រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា សម្រាប់ឆ្នាំ២០២០នេះ ផែនការកីឡាជាច្រើនត្រូវបានស្ថិតក្នុងភាពស្រពិចស្រពិល ដោយសារតែការរាតត្បាតនៃមេរោគកូវីដ១៩។ លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា…
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា សម្រាប់ឆ្នាំ២០២០នេះ ផែនការកីឡាជាច្រើនត្រូវបានស្ថិតក្នុងភាពស្រពិចស្រពិល ដោយសារតែការរាតត្បាតនៃមេរោគកូវីដ១៩។
លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា មានប្រសាសន៍ថា ផែនការចេញទៅហ្វឹកហាត់នៅក្រៅប្រទេស ការអញ្ជើញគ្រូបរទេសឲ្យមកបង្ហាត់នៅក្នុងស្រុក ការចេញទៅប្រកួតនៅក្រៅប្រទេស និងក្នុងប្រទេសសុទ្ធតែត្រូវផ្អាកទាំងអស់ ។
លោកបន្តថា សូម្បីតែវគ្គសាមគ្គីអូឡាំពិកដែលមួយឆ្នាំៗ កម្ពុជាតែងតែបានទទួលពីអង្គការសាមគ្គីអូឡាំពិកអន្តរជាតិនោះក៏ត្រូវផ្អាកដែរ សិក្ខាសាលា និងបណ្ដាវគ្គបណ្ដុះបណ្ដាលនានាទាំងក្នុង និងទាំងក្រៅប្រទេសក៏សុទ្ធតែត្រូវផ្អាក ។
ព្រឹត្តិការណ៍កីឡាជាច្រើនទៀត ទោះបីគេព្យាយាមប្រើពាក្យថា លើកពេលក៏ពិតមែន តែព្រឹត្តិការណ៍ទាំងនោះ ទំនងជារសាត់បាត់ទៅជាមួយនឹងពេលវេលាទៅហើយ ។ ព្រឹត្តិការណ៍ទាំងនោះ នឹងរៀបចំធ្វើឡើងវិញបន្ទាប់ពីមេរោគកូវីដ១៩ រសាត់បាត់ពីផែនដីនេះទៅ។
លោក អ៊ុក សិទ្ធិជាតិ អគ្គនាយកនៃអគ្គនាយកដ្ឋានកីឡាបានលើកឡើងដែរថា សូម្បីតែព្រឹត្តិការណ៍ប្រកួតកីឡាជាតិលើកទី៣ ព្រឹត្តិការណ៍ប្រកួតជម្រុះនៃបាល់ទាត់ពិភពលោកក៏ត្រូវលើកពេលដែរ ។ ទាំងនេះមិនមែនជា បញ្ហាតែកម្ពុជាម្នាក់ឯងឡើយ តែជាបញ្ហាដែលពិភពលោកទាំងមូលកំពុងតែជួបប្រទះ ៕ (កែសម្រួលដោយ ៖ បុប្ផា)
ចែករំលែកព័តមាននេះ