រាជធានីភ្នំពេញ៖ ការផលិតអំបិលរបស់ប្រជាកសិករក្នុងរយៈពេលពីរឆ្នាំកន្លងទៅជួបបញ្ហា តែមកដល់ឆ្នាំ២០២០នេះ គេសង្កេកឃើញថាអាកាសធាតុបានអំណោយផលដល់ការផលិតរបស់ប្រជាកសិករ។ ជាក់ស្តែងចាប់ពីខែធ្នូ២០១៩រហូតមកដល់ខែមេសា២០២០នេះ ប្រជាកសិករផលិតអំបិលហែល៧ម៉ឺនតោន។ ទន្ទឹមនិងនេះប្រមុខរាជរដ្ឋាភិបាលជំរុញឱ្យប្រជាកសិករខិតខំផលិតអំបិលឱ្យបានច្រើនដើម្បីផ្គង់ផ្គង់តម្រូវការក្នុងស្រុកនៅពេលប្រទេសរងផលប៉ះពាល់ពីកូវីដ-១៩។
លោក ប៊ុន បារាំង ប្រធានសមាគមផលិតអំបិលកំពតនិងកែបបានមានប្រសាសន៍ថា «ចាប់តាំងពីផលិតអំបិលមកឃើញថាអាកាសធាតុអំណោយផលល្អ ជាហេតុធ្វើឱ្យយើងផលិតអំបិលបានច្រើននៅឆ្នាំ២០២០នេះ ។អីចឹងយើងមិនមានការព្រួយបារម្ភសម្រាប់ឆ្នាំខាងមុខនោះទេ។មកពេលនេះអាកាសធាតុអំណោយ ផលល្អ ប្រជាកសិករសម្រុកផលិតអំបិល ហើយនៅពេលជាប់រដូវផលិតនៅខែ៦ខាងមុខនេះយើងនឹងធ្វើការវាស់វែងថាអំបិលវាលើសឬខ្វះ»។
តាមប្រធានសមាគម ប្រជាកសិករចាប់ផ្តើមរៀបចំផលិតអំបិលតាំងពីខែកញ្ញា ហើយប្រមូលផលនៅខែធ្នូឆ្នាំ២០១៩ រហូតមកដល់ខែមេសាឆ្នាំ២០២០នេះប្រជាកសិករផលិតអំបិលបានប្រហែល៦ទៅ៧ម៉ឺនតោន និងបើនៅខែបន្ទាប់អាកាសធាតុនៅតែអំណោយផលនោះប្រជាកសិករនឹងប្រឹងផលិតអំបិលថែមទៀតដើម្បីកាត់បន្ថយការនាំចូលអំបិលមកពីបរទេស។
លោកបន្តថា «ការប្រមូលផលអំបិលប្រចាំថ្ងៃវាមិនទៀងអាស្រ័យលើអាកាសធាតុ។កាលណាអាកាសធាតុក្តៅខ្លាំង ពីមុនយើងកំណត់ក្នុងផែនការក្នុង១ហិកតាអាចប្រមូលផលអំបិលបានប្រហែល២០តោន ប៉ុន្តែនៅឆ្នាំយើងអាចប្រមូលបានលើសបើតាមការផលិតរបស់ប្រជាកសិករនាពេលសព្វថ្ងៃនេះ។តាមការវាយតម្លៃរបស់ខ្ញុំមកដល់សព្វថ្ងៃនេះអំបិលនៅក្នុងស្តុកមានប្រហែល៦ទៅ៧ម៉ឺនតោន ហើយបើសិនមេឃនៅតែអំណោយផលដល់ការផលិតអំបិលយើងអាចប្រមូលផលឈានដល់១០ម៉ឺនតោន ព្រោះអំបិលយើងធ្វើឡើងអំពីការរំហួតពីទឹកសមុទ្រ ដែលពឹងផ្អែកទៅលើអាកាសធាតុ»។
លោកលើកឡើងថា មកដល់សព្វថ្ងៃនេះ ផ្ទៃដីសរុបសម្រាប់ផលិតអំបិលមានជាង៤.៥០០ហិកតានៅក្នុងខេត្តកែបនិងកំពត។មកដល់ខែមេសានេះការផលិតិនិងការប្រមូលផលអំបិលរបស់ប្រជាកសិករកំពុងមានភាពសកម្មខ្លាំងហើយនៅឆ្នាំនេះយើងមិនមានបញ្ហាចោទលើកំលាំងពលកម្ម ខុសពីឆ្នាំមុនៗយើងមានការបារម្ភខ្វះកម្មករធ្វើការ។ការផលិតអំបិលចាប់ផ្តើមតាំងពីខែ៩ ឆ្នាំ២០១៩ហើយមកដល់ដើមខែធ្នូឆ្នាំ២០១៩ចាប់ផ្តើមប្រមូលផលអំបិលបណ្តើរៗរហូតដល់ខែមេសានេះបន្តដល់ខែឧសភាទៀតនៅតែមិនមានភ្លៀកធ្លាក់ទៀត នោះការផលិតអំបិលរបស់ប្រជាកសិករទទួលបានផលច្រើន។
ពាក់ព័ន្ធនិងការផលិតអំបិលថ្មីៗសម្តេចអគ្គមហាសេនាបតីតេជោ ហ៊ុន សែន បានអំពាវនាវដល់ប្រជាកសិករផលិតអំបិលនៅខេត្តកំពត នៅពេលវេលានេះមេឃមិនទាន់មានភ្លៀងធ្លាក់ទេ នៅមានឱកាសធ្វើអំបិលបន្ថែម។
សម្តេចសង្គត់ធ្ងន់ថា« ដូច្នេះគម្បីត្រូវផលិតអំបិលបន្ថែមទៀត ធ្វើយ៉ាងម៉េចកុំឱ្យខ្វះអំបិលសម្រាប់បរិភោគ។ជារួមពាក្យមួយម៉ាត់ដែលខ្ញុំចង់និយាយកុំឱ្យខ្វះអង្ករច្រកឆ្នាំ(កុំឱ្យខ្វះអំបិលបរិភោគ)បើអត់អាវពាក់បានប៉ុន្តែបើអត់អង្ករនិងអំបិលបរិភោគវាឆាប់ស្លាប់»៕
ចែករំលែកព័តមាននេះ