រាជធានីភ្នំពេញ ៖ បន្ទាប់ពីវិស័យសំណង់ និងអចលនទ្រព្យនៅកម្ពុជាមានការរីកចម្រើន ទៅមុខគេសង្កេតឃើញមានការធ្វើអាជីវកម្មពោះដីឡូត៍លក់មានភាពផុសផុលស្ទើរគ្រប់តំបន់ ហើយនៅក្នុងការរីកចម្រើនេះក៏មានប្រជាពលរដ្ឋមិនតិចដែរបានចាញ់បោក ឬទិញដី ខ្យល់ ។ ប៉ុន្តែក្នុងពេលខាងមុខនេះសម្រាប់អ្នកដែលទិញដីឡូត៍អាចនឹងមិនមានហានិភ័យ ដូចពេលមុននោះឡើយ ព្រោះអាជ្ញាធរបានតម្រូវឱ្យម្ចាស់អាជីវកម្មដីឡូត៍ទាំងអស់ត្រូវមក ដាក់ពាក្យស្នើសុំលិខិតអនុញ្ញាតអាជីវកម្មអភិវឌ្ឍដីឡូត៍នៅតាមមន្ទីរ ឬក្រសួងសេដ្ឋកិច្ច និងហិរញ្ញវត្ថុ ឱ្យបានមុនថ្ងៃទី ៣០ខែមេសា ឆ្នាំ ២០២០ ។
ពាក់ព័ន្ធនិងការទិញ និងលក់ដីឡូត៍នៅពេលកន្លងមកបើតាមអ្នកជំនាញនៅក្នុងវិស័យ សំណង់ និងអចលនទ្រព្យមើលឃើញថាអ្នកដែលទិញដីឡូត៍ជួបបញ្ហាច្រើនដោយអ្នកខ្លះ ទិញដីមិនដឹងថាដីពិតនៅកន្លែងណាហើយអ្នកផ្សេងទៀតទិញប៉ះគម្រោងខ្យល់ ហើយពួក កាត់ទាំងនេះភាគច្រើនមិនមានប្រាក់ច្រើននោះទេ ។
នាយកក្រុមហ៊ុន Century 21 Fortuna Investment លោក វ៉ា វីរៈ មានប្រសាសន៍ថា «កន្លង មកយើងឃើញមានបញ្ហាច្រើនទាក់ទងនិងអ្នកទិញដីឡូត៍ ហើយអ្នកខ្លះដាក់លុយទៅ ហើយមិនដឹងដីរបស់ខ្លួននៅឯណា និងអ្នកខ្លះទៀតទិញប៉ះចាំដីខ្យល់ ។ អ៊ីចឹងក្រសួងធ្វើ នេះដើម្បីការពារហានិភ័យទៅដល់អតិថជិន ឬអ្នកទិញដីឡូត៍ ដូចយើងដឹងហើយអ្នកទិញ ដីឡូត៍ភាគច្រើនពួកគាត់មិនសូវមានថវិកាច្រើននោះទេ អ៊ីចឹងនេះជួយការពារហានិភ័យ របស់ពួកគាត់» ។
លោកបន្តថា «បើសិនក្រសួងអនុវត្តការជូនដំណឹងនេះឱ្យបានតឹងរឹង ព្រោះយើងបានដឹង ស្រាប់ហើយថាការទិញដីឡូត៍ត្រូវការកាត់ឈ្មោះ ផ្ទេរកម្មសិទ្ធទៅឱ្យបុគ្គលផ្សេង ។ អ៊ីចឹង បើក្រសួងសហការជាមួយក្រសួងរៀបចំដែនដី នគរូបនីយកម្ម និងសំណង់ ខ្ញុំគិតថានឹង មានការកាត់បន្ថយបានហានិភ័យច្រើន» ។
តាមអ្នកជំនាញបន្ទាប់ពីក្រសួងចេញលិខិតខាងលើសម្រាប់អ្នកមិនសូវយល់ពីច្បាប់ ឬការ ដាក់ពាក្យស្នើសុំមានការលំបាកស្ថិតក្នុងប្រទេសជួបបញ្ហានឹងកូវីដ-១៩ នេះ អាចនឹងមាន អ្នកដកខ្លួនថយ ។
លោក វ៉ា វីរៈ ឱ្យដឹងទៀតថា «នៅពេលកន្លងមកអ្នកទិញដីពោះឡូត៍លក់មានភាពងាយ ស្រួល តែបើនៅពេលខាងមុខនេះមានការរឹតបណ្តឹង ឬតម្រូវឱ្យមានការគោរពច្បាប់ សម្រាប់អ្នកមិនយល់ពីច្បាប់ ឬការស្នើសុំមានការលំបាក អាចធ្វើឱ្យអ្នកធ្លាប់ធ្វើអាជីវកម្ម ដីឡូត៍ខ្លះអាចនឹងដកខ្លួនចេញ ផ្គួបផ្សំជាមួយបញ្ហាកូវីដ-១៩ ធ្វើឱ្យការលក់ និងទិញថម ថយ ។ ប៉ុន្តែសម្រាប់ដីឡូត៍ល្អៗ គឺនៅតែមានសក្តានុពលដដែលពិសេសដីឡូត៍នៅគៀក ក្រុងភ្នំពេញ និងតំបន់ដែលមានហេដ្ឋារចនាសម្ព័ន្ធល្អ» ។
បើតាមមន្ត្រីក្រសួងសេដ្ឋកិច្ច និងហិរញ្ញវត្ថុ នៅពេលក្រសួងតម្រូវឱ្យម្ចាស់អាជីវកម្មដីឡូត៍ មកដាក់ពាក្យស្នើសុំអាជ្ញាបណ្ណអាជីវកម្មដីឡូត៍នៅក្រសួង គោលដៅចម្បងនៃការដាក់ ចេញនៅច្បាប់ផ្សេងៗ គឺដើម្បីការពារហានិភ័យ ឬផលប្រយោជន៍ដល់អ្នកទិញ ព្រោះកន្លង មកមានការឆបោកមានច្រើន ។
យោងតាមលិខិតជូនដំណឹងស្តីពី «ការគ្រប់គ្រងអាជីវកម្មអភិវឌ្ឍដីឡូត៍» របស់ក្រសួង សេដ្ឋកិច្ច និងហិរញ្ញវត្ថុ កាលពីថ្ងៃទី ៨ខែមេសានេះ បានឱ្យដឹងថា យោងតាមប្រកាសលេខ ០៩៨ ចុះថ្ងៃទី ២០ខែមករា ២០២០ ស្តីពីការគ្រប់គ្រងអាជីវកម្មអភិវឌ្ឍអចលនវត្ថុ តម្រូវឱ្យ ម្ចាស់អាជីវកម្មដីឡូត៍ (ពោះដីឡូត៍) ទាំងអស់ត្រូវដាក់ពាក្យស្នើសុំលិខិតអនុញ្ញាតអាជីវកម្ម អភិវឌ្ឍដីឡូត៍ពីមន្ទីរសេដ្ឋកិច្ច និងហិរញ្ញវត្ថុរាជធានី ខេត្ត សម្រាប់អាជីវកម្មអភិវឌ្ឍដីឡូត៍ ដែលមានទំហំក្រោម ១ម៉ឺនម៉ែត្រការ៉េ ឬស្មើ ១ហិកតា និងដាក់ពាក្យស្នើសុំអាជ្ញាបណ្ណ អភិវឌ្ឍដីឡូត៍ពីក្រសួងសេដ្ឋកិច្ច និងហិរញ្ញវត្ថុសម្រាប់អាជីវកម្មអភិវឌ្ឍដីឡូត៍ដែលមាន ទំហំចាប់ពី ១ម៉ឺនម៉ែត្រការ៉េឬស្មើ ១ហិកតាឡើង ។
លិខិតជូនដំណឹងបញ្ជាក់ថា «ដូច្នេះក្រសួងសេដ្ឋកិច្ច និងហិរញ្ញវត្ថុសូមអញ្ញើញម្ចាស់ អាជីវកម្មអភិវឌ្ឍដីឡូត៍ទាំងអស់ត្រូវរួសរាន់មកដាក់ពាក្យស្នើសុំលិខិតអនុញ្ញាត និងអាជ្ញា បណ្ណអាជីវកម្មដីឡូត៍ឱ្យបានមុនថ្ងៃទី ៣០ខែមេសា ឆ្នាំ ២០២០ជាកំហិត ។ ក្នុងករណីមិន អនុវត្តតាមការណែនាំខាងលើ ក្រសួង ឬមន្ទីរសេដ្ឋកិច្ច និងហិរញ្ញវត្ថុនឹងចាត់វិធានការ រដ្ឋបាល និងធ្វើការផាកពិន័យស្របតាមប្រកាសលេខ ០៩៨ ចុះថ្ងៃទី ២០ខែមករា ឆ្នាំ ២០២០ស្តីពីការគ្រប់គ្រងអាជីវកម្មអភិវឌ្ឍអចលនវត្ថុ» ៕
ចែករំលែកព័តមាននេះ