ខេត្តរតនគិរី ៖ បើតាមសេចក្តីរាយការណ៍បឋមបានឱ្យដឹងថា នារីម្នាក់បានដើររើសផ្លែសំរងនៅក្នុងព្រៃជ្រៅ ស្រាប់តែជួបគ្រោះដ៏ចៃដន្យ ដោយត្រូវដើមឈើដួលរលំសង្កត់ពីលើ បណ្តាលឱ្យបាត់បង់ជីវិតភ្លាមៗនៅនឹងកន្លែងកើតហេតុតែម្តង ។ ហេតុការណ៍នេះបានកើតឡើងកាលពីម៉ោង១និង៣៥នាទីរសៀល ថ្ងៃទី៣ ខែមេសា ឆ្នាំ២០២០ នៅក្នុងព្រៃជ្រៅ ស្ថិតនៅភូមិទុន ឃុំតាវែងក្រោម ស្រុកតាវែង។
បើតាមប្រភពពីមន្ត្រីនគរបាលស្រុកតាវែ ងបានឱ្យដឹងថា ជនរងគ្រោះខាងលើឈ្មោះ សា ណារី ភេទស្រី អាយុ២២ឆ្នាំ ជនជាតិគ្រឹង រស់នៅភូមិ-ឃុំកើតហេតុខាងលើ។
ប្រភពដដែលបន្តថា មុនពេលកើតហេតុ នារីរងគ្រោះ និងមិត្តភក្តិដទៃទៀតបាននាំគ្នាដើររើសផ្លែសំរង តែជាអកុសលក៏ត្រូវដើមឈើដួលរលំមកចំ ហើយសង្កត់ពីលើនារីរងគ្រោះបណ្តាលឱ្យបាត់បង់ជីវិតភ្លាមៗតែម្តង ។ ក្រោយមកក៏ត្រូវបានបងប្អូនដឹកយកមកលំនៅដ្ឋានឱ្យបងប្អូនសាច់ញាតិ និងសមត្ថកិច្ចត្រួតពិនិត្យធ្វើកោសល្យវិច្ច័យ។
ប្រភពដដែលបន្តទៀតថា បន្ទាប់មកសមត្ថកិច្ចមូលដ្ឋានបានចុះមកដល់លំនៅដ្ឋានជនរងគ្រោះ ហើយបានធ្វើពិនិត្យលើសាកសពនារីរងគ្រោះរួចរាល់ហើយឃើញថា នារីរងគ្រោះពិតជាបានបាត់បង់ជីវិតដោយសារតែដើមឈើរលំសង្កត់ពីលើពិតប្រាកដមែន មិនមែនជារឿងឃាតកម្មអ្វីនោះទេ។
ក្រោយពីបានពិនិត្យរួចរាល់ហើយនោះ សមត្ថកិច្ចបានធ្វើកំណត់ហេតុ រួចប្រគល់សាកសពនារីរងគ្រោះទៅឱ្យសាច់ញាតិ ដើម្បីយកទៅធ្វើបុណ្យតាមប្រពៃណីផងដែរ៕ (កែសម្រួលដោយ ៖ បុប្ផា)
ចែករំលែកព័តមាននេះ