១១ ខែមេសា វេលាម៉ោង៦ល្ងាច ស្ថិតនៅចំណុចផ្លូវបំបែកជាបួនមុខអង្គរ ក្នុងភូមិត្រពាំងសេះ ហើយប្រតិបត្តិការនេះដឹកនាំដោយលោកនាយប៉ុស្តិ៍នគរបាលរដ្ឋបាលគោកចក។ បន្ទាប់ពីឃាត់ខ្លួនជនសង្ស័យបាន កម្លាំងជំនាញក៏បានធ្វើការដកហូតវត្ថុតាងមួយចំនួនរួមមាន ៖ កាំបិតប៉័ងតោ១ដើម និងម៉ូតូ១គ្រឿងម៉ាកឌ្រីម ១២៥ ពណ៌ខ្មៅ សេរី២០០៥។
ប្រភពដដែលបញ្ជាក់ថា ក្រោយពីសមត្ថកិច្ចធ្វើការសាកសួរ ជនសង្ស័យរូបនេះបានសារភាពថា ករណីទាំង៣ខាងលើ គឺខ្លួនពិតជាអ្នកប្រព្រឹត្តពិតប្រាកដមែន ដោយសារតែខឹងជនរងគ្រោះមើលមុខ និងជេរមកលើខ្លួន ប៉ុន្តែខ្លួននឹងជនរងគ្រោះពុំដែលធ្លាប់ស្គាល់គ្នា ឬមានគំនុំនឹងគ្នាកាលពីមុនមកនោះទេ។
បច្ចុប្បន្នជនសង្ស័យ និងវត្ថុតាង ត្រូវបានកម្លាំងជំនាញរៀបចំកសាងសំណុំរឿងបញ្ជូនទៅតុលាការ ដើម្បីដាក់ទោសទៅតាមនីតិវិធីនៃច្បាប់ព្រហ្មទណ្ឌ៕ (កែសម្រួលដោយ ៖ បុប្ផា)
ចែករំលែកព័តមាននេះ