ព្រោះតែមនុស្សជុំវិញពិភពលោកផ្អាកការធ្វើដំណើរ និងវិស្សមកាលនៅបរទេស វិស័យទេសចរណ៍ស្ទើរតែគ្រប់ប្រទេសកំពុងតែជួបនូវបញ្ហាយ៉ាងធ្ងន់ធ្ងរដែលប៉ះពាល់ដល់ប្រាក់ចំណូលរបស់មនុស្សជាច្រើនដែលមានអាជីវកម្ម ឬការងារក្នុងវិស័យនោះ ។
ប្រសិនបើអ្នកស្ថិតក្នុងចំណោមមនុស្សដែលកូវីដ១៩ កំពុងតែកាត់បន្ថយប្រាក់ចំណូលរបស់អ្នក វាប្រហែលជាដល់ពេលហើយក្នុងការត្រួតពិនិត្យមើលចំណាយនិងចំណូលរបស់អ្នកឡើងវិញដើម្បីរកវិធីសន្សំថវិកាបន្ថែម ។
ខាងក្រោមនេះ គឺជាវិធីងាយៗក្នុងការសន្សំលុយក្នុងកំឡុងពេលដែលពោរពេញទៅដោយភាពមិនប្រាកដប្រជានេះ៖
១. ប្តូរគម្រោងទូរស័ព្ទរបស់អ្នក
ប្រសិនបើអ្នកត្រូវនៅផ្ទះច្រើនជាងមុន តើអ្នកត្រូវការគម្រោងធំៗសម្រាប់ទូរស័ព្ទរបស់អ្នកដែរទេ? ជាក់ស្តែងប្រសិនបើអ្នកមាន Wifi នៅផ្ទះរួចជាស្រេចហើយនោះ អ្នកគួរតែប្តូរគម្រោងទូរស័ព្ទរបស់អ្នកមកកញ្ចប់តូចជាងមុនវិញដើម្បីកាត់បន្ថយការចាយវាយដែលមិនចាំបាច់ ។
២. កាត់បន្ថយការកុម្ម៉ង់អាហារ
ក្រៅពីថ្លៃផ្ទះ និងថ្លៃធ្វើដំណើរហើយ អាហារប្រហែលជាការចំណាយធំជាងគេសម្រាប់មនុស្សស្ទើរតែគ្រប់គ្នា ។ ប៉ុន្តែក្នុងកំឡុងពេលនេះ អ្នកអាចសន្សំថវិកាជាច្រើនពីការទទួលទានអាហារនៅក្រៅញឹកញាប់ ។ យ៉ាងណាក្តី បើអ្នកនៅតែបន្តកម្ម៉ង់អាហារមកផ្ទះជារៀងរាល់ថ្ងៃនោះ វាមិនជួយឲ្យអ្នកសន្សំថវិកាឡើយព្រោះអាហារទាំងនោះភាគច្រើនមានតម្លៃថ្លៃជាងអាហារដែលអ្នកចម្អិនដោយខ្លួនឯង ។
៣. ទិញទំនិញដោយឆ្លាតវៃ
ពេលដែលអ្នកសម្រេចចិត្តទៅទិញអាហារ អ្នកត្រូវតែជ្រើសរើសឲ្យបានល្អនូវអ្វីដែលអ្នកដាក់ចូលក្នុងកន្ត្រក ។ គន្លឹះងាយមួយគឺអ្នកគួរតែគិតឲ្យហើយពីអាហារដែលអ្នកចង់ចម្អិនក្នុងរយៈពេលមួយសប្តាហ៍រួចកត់ត្រានូវគ្រឿងដែលអ្នកត្រូវការដើម្បីចម្អិនអាហារទាំងនោះ ។ ពេលដែលអ្នកទៅទិញទំនិញ អ្នកគួរតែទិញតាមអ្វីដែលអ្នកបានកត់ត្រាទុកជាការស្រេចដើម្បីជៀសវាងទិញអ្វីដែលខ្ជះខ្ជាយ ៕
ចែករំលែកព័តមាននេះ