ខេត្តសៀមរាប ៖ សង្កេតឃើញការធ្វើដំណើររបស់បងប្អូន គិតត្រឹមម៉ោងជិត១២ថ្ងៃត្រង់ទី១១ មេសា នេះ ត្រង់ចំណុចព្រំប្រទល់សៀមរាប-កំពង់ធំ គឺហាក់មានសភាពស្ងាត់ជាងកាលពីម្សិលមិញ និងម្សិលម្ង៉ៃ ដែលមានបងប្អូនយើងបានសម្រុកធ្វើដំណើរតាមរថយន្តក្រុង…
ខេត្តសៀមរាប ៖ សង្កេតឃើញការធ្វើដំណើររបស់បងប្អូន គិតត្រឹមម៉ោងជិត១២ថ្ងៃត្រង់ទី១១ មេសា នេះ ត្រង់ចំណុចព្រំប្រទល់សៀមរាប-កំពង់ធំ គឺហាក់មានសភាពស្ងាត់ជាងកាលពីម្សិលមិញ និងម្សិលម្ង៉ៃ ដែលមានបងប្អូនយើងបានសម្រុកធ្វើដំណើរតាមរថយន្តក្រុង រថយន្តឈ្នួល និងរួមទាំងម៉ូតូមកកាន់ស្រុកកំណើតវិញ ។ ខណៈរាជរដ្ឋាភិបាលបានចេញសេចក្តីប្រកាសឱ្យផ្អាកការធ្វើដំណើរចាប់ពីម៉ោង០០ៈ០០នាទីថ្ងៃទី០៩ មេសា រហូតដល់ថ្ងៃទី១៧ មេសា ទើបបើកឡើងវិញ ដើម្បីទប់ស្កាត់ការឆ្លងវីរុសកូវីដ១៩ ។
ជាក់ស្តែង ស្ថិតត្រង់ចំណុចព្រំប្រទល់(សៀមរាប-កំពង់ធំ)នាថ្ងៃនេះ គឺឃើញរថយន្តភាគតិចបំផុតបានបើកឆ្លងកាត់ តែក៏នៅឃើញមានរថយន្តឈ្នួលខ្លះៗនៅបន្តដឹកបងប្អូនយើងដដែល ។ ប៉ុន្តែត្រូវសមត្ថកិច្ចឱ្យឃាត់ឱ្យឈប់ ដើម្បីសុំការត្រួតពិនិត្យទៅលើអ្នកដំណើរទាំងនោះ ។
កោះសន្តិភាព បានជួបជាមួយកងកម្លាំងនគរបាលនិងរួមទាំងអាវុធហត្ថដែលប្រចាំការនៅគោលដៅខាងលើបានឱ្យដឹងថា រយៈ២ថ្ងៃនេះគឺមានការមមារ ក្នុងការចាំបង្អាក់ដំណើររបស់បងប្អូនយើង ដែលគាត់មានបំណងត្រឡប់មកកាន់ស្រុកកំណើតវិញ ។ ប៉ុន្តែកម្លាំងយើងក៏បានសម្រួលជាមួយពួកគាត់បានល្អផងដែរ ដោយគាត់ក៏បានសហការជាមួយ ហើយភាគច្រើនបានត្រលប់ក្រោយវិញ ។
កម្លាំងយើងក៏សូមបន្តអំពាវនាវទៅដល់បងប្អូន សូមឱ្យមានការយោគយល់ និងគោរពតាមការស្នើរបស់រាជរដ្ឋាភិបាលយើងមានការយកចិត្តទុកដាក់ ហើយដែលការធ្វើបែបនេះ គឺបង្ការកុំឱ្យឆ្លងវីរុសកូវី១៩តែប៉ុណ្ណោះ ។
ចែករំលែកព័តមាននេះ