នៅក្នុងដំណាក់កាលដ៏ផុយស្រួយនៃការឆ្លងរាលដាលមេរោគកូវីដ១៩ ការចូលរួម ពីប្រជាជនមានសារសំខាន់ជាងអាយុជីវិត ដើម្បីទប់ស្កាត់ការឆ្លង និងការចម្លងមេរោគកូវីដ១៩ ។
ទោះបីជាមានរបាយការណ៍ពីក្រសួងសុខាភិបាលអំពីចំនួនអ្នកជាសះស្បើយកាន់តែច្រើន ហើយចំនួនករណីថ្មីនៃជំងឺកូវីដ១៩ ត្រូវបានរកឃើញតិចតួចជារៀងរាល់ថ្ងៃក្តី ប្រជាជនទាំងអស់ក៏ត្រូវតែបង្កើនការប្រុងប្រយ័ត្ន ពីព្រោះតែភាពសាហាវនៃការឆ្លងរបស់មេរោគនេះ ដែលពិបាកនឹងទប់ទល់ បើបើគ្មានការចូលរួមផ្ទាល់ពីសាធារណជន ។
អ្វីដែលមនុស្សគ្រប់គ្នាត្រូវចងចាំនោះមេរោគនេះសម្ងំខ្លួននៅក្នុងខ្លួនមនុស្ស ហើយ យើងមិនអាចដឹងឡើយថា តើនរណាគ្មានមេរោគនេះ ឬនរណាមានមេរោគនេះ ។ វាបានបង្កើតអោយមានការមិនទុកចិត្តគ្នា ក្នុងសង្គម ប៉ុន្តែយើងត្រូវតែចាត់វិធានាការមុនដោយប្រុងប្រយ័ត្នពីការឆ្លងពីមនុស្សម្នាក់ តាមរយៈការលាងដៃអោយស្អាត ការពាក់ម៉ាស ការមានគម្លាតពីគ្នាយ៉ាងតិច២ម៉ែត្រ និងការដាក់កំហិត ការធ្វើដំណើរលើខ្លួនឯង ។
រដ្ឋាភិបាលបានចាត់វិធានការមួយជំហានម្តងៗដោយប្រុងប្រយ័ត្ន ដើម្បីទប់ស្កាត់ការឆ្លងការរាលដាលនៃមេរោគកូវីដ១៩ ។ វិធានការចុងក្រោយ គឺការដាក់កំហិតទៅលើការធ្វើដំណើរចេញចូលភ្នំពេញតាមបណ្តាខេត្តនានា ដោយលើកលែងតែខេត្តកណ្តាល ដែលចាត់ទុកថា ជាតំបន់តែមួយ ។
សេចក្តីរាយការណ៍ព័ត៌មានជាច្រើន បានបង្ហាញថា ប្រជាជនកម្ពុជាមួយចំនួននៅតែបន្តចង់ធ្វើដំណើរទៅស្រុកកំណើតមុនថ្ងៃបុណ្យចូលឆ្នាំ បើទោះបីជារដ្ឋាភិបាលប្រកាសថា មិនមានការចួលឆ្នាំហើយ អោយប្រជាជនធ្វើការងារដូចធម្មតាក្តី ។ ការកំហិតដល់ការធ្វើដំណើររបស់ប្រជាជនត្រូវបានអនុវត្តក្នុងប្រទេសជាច្រើន នៅក្នុងពិភពលោក ដើម្បីទប់ស្កាត់ការឆ្លងរាលមេរោគកូវីដ១៩នេះ ។
សូម្បីតែនៅប្រទេសសិង្ហបូរី ក៏បានហាមឃាត់ការធ្វើដំណើរនេះ សូម្បីពីផ្ទះមួយទៅផ្ទះមួយទៀត ។ វាជាវិធានការចាំបាច់ខ្លាំង ដើម្បីទប់ស្កាត់ការរាលដាលមេរោគកូវីដ១៩ ។ ដូច្នេះប្រជាជនគ្រប់រូបមានកាតព្វកិច្ចត្រូវអនុវត្តតាម ដើម្បីសុខភាព និងជីវិតផ្ទាល់ គ្រួសារ និង សង្គមជាតិទាំងមូល ៕
ចែករំលែកព័តមាននេះ