រាជធានីភ្នំពេញ៖ ថ្នាក់ដឹកនាំក្រសួងសុខាភិបាល និងមន្ត្រីអង្គការសុខភាពពិភពលោកបានបញ្ជាក់ថាបញ្ហានៃការលាប់ឡើងវិញ ឬក៏ការកើតមានករណីវិជ្ជមានកូវីដ ១៩ ឡើងវិញគឺមានលទ្ធភាពកើតមាន ជាក់ស្តែងនៅកម្ពុជាមានករណីលាប់ឡើងវិញមួយករណី ខណៈនៅប្រទេសផ្សេងទៀតក៏មានករណីលាប់ឡើងវិញផងដែរ ។
លោកជំទាវ ឱ វណ្ណឌីន រដ្ឋលេខាធិការនិងជាអ្នកនាំពាក្យក្រសួងសុខាភិបាលបានបញ្ជាក់ថា អ្នកជាហើយ បែរជាវិជ្ជមានកូវីដ ១៩ វិញ គឺអាចនឹងមានលក្ខណៈនៃការឆ្លងឡើងវិញផងដែរ ត្រង់នេះមានន័យថា លទ្ធភាពដែលគាត់ឆ្លងទៅអ្នកដទៃមានតែមានលក្ខណៈទាប ។
លោកជំទាវបានបន្តថា ចំពោះករណីលាប់ឡើងវីញនេះ យើងអត់ដឹងច្បាស់ទេ សូម្បីតែអង្គការសុខភាពពិភពលោក ហៅកាត់ថា (WHO) អំពីអត្តចរិករបស់វីរុសនេះវាបែបនេះ ឬបែបណា អញ្ចឹងវីរុសនេះវាអាចបំបែកខ្លួនជាប្រភេទមួយ ហើយបំបែកជាប្រភេទមួយទៀត ដូចជាករណី ជំងឺគ្រុនឈាម កាលពីមុន បើសិនជាព្យាបាលជាហើយគឺ អត់ឈឺវិញទេ តែក្រោយមកវាឈឺវិញ ។ ដូច្នេះករណីកូវីដ ១៩ លាប់ឡើងវិញដូចគ្នា ។
លោកជំទាវ ឱ វណ្ណឌីន បានបញ្ជាក់ថាអ្នកដែលលាប់ឡើងវិញ គឺមានចំនួននេះតិចទេ លក្ខណៈឆ្លងទៅអ្នកដទៃគឺ «តិចមែនទែន» ។
តំណាងខាង WHO បានបញ្ជាក់ផងដែរថា លោកស្រីលើកទឹកចិត្តឲ្យអ្នកដែលទទួលបានការព្យាបាលជាសះស្បើយហើយត្រឡប់ទៅផ្ទះ គួរបន្តតាមដានសុខភាពបន្តទៀត ។
យ៉ាងណាមិញ លោកជំទាវបានបញ្ជាក់ថា ករណីលាប់ជំងឺកូវីដ១៩ ឡើងវិញ លើបុរសខ្មែរ វ័យ ៤០ឆ្នាំ នៅសង្កាត់ច្រាំងចំរេះ ក្នុងខណ្ឌឫស្សីកែវ ក្រោយពីបានលាប់ជំងឺនេះម្តងទៀត ក៏បានទទួលការព្យាបាលបន្តបន្ទាប់ ក៏ធ្វើតេស្តឃើញ «អវិជ្ជមាន» វិញហើយតែ ៕
ចែករំលែកព័តមាននេះ