រាជធានីភ្នំពេញ៖ ថ្នាក់ដឹកនាំក្រសួងសុខាភិបាលបានបង្ហាញនូវការព្រួយបារម្ភខ្ពស់អំពីស្ថានភាពកូវីដ១៩ នៅកម្ពុជាក្រោយពិធីចូលឆ្នាំប្រពៃណីខ្មែរ ព្រោះឥរិយាបទមួយចំនួនកន្លងមកនាឱកាសបុណ្យចូលឆ្នាំខ្មែរ គឺបងប្អូនមួយចំនួនចូលចិត្តប្រមូលផ្តុំគ្នាផឹកស៊ី ឬក៏ទទួលទានអ្វីៗផ្សេងក្នុងទ្រង់ទ្រាយធំ ដែលឥរិយាបទបែបនេះគឺបង្កហានិភ័យខ្ពស់នៃការឆ្លងនិងការរាតត្បាតនៃវីរុសកូវីដ ១៩ នៅកម្ពុជា ។
លោករដ្ឋមន្ត្រីក្រសួងសុខាភិបាល ឯកឧត្តម ម៉ម ប៊ុមហេងបាននិយាយថាបើជាប្រជាជនចេះមានការភ័យខ្លាចរឿងកូវីដ១៩ គឺជារឿងល្អ ឲ្យចេះភ័យក្នុងខ្លួនកុំធ្វេសប្រហែសព្រោះកូវីដ-១៩ អាចឆ្លងបានទៅមនុស្សគ្រប់ប្រភេទ ។
ឆ្លើយតបទៅនឹងសំណួរដែលបានចោទសួរថាតើក្រសួងមានការព្រួយបារម្ភយ៉ាងណាអំពីស្ថានភាពកូវីដ ១៩ ក្រោយចូលឆ្នាំខ្មែររួចនោះ ឯកឧត្តម ម៉ម ប៊ុមហេង បានបញ្ជាក់ថា «យើងព្រួយបារម្ភ អញ្ចឹងហើយបានជាប្រមុខរាជរដ្ឋាភិបាលសម្តេចតេជោ លោកបានដាក់នូវវិធានការជាបទបញ្ជារម៉ឹងម៉ាត់ ធ្វើម៉េចឲ្យបងប្អូនយើងនៅមួយកន្លែង ។ មកពីព្រួយបារម្ភពេលជួបជុំគ្នាស៊ីផឹក ខ្លះក៏ជួបជុំគ្រួសារ ខ្លះក៏ជួបជុំមិត្តភ័ក្ត្រអី ដែលយើងទម្លាប់ពីមុនមក ។ អញ្ចឹងបានជាខ្ញុំថាសូមឲ្យប្រែប្រួល កែប្រែទម្លាប់ហ្នឹង ពីព្រោះពីមុនឲ្យតែចូលឆ្នាំ តែងតែជួបជុំគ្នាទទួលទានរួមគ្នា ជុំគ្នាច្រើនសប្បាយរីករាយ ។
ឥឡូវនេះអត់ទេ ដូច្នេះទើបរាជរដ្ឋាភិបាលលោកដាក់បញ្ជារធ្វើម៉េចកុំឲ្យមានការធ្វើចរាចរណ៍ទៅជួបជុំគ្នានៅក្នុងពិធីបុណ្យនេះដែលនេះជាវិធានការណ៍មួយចាំបាច់ដែលយើងត្រូវគោរពេ ហើយបន្ទាប់មកទៀតសំខាន់គឺអនាម័យ ឧស្សាហ៍លាងដៃនឹងសាប៊ូ និងនៅឆ្ងាយពីគ្នាមានគម្លាត ២ ម៉ែត្រ» ។
លោករដ្ឋមន្ត្រីបានបន្តថា ប៉ុន្តែបើយើងធ្វើមិនបាន អញ្ចឹងដូចខ្ញុំនិយាយអញ្ចឹងគឺទទួលហានិភ័យខ្ពស់ពីរ ។ ទី១ គឺចម្លងទៅក្នុងគ្រួសារ ក្នុងសហគមន៍របស់យើង ដែលធ្វើឲ្យគ្រួសារយើងហិនហោច ឈឺទាំងអស់គ្នា។
បើជាកុសលល្អពេទ្យ មើលទៅបានជា និង បើពេទ្យមើលមិនជា ស្លាប់ ដូច្នេះក្រោយពីសប្បាយវាទៅជារឿងមួយ ដែលសោកសៅ។ ហើយខ្ញុំ គឺថាក្រសួងមិនចង់និយាយទេ តែក្រសួងបានត្រៀមលក្ខណៈហើយអំពីអ្នកដែលស្លាប់ដោយសារកូវីដ ១៩ ចូលឆ្នាំមិនមែនចង់និយាយឲ្យគេភ័យទេ តែគឺថាបើស្លាប់ហើយ គឺនែនាំឲ្យបូជា ឲ្យកប់ភ្លាម មិនឲ្យធ្វើបុណ្យអី ទុកមួយអាទិត្យអី ឬទុកឲ្យមានការលេងភ្លេងអីហែរនោះទេ អញ្ចឹងសូមបងប្អូនមានការប្រុងប្រយ័ត្ន» ៕
ចែករំលែកព័តមាននេះ