ខេត្តបាត់ដំបង ៖ ប្រជាពលរដ្ឋមួយចំនួននៅក្នុងស្រុកសំឡូត នៅតែហ៊ានយកអាយុជីវិតទៅប្រថុយប្រថានជាមួយនឹងកាកសំណល់សង្គ្រាមដ៏មហាគ្រោះថ្នាក់ ដែលសេសសល់កប់នៅក្នុងដីនៅក្នុងព្រៃ ដោយសារតែដើររុករានរកកម្រៃពីអនុផលព្រៃឈើ នៅតាមតំបន់អតីតសមរភូមិក្ដៅនៃស្រុកនេះ ។
ជាក់ស្ដែង កាលពីរសៀលថ្ងៃទី១០ មេសា ប្រជាពលរដ្ឋម្នាក់ឈ្មោះ ហៀង សុធា ភេទប្រុសអាយុ១៧ឆ្នាំ រស់នៅភូមិឆករកាឃុំសំទ្បូត ស្រុកសំទ្បូត បានដើរជាន់គ្រាប់មីន នៅចំណុច«ភ្នំរទេះសេះ»នៅក្នុងភូមិសាស្ត្រ ភូមិឆករកា ឃុំសំឡូត បណ្ដាលឱ្យផ្ទុះរងរបួសប្រអប់ជើងខាងស្ដាំ នៅពេលកំពុងដើររកបេះផ្លែ
សំរ៉ងក្នុងព្រៃនៅតំបន់នោះ ។ បើតាមសមត្ថកិច្ចបានឱ្យដឹងថា ជនរងគ្រោះបានដើរជាន់ប្រភេទគ្រាប់«មីនស្គរ»កប់ក្នុងដី ដែលជាកាកសំណល់ពីសង្គ្រាម ហើយនេះមិនមែនជាលើកទីមួយទេ ដែលប្រជាពលរដ្ឋជួបគ្រោះថ្នាក់ ដោយសារយុទ្ធភណ្ឌមិនទាន់ផ្ទះនៅតំបន់«ភ្នំរទេះសេះ»ខាងលើនេះ។
ប៉ុន្តែដោយសារតែជីវភាពខ្វះខាត ធ្វើឱ្យពលរដ្ឋមួយចំនួននៅតែប្រថុយយកជីវិតទៅប្រឈមនឹងតំបន់ដ៏មហាគ្រោះថ្នាក់នេះ បើទោះជាពួកគេធ្លាប់បានដឹង បានឮហើយថា នៅតំបន់នោះ ពោពេញទៅដោយកាកសំណល់សង្គ្រាមនៅរាយប៉ាយពេញព្រៃ និង មានកប់នៅក្នុងដីនៅឡើយក្ដី។
សូមបញ្ជាក់ថា កាលពីព្រឹកថ្ងៃទី២៤ មីនា កន្លងទៅនេះ ក៏មានប្រជាពលរដ្ឋម្នាក់ឈ្មោះជន ហាក់ ភេទប្រុសអាយុ៣៩ឆ្នាំ រស់នៅភូមិ-ឃុ ជាមួយគ្នានាខាងលើនេះ បានដើរជាន់មីនដូចគ្នានៅក្បែរ«ភ្នំរទេះសេះ» នេះ នៅពេលជនរងគ្រោះដើររុករកបេះផ្លែសំរ៉ងនៅទីនោះ ដើម្បីយកទៅលក់ឱ្យឈ្មួញ ។ ជនរងគ្រោះរូបនេះរងរបួសប្រអប់ជើងខាងស្ដាំយ៉ាងធ្ងន់ធ្ងរ ដែលប្រភពខ្លះអះអាងថា អាចឈានដល់ការរវះកាត់ជើងម្វាងទៀតផង។
បើតាមអាជ្ញាធរដែនដីបានឱ្យដឹងថា បច្ចុប្បន្ននៅក្នុងភូមិសាស្ត្រ តំបន់ជួរភ្នំរទេះសេះនោះ នៅមានសេសលសល់គ្រាប់យុទ្ធភ័ណ្ឌមិនទាន់ផ្ទុះកប់នៅក្នុងដី ឬ នៅរាយប៉ាយនៅក្នុងព្រៃ នៃតំបន់នោះនៅឡើយ ដែលកាកសំណល់សង្គ្រាមទាំងនោះ កំពុងចាំឆក់យកអាយុជីវិតមនុស្សគ្រប់ពេលវេលា។ ប្រជាពលរដ្ឋរស់នៅជិតតំបន់នោះ ក៏បានដឹង បានឭដែរថា នៅតំបន់នោះសំបូរទៅដោយគ្រាប់មីន ដែលពោពេញទៅដោយគ្រោះថ្នាក់។
ប៉ុន្តែពលរដ្ឋមួយចំនួននៅតែប្រថុយនឹងគ្រោះថ្នាក់នេះ បើទោះជាអាជ្ញាធរនិងមន្ត្រីជំនាញតែងអំពាវនាវជាញឹកញ៉ាប់ ហាមមិនឱ្យមានការរុករានចូលព្រៃនៅតំបន់គ្រោះថ្នាក់នោះក្ដី។ ទោះយ៉ាងណា ប្រជាពលរដ្ឋគួរតែមានការគិតគួអំពីការយកអាយុជីវិតទៅប្រថុយប្រថាននឹងគ្រាប់មីនដ៏មហាគ្រោះថ្នាក់នេះ៕
ចែករំលែកព័តមាននេះ