រាជធានីភ្នំពេញ ៖ កញ្ញានូ ទឹមស្រីនៀត បេក្ខនារីតំណាងប្រទេសកម្ពុជា ដែលចូលរួមប្រកួតប្រជែងក្នុងព្រឹត្តិការណ៍ Miss Grand International ឆ្នាំ២០១៤ បានទទួលពានរង្វាន់ «បវរកញ្ញាប្រជាប្រិយ» ។ តាមរយៈការបោះឆ្នោតលើប្រព័ន្ធអេឡិចត្រូនិក កញ្ញានូ ទឹមស្រីនៀត ទទួលបានសំឡេង២៧,១៩ភាគរយ គិតត្រឹមថ្ងៃប្រកួតផ្តាច់ព្រ័ត្រ ទី៧ ខែតុលា ឆ្នាំ២០១៤ ខណៈដែលបេក្ខនារី ហ្វ៊ីលីពីន លំដាប់ថ្នាក់លេខ២ មានសំឡេងគាំទ្រត្រឹមតែ៨,៦១ភាគរយប៉ុណ្ណោះ ។ ការបោះឆ្នោតនេះធ្វើឡើងតាមរយៈគេហទំព័រ www.missgrandinternational.com សម្រាប់មហាជនទូទាំងពិភពលោក ។
កញ្ញានូ ទឹមស្រីនៀត មានអាយុ១៩ឆ្នាំ កម្ពស់១,៧៥ម៉ែត្រ រស់នៅក្នុងស្រុកកៀនស្វាយ ខេត្តកណ្តាល ។ ស្រីនៀត ទទួលបានចំណាត់ថ្នាក់លេខ១ ក្នុងការប្រកួតប្រជែងកម្មវិធី «Khmer Super Model» នៅកម្ពុជា រៀបចំដោយក្រុមហ៊ុន BKA Entertainment កាលពីពេល ថ្មីៗកន្លងមកនេះ ។ សម្រាប់ព្រឹត្តិការណ៍ Miss Grand International ឆ្នាំ២០១៤ ជ័យលាភីចំណាត់ថ្នាក់លេខ១បានទៅនាង Daryanne Lees និស្សិតបញ្ចប់ថ្នាក់បរិញ្ញាបត្រផ្នែករដ្ឋបាលអាជីវកម្ម អាយុ២៧ឆ្នាំ និងមានកម្ពស់១,៧១ម៉ែត្រ ជាបេក្ខនារីមកពីប្រទេសគុយបា ។ ម្ចាស់មកុដបវរកញ្ញាដ៏ស្រស់ស្អាតរូបនេះទទួលបានប្រាក់រង្វាន់៤ម៉ឺនដុល្លារ មានសិទ្ធិស្នាក់នៅក្នុងប្រទេសថៃ១ឆ្នាំ និងធ្វើដំណើរទៅជាង១០ប្រទេសលើពិភពលោក ដើម្បីផ្សព្វផ្សាយពីយុទ្ធនាការ «បញ្ចប់សង្គ្រាម» ដែលជាគោលបំណងរបស់ព្រឹត្តិការណ៍បវរកញ្ញា Miss Grand International ឆ្នាំ២០១៤ ។ចំណាត់ថ្នាក់លេខ២ បានទៅនាង Hiwot Mamo បេក្ខនារីមកពីប្រទេសអេត្យូពី ។
ចំណាត់ថ្នាក់លេខ៣ បានទៅនាង Kanthryn Kohut បេក្ខនារីមកពីប្រទេសកាណាដា ។ ព្រឹត្តិការណ៍ប្រកួតបវរកញ្ញានេះធ្វើឡើងនៅពហុកីឡដ្ឋាន Indoor Stadium Huamark ទីក្រុងបាងកក ប្រទេសថៃ នាថ្ងៃទី៧ ខែតុលា ឆ្នាំ២០១៤ ។ ក្រៅពីជ័យលាភីទាំង៣នាក់នោះ មានជ័យលាភីផ្នែកផ្សេងទៀត គឺជ័យលាភីផ្នែក «ប្រជាប្រិយ» បានទៅកញ្ញានូ ទឹមស្រីនៀត បេក្ខនារីកម្ពុជា ។ ជ័យលាភី «ប្រព័ន្ធផ្សព្វផ្សាយសង្គមឆ្នើម» បានទៅនាង Mieko Takeuchi បេក្ខនារីពីប្រទេសជប៉ុន ។
ជ័យលាភី Best Evening Gown បានទៅនាង Margenie Winarti បេក្ខនារីមកពីប្រទេសឥណ្ឌូណេស៊ី ។ ជ័យលាភីស្លៀកឈុតប៊ីគីនីស្អាត បានទៅនាង Parapadsorn Disdamrong បេក្ខនារីប្រទេសថៃ ។ជ័យលាភីស្លៀកពាក់សម្លៀកបំពាក់ប្រពៃណីស្អាត បានទៅនាង Cao Thuy Linh បេក្ខនារីពីប្រទេសវៀតណាម ។Miss Grand International រៀបចំឡើងជារៀងរាល់ឆ្នាំ តែសម្រាប់កម្ពុជាទើបតែមានបេក្ខនារីចូលរួមប្រកួតលើកទីមួយក្នុងឆ្នាំ២០១៤នេះ៕
ចែករំលែកព័តមាននេះ