អង្គការសុខភាពពិភពលោក ៖ អគ្គនាយកអង្គការសុខភាពពិភពលោកWHO លោកTEDROS ADHANOM GHEYBRESUS ក្នុងសន្និសីទសារព័ត៌មានមួយវាយតមៃ្លកាលពីថ្ងៃទី៦ មេសាថា ការនាំគ្នាពាក់ម៉ាសរបស់មនុស្សគ្រប់គ្នា អាចនាំឲ្យមានភាពធ្ងន់ធ្ងរដល់ការខ្វះខាតម៉ាសសម្រាប់បណ្ដាបុគ្គលិកសុខាភិបាល និងនាំឲ្យមានការប្រឈមមុខដោយផ្ទាល់ ចំពោះការឆ្លងវីរុសCOVID-19 ។
លោកបន្តថា ម៉ាសតែឯងមិនអាចបញ្ឈប់ការឆ្លងបានឡើយ។ បណ្ដាប្រទេសត្រូវតែបន្តធ្វើការស្រាវជ្រាវ ដាក់បណ្តាអ្នកឆ្លង និងអ្នកសង្ស័យឲ្យនៅដាច់ពីគេ ព្យាបាលគ្រប់អ្នកឆ្លងព្រមទាំងតាមរកអ្នកប៉ះពាល់អ្នកឆ្លងគ្រប់រូប។
នាយកWHOបន្តម្យ៉ាងទៀតថា ការប្រគំតន្ត្រីមួយតាមទូរទស្សន៍ ផ្ដួចផ្ដើមគំនិតដោយតារាចម្រៀងអាមេរិកនាងឡេឌីហ្គាហ្គា ដើម្បីប្រមូលមូលនិធិសម្រាប់ជួយទ្រទ្រង់ ដល់ការតស៊ូប្រឆាំងវីរុសនឹងចាក់ផ្សាយនាថ្ងៃទី១៨មេសា ។ តារាចម្រៀងឯទៀត២ក៏ប្រកាសពីការចូលរួមក្នុងការប្រគំតន្ត្រីនោះដែរ។
ការផ្គត់ផ្គង់ម៉ាសការពារមានភាពតានតឹង ព្រោះសេចក្ដីត្រូវការម៉ាសខ្លាំងបំផុត ខណៈវីរុសនោះកំពុងតែឆ្លងរាលដាលកាន់តែខ្លាំង លើពិភពលោក។ បែបនេះនាំឲ្យមានសង្គ្រាមដណ្ដើមម៉ាសគ្នាមិនត្រាប្រណី។ ប៉ុន្តែបែបនោះក៏អាចជាឱកាសនាំឲ្យគេបែរមកប្រើប្រាស់ប្រព័ន្ធនៃការផ្លាស់ប្ដូរពិភពលោក ដើម្បីឲ្យមានកិច្ចសហប្រតិបត្តិការរវាងបណ្ដាប្រជាជាតិ ធ្វើការបែងចែកដោយសមស្របបណ្ដាឧបករណ៍ការពារ។ ប៉ុន្តែនៅលើទីផ្សារបណ្ដាតួអង្គមានការប្រកួតប្រជែងគ្នាខ្លាំងបំផុត ក្នុងការទិញដូរម៉ាសដែលគេហៅថាសង្គ្រាមម៉ាស។ ប្រឈមមុខនឹងសេចក្ដីត្រូវការកាន់តែខ្លាំង បណ្ដាឧបករណ៍ការពារ ការផ្គត់ផ្គង់ងាកដោយរហ័សធ្វើបែបណាក៏ដោយឲ្យតែបាន។
ទោះបីយ៉ាងណាអ្វីៗមិនខ្មៅងងឹតគ្រប់យ៉ាងទេ។ នៅក្នុងស្រុកបណ្ដាបណ្ដាញសាមគ្គីភាពត្រូវបានបង្កើតឡើង ពិសេសក្នុងបណ្ដាសហគមន៍ចិនលើពិភពលោក។ ពេលចាប់ផ្ដើមមានការឆ្លងវីរុស ជនជាតិអាមេរិកដើមកំណើតចិន បានរៀបចំបញ្ជូនទៅចិនបណ្ដាឧបករណ៍ចាំបាច់។ នៅអាមេរិកក៏ទោះបីលោកដូណាល់ត្រាំនៅតែមានះហៅវីរុសនោះថាវីរុសចិន ហើយមានការរើសអើងពូជសាសន៍ តែបណ្ដាញទាំងនោះ បានបង្កើតច្រកនៃការផ្ដល់ជំនួយបណ្ដាឧបករណ៍ការពារ សម្រាប់បុគ្គលិកព្យាបាលអាមេរិក។
អង្គការប្រហាក់ប្រហែលគ្នានេះក៏មាននៅបារាំង ដោយនាដំណាច់ខែមីនាបានប្រមែប្រមូលពាណិជ្ជករចិន ដើម្បីអាចបញ្ជូនម៉ាស១សែនពីក្រុងសៀងហៃ ផ្ដល់ឲ្យតំបន់ILES-DE FRANCEបារាំងដែលរងការប៉ះពាល់ខ្លាំងដោយវីរុស។
ក្នុងកម្រិតរដ្ឋគេក៏បានបង្កើតច្រកការទូតខាងម៉ាសមួយ។ ឧទាហរណ៍ជប៉ុននិងបុរីវ៉ាទីកង់ បានបញ្ជូនម៉ាសជាច្រើនមកកាន់វូហាន ពេលចាប់ផ្ដើមការឆ្លងខ្លាំងនៅទីនោះ។ តបស្នងវិញចិនបានបញ្ជូនបណ្ដាឧបករណ៍ការពារមកកាន់អឺរ៉ុប។ ចិនក៏បញ្ជូនក្រុមគ្រូពេទ្យនិងជំនួយ ទៅកាន់អ៊ីតាលីព្រមទាំងទៅអ៊ីរ៉ង់ និងអ៊ីរ៉ាក់៕ ដកស្រង់ចេញពីវេបសាយ ៖ yahoo (កែសម្រួលដោយ ៖ បុប្ផា)
ចែករំលែកព័តមាននេះ