នៅពេលប្រទេសមួយចំនួនបានប្រកាសបិទក្នុងគ្រាអាសន្ន ដើម្បីបង្ការ និងទប់ស្កាត់ការឆ្លងរាលដាលនៃវីរុសកូវីដ១៩ មនុស្សម្នាសម្រុកទិញអាហារមានការកើនឡើង ធ្វើឲ្យតម្លៃ ធញ្ញជាតិ ចំនួនពីរប្រភេទ ឡើងថ្លៃផងដែរ គឺស្រូវ(អង្ករ ស) និងស្រូវសាលី ។ អ្នកនាំចូល បានប្រញាប់ប្រញាល់ស្តុកទំនិញ ចំណែកឯអ្នកនាំចេញ មានការរារាំងផ្នែកដឹកជញ្ជូន ។ ប្រការនេះអាចគំរាមកំហែងដល់សន្តិសុខស្បៀងពិភពលោក នេះបើតាមសារព័ត៌មាន RT ។
តម្លៃស្រូវអង្ករ បានឡើងដល់កម្រិតខ្ពស់ ក្នុងរយៈពេល៧ឆ្នាំ ខណៈពេលដែលស្រូវសាលី បានកើនឡើងប្រហែល១៥ភាគរយចាប់តាំងពីពាក់កណ្តាលខែមីនា កន្លងមក ។ ក្រុមប្រឹក្សាគ្រាប់ធញ្ញជាតិអន្តរជាតិ រំពឹងថា នឹងមានការកើនឡើងយ៉ាងខ្លាំងនូវតម្រូវការអាហារ ដូចជាអង្ករ និងស្រូវសាលី ។
យោងតាមសមាគមន៍អ្នកនាំចេញ(ថៃ) បានអោយដឹងថា សូម្បីតែ អង្ករអន់(អង្ករសដែលគ្រាប់វាបាក់ជាពីរបីកំណាត់) តម្លៃ ៥ភាគរយ(ស្តង់ដារឧស្សាហកម្ម) ក៏បានកើនឡើង ១២ភាគរយ នៅចន្លោះថ្ងៃទី២៥ ខែមីនា និងថ្ងៃទី១ ខែមេសា ២០២០នេះ ។
បើតាមទីភ្នាក់ងារព័ត៌មាន រ៉យទ័រ បានអោយថា “បច្ចុប្បន្ន ការផ្គត់ផ្គង់កំពុងតែរឹតបន្តឹង ដោយសារផលប៉ះពាល់ នៃការឆ្លងរាតត្បាតរបស់ Covid-19 ទៅលើតម្រូវការនិងពាណិជ្ជកម្ម ក៏ដូចជាផលប៉ះពាល់ នៃអាកាសធាតុមិនល្អ នៅក្នុងប្រទេសអ្នកផលិតសំខាន់ៗ ដូចជាគ្រោះរាំងស្ងួតធ្ងន់ធ្ងរ នៅអាស៊ីអាគ្នេយ៍ និងអូស្ត្រាលី ជាដើម ។
តម្លៃអង្ករ បានចាប់ផ្តើមឡើងខ្ពស់ នៅចុងឆ្នាំ២០១៩ ដោយសារភាពរាំងស្ងួតខ្លាំង នៅក្នុងប្រទេសថៃ និងមានតម្រូវការខ្លាំង ពីអ្នកនាំចូលអាស៊ី និងអាហ្វ្រិក ។ ប្រទេសថៃ គឺជាប្រទេសនាំអង្ករចេញធំ លំដាប់ទី២ លើពិភពលោក បន្ទាប់ពីប្រទេសឥណ្ឌា ដែលវៀតណាមឈរនៅលំដាប់ទី៣ ។
នៅក្នុងប្រទេសឥណ្ឌា អ្នកលក់ស្រូវឥឡូវនេះ បានឈប់ចុះហត្ថលេខាលើកិច្ចសន្យានាំចេញថ្មី ដោយសារកង្វះខាតកម្លាំងពលកម្ម ហើយកិច្ចសន្យាដែលមានស្រាប់ ក៏មានការរំខានផ្នែកនាំចេញ (បម្រាមគោលចរ ក្នុងពេលដែលឥណ្ឌាដាក់ប្រទេសក្នុងគ្រាអាសន្ន) ៕
ចែករំលែកព័តមាននេះ