ខេត្តមណ្ឌលគិរី ៖ ពិតជាអាសូរពន់ពេក ទើបសម្រាលកូនបាន១៨ថ្ងៃ ព្យាយាមតត្រុកពីស្រុកកំណើត ដោយដៃម្ខាងបីកូនខ្ចី និងដៃម្ខាងទៀតដឹកដៃកូនតូចដើររកប្តីដល់ខេត្តមណ្ឌលគិរី តែរកមិនឃើញប្តីទេ ស្របពេលខ្លួនក៏អស់លុយជាប់ខ្លួនទៀត ត្រូវបានការសន្តោសជួយពីអាជ្ញាធរក្រុងសែនមនោរម្យយកអាសារផ្តល់កន្លែងស្នាក់…
ខេត្តមណ្ឌលគិរី ៖ ពិតជាអាសូរពន់ពេក ទើបសម្រាលកូនបាន១៨ថ្ងៃ ព្យាយាមតត្រុកពីស្រុកកំណើត ដោយដៃម្ខាងបីកូនខ្ចី និងដៃម្ខាងទៀតដឹកដៃកូនតូចដើររកប្តីដល់ខេត្តមណ្ឌលគិរី តែរកមិនឃើញប្តីទេ ស្របពេលខ្លួនក៏អស់លុយជាប់ខ្លួនទៀត ត្រូវបានការសន្តោសជួយពីអាជ្ញាធរក្រុងសែនមនោរម្យយកអាសារផ្តល់កន្លែងស្នាក់ នៅនិងម្ហូបអាហារ។
លោក កាន់ ពេញ អធិការក្រុងសែនមនោរម្យបានឲ្យដឹងនៅថ្ងៃទី០៩ មេសា ថា ស្ត្រីម្នាក់ខាងលើឈ្មោះ
ខេង ចាន់ណា អាយុ៣១ឆ្នាំ មានស្រុកកំណើតភូមិកោះដាច់ ឃុំកោះមិត្ត ស្រុកកំពង់សៀម ខេត្តកំពង់ចាម មានកូនស្រី២នាក់ យកមកតាមជាប់ខ្លួន កូនស្រីទី១-ឈ្មោះ វ៉ា ចន្ទ្រា អាយុ៧ឆ្នាំ (កូនប្តីមុន) កូនតូចទី២-ឈ្មោះ ឡេង ម្លិះលៀ ទើបកើតបាន១៨ថ្ងៃ(កូនប្តីក្រោយ)។ ចំណែកប្ដីរបស់គាត់ឈ្មោះ ឡៅ ផលឡេង ភេទប្រុស អាយុ ៣៤ ឆ្នាំ សុខកំណើត ឃុំស្វាយព្រៃ ស្រុកព្រៃឈរ ខេត្តកំពង់ចាម ។
លោកអធិការបន្តថា ស្ត្រីឈ្មោះ ឃេង ចាន់ណា បានមកដល់ខេត្តមណ្ឌលគិរី កាលពីថ្ងៃទី០៨ មេសា បន្ទាប់ពីទទួលដំណឹងមិនច្បាស់លាស់ថា ប្តីរបស់គាត់មកធ្វើកម្មករសំណង់នៅទីនេះ ប៉ុន្តែមិនដឹងថា នៅកន្លែងពិតប្រាកដ ទើបរកមិនឃើញ។ បើតាមការឲ្យដឹងពីស្ត្រីនេះ ប្តីរបស់គាត់បានចាកចេញពីផ្ទះតាំងពីអំឡុងខែមីនា ២០២០ ដោយគ្មានដំណឹងអ្វីសោះ តាំងពីគាត់នៅពពោះរហូតដល់ពេលកូនកើត មិនឃើញប្តីទៅអើតសួរសុខទុក្ខសោះ។
ជុំវិញករណីនេះ ក្រោយទទួលបានព័ត៌មានពីកោះសន្តិភាព លោកស្រី ម៉ាលី សុខនី ប្រធានមន្ទីរកិច្ចការនារីខេត្ត លោក ខឹម សុផុន ប្រធានមន្ទីរសង្គមកិច្ចខេត្ត រួមនឹងសប្បុរសជនជាច្រើនបានចូលរួមជួយឧបត្ថម្ភថវិការចំនួន៧៩០,០០០រៀល ជូនស្ត្រីខាងលើ និងបានជួលរថយន្តជូនគាត់វិលត្រលប់ទៅផ្ទះវិញនៅឯស្រុកមេមត់ ខេត្តត្បួងឃ្មុំ។
បើតាមលោកអធិការក្រុងសែនមនោរម្យ បានបញ្ជាក់ថា លោកបានផ្ញើរូបថតប្តីរបស់ស្ត្រីខាងលើទៅតាមបណ្តាប៉ុស្តិ៍រដ្ឋបាលក្នុងខេត្តមណ្ឌលគិរី ដើម្បីជួយផ្តល់ដំណឹងទៅគាត់ ដោយសង្ឃឹមថា និងអាចរកឃើញឆាប់ៗ ៕
ចែករំលែកព័តមាននេះ