កូរ៉េខាងត្បូង៖ អ្នកជំងឺចំនួន ៥១ នាក់នៅប្រទេសកូរ៉េខាងត្បូងដែលទទួលបានការព្យាបាលជាសះស្បើយពីវីរុសកូវីដ១៩ និងឲ្យចាកចេញពីមន្ទីរពេទ្យហើយនោះ ស្រាប់តែត្រូវបានតេស្តិ៍រកឃើញថាកើត ឬលាប់ជំងឺនេះឡើងវិញ ។ នេះយោងតាមការចុះផ្សាយរបស់សារព័ត៌មាន Bloomberg ចុះថ្ងៃទី៩ ខែមេសាឆ្នាំ២០២០ ។
ក្រុមគ្រូពេទ្យនៃមជ្ឈមណ្ឌលប្រយុទ្ធនឹងជំងឺឆ្លងរបស់កូរ៉េខាងត្បូង (CDC) បាននិយាយថាវីរុសកូវីដ ១៩ អាចលាប់ ឬធ្វើសកម្មភាពឡើងវិញ និងធ្វើឲ្យអ្នកដែលព្យាបាលជាសះស្បើយរួចហើយនោះ ធ្លាក់ខ្លួនឈឺម្តងទៀតបាន ។
លោក Jeong Eun-kyeong អគ្គនាយកនៃ CDC កូរ៉េបាននិយាយថាកាលពីថ្ងៃច័ន្ទនេះថា អ្នកជំងឺចំនួន ៥១នាក់ដែលទទួលបានការព្យាបាលជាសះស្បើយពីកូវីដ១៩ នៅប្រទេសកូរ៉េខាងត្បូង ស្រាប់តែតេស្តិ៍ឃើញមានផ្ទុកវីរុសកូវីដ ១៩ ឡើងវិញ ដែលធ្វើឲ្យក្រុមគ្រូពេទ្យត្រូវបន្តតាមដាមលម្អិតនិងស្រាវជ្រាវបន្ថែមទៀតថា មូលហេតុអ្វីបានជាអ្នកជំងឺដែលត្រូវបានធ្វើតេស្តិ៍ឃើញលទ្ធផលអវិជ្ជមានកូវីដ ១៩ ក្រោយទទួលបានការព្យាបាលហើយស្រាប់តែរកឃើញថាមានវិជ្ជមានវីរុសឆ្លងនេះអញ្ចឹង ។
លោក Jeong Eun-kyeong បាននិយាយថា «ខណៈពេលដែលយើងកំពុងការតាមដាន បន្ថែមលើសកម្មភាពណាដែលអាចធ្វើទៅបាន ព្រោះយើងកំពុងធ្វើការសិក្សាយ៉ាងទូលំទូលាយលើបញ្ហានេះថាអ្វីបង្កឲ្យវីរុសនេះលាប់ឡើងវិញ ។ តែមានករណីជាច្រើននៅពេលដែលអ្នកជំងឺអំឡុងពេលព្យាបាលនឹងធ្វើតេស្តិ៍អវិជ្ជមាននៅថ្ងៃណាមួយ និងវិជ្ជមានម្តងទៀតនៅថ្ងៃណាមួយផ្សេងទៀត» ។
កូរ៉េខាងត្បូងគឺជាប្រទេសមួយក្នុងចំណោមប្រទេសធំៗដំបូងគេដែលបានរកឃើញការផ្ទុះឡើងនូវមេរោគឆ្លងដ៏ធំមួយនេះ ប៉ុន្តែប្រទេសកូរ៉េហាក់ធ្វើបានល្អក្នុងការគ្រប់គ្រងសភាពការណ៍បានលឿន ដែលបណ្តាលឲ្យមានអ្នកស្លាប់តែ ២០០ នាក់និងករណីថ្មីដែលបានធ្លាក់ចុះចាប់តាំងពីការឡើងដល់ ១.១៨៩ កាលពីថ្ងៃទី ២៩ ខែកុម្ភៈ។
ដោយសារតែវិធីសាស្ត្រជំរុញបច្ចេកវិទ្យាក្នុងការតាមដានការឆ្លងមេរោគ ប្រទេសកូរ៉េ ហាក់មានភាពឆាប់រហ័សក្នុងការគ្រប់គ្រងការរីករាលដាលរបស់ខ្លួនដោយពុំបានបិទប្រទេស ឬ បិទទ្វារអាជីវកម្មឡើយ។ ការភ័យខ្លាចនៃការលាប់ឡើងវិញចំពោះអ្នកជំងឺដែលបានព្យាបាលជាសះស្បើយកន្លងមក ក៏កំពុងកើនឡើងផងដែរនៅក្នុងប្រទេសចិន ៕
ចែករំលែកព័តមាននេះ