រាជធានីភ្នំពេញ ៖ ការដ្ឋានសំណង់មួយកន្លែងសង្ស័យរាយខ្សែភ្លើងខ្វះការប្រុងប្រយ័ត្ន បណ្តាលឲ្យឆក់សត្វគោ១ក្បាលងាប់នៅនឹងកន្លែងកើតហេតុ បង្កឲ្យមានការភ្ញាក់ផ្អើលដល់ប្រជាពលរដ្ឋនៅជិតកន្លែងកើតហេតុនាំគ្នាមកចោមរោមមើលកាលពីវេលាម៉ោង៦និង៣០នាទីយប់ថ្ងៃទី១២ ខែមេសា ឆ្នាំ២០២០ ស្ថិតក្នុងភូមិស្រែតេជះ សង្កាត់សំរោងក្រោម ខណ្ឌពោធិ៍សែនជ័យ…
រាជធានីភ្នំពេញ ៖ ការដ្ឋានសំណង់មួយកន្លែងសង្ស័យរាយខ្សែភ្លើងខ្វះការប្រុងប្រយ័ត្ន បណ្តាលឲ្យឆក់សត្វគោ១ក្បាលងាប់នៅនឹងកន្លែងកើតហេតុ បង្កឲ្យមានការភ្ញាក់ផ្អើលដល់ប្រជាពលរដ្ឋនៅជិតកន្លែងកើតហេតុនាំគ្នាមកចោមរោមមើលកាលពីវេលាម៉ោង៦និង៣០នាទីយប់ថ្ងៃទី១២ ខែមេសា ឆ្នាំ២០២០ ស្ថិតក្នុងភូមិស្រែតេជះ សង្កាត់សំរោងក្រោម ខណ្ឌពោធិ៍សែនជ័យ ។
បុរសជាម្ចាស់គោខាងលើឈ្មោះសៅ សុខភាព អាយុ៤២ឆ្នាំ មុខរបរកសិករ និងប្រពន្ធឈ្មោះទែន អាយុ៣៦ឆ្នាំ មុខរបរកម្មកររោងចក្រ ។ គ្រួសារនេះរស់នៅភូមិអណ្តូងតាអន សង្កាត់សំរោងក្រោម ខណ្ឌពោធិ៍សែនជ័យ ។
តាមប្រភពព័ត៌មានពីស្ត្រីជាម្ចាស់សត្វគោបាននិយាយប្រាប់ថា ជារៀងរាល់ថ្ងៃគាត់បានលែងមេគោនិងកូនគោដែលមានអាយុប្រមាណ២ខែឱ្យដើរស៊ីស្មៅ ។ នៅមុនពេលកើតហេតុ កាលពីវេលាម៉ោង៥ល្ងាចថ្ងៃទី១១ ខែមេសា គាត់បានបាត់មេគោ១ក្បាល ដោយមិនឃើញត្រឡប់មកផ្ទះវិញដូចសព្វដងឡើយ គឺឃើញតែកូន តូចមកជាមួយមេគោផ្សេងទៅវិញ បន្ទាប់មកគាត់និងប្ដីបាននាំគ្នាដើររកសព្វគ្រប់កន្លែង តែរកមិនឃើញមេគោឡើយ ធ្លាប់តែរាល់ដងនៅចន្លោះម៉ោង៤ទៅម៉ោង៥ល្ងាច មេគោតែងតែមកចូលក្រោលជារៀងរាល់ថ្ងៃ ។
ស្ត្រីជាម្ចាស់គោបានបញ្ជាក់ទៀតថា រាល់ថ្ងៃគ្មានស្មៅអោយស៊ី ទើបគាត់ប្រលែងចោលអោយដើររកស៊ី។ លុះមកដល់វេលាម៉ោង៥និង៣០ល្ងាចថ្ងៃទី១២ ខែមេសា ឆ្នាំ២០២០ មានប្រជាពលរដ្ឋម្នាក់បានដើរទៅបត់ជើងតូចជិតកន្លែងកើតហេតុក៏បានប្រទះឃើញសត្វគោដេកដួលបះជើងឡើងលើស្មានតែគោដេក លុះពេលគាត់ក៏ដើរទៅជិតទើបដឹងថាគោមួយក្បាលនោះត្រូវខ្សែភ្លើងឆក់បណ្តាលឱ្យងាប់ និងធុំក្លិនស្អុយទៅហើយ ។
ស្ត្រីជាម្ចាស់គោបានបញ្ជាក់បន្តទៀតថា បន្ទាប់មក ប្រជាពលរដ្ឋម្នាក់នោះទាក់ទងប្រាប់ទៅមេភូមិអោយមកមើលនៅទីតាំងកន្លែងកើតហេតុ ពេលភ្លាមៗនោះលោកមេភូមិក៏ទាក់ទងមកគាត់ភ្លាមៗផងដែរដើម្បីមកមើលសត្វគោមួយក្បាលនោះ លុះពេលគាត់មកដល់កន្លែងកើតហេតុក៏ឃើញគោងាប់ ធ្វើឱ្យគាត់តក់ស្លុតនិងស្ដាយគោជាខ្លាំង ។ ភ្លាមៗនោះដែរ ក៏មានកំលាំងសមត្ថកិច្ចនគរបាលប៉ុស្តិ៍សំរោងក្រោម បានចុះមកអន្តរាគមន៍នៅកន្លែងកើតហេតុ និងបានទាក់ទងទៅផ្នែកជំនាញអគ្គិសនីអោយមកអន្តរាគមន៍ផ្ដាច់ចរន្តភ្លើង ដើម្បីអូសយកសត្វគោចេញពីកន្លែងកើតហេតុនិងលើកដាក់លើរថយន្ត។
ក្រោយពេលកើតហេតុ ម្ចាស់គោបានអោយខាងម្ចាស់ការដ្ឋានដែលរាយខ្សែភ្លើងខ្វះការប្រុងប្រយ័ត្នជួយចេញថ្លៃខាតបង់សមរម្យនិងអាចទទួលយកបាន ៕ (កែសម្រួលដោយ ៖ ធីតា)
ចែករំលែកព័តមាននេះ