ខេត្តស្វាយរៀង ៖ បើតាមសេចក្តីរាយការណ៍បឋមបានឱ្យដឹងថា អណ្តាតភ្លើងបានឆាបឆេះជញ្ជ្រាំងស្រូវ ហើយរាលដាលឆេះដល់ដើមប្រេងខ្យល់អស់ជិត១០ហិកតា ថែមទាំងរាលដាលទៅជិតផ្ទះអ្នកស្រុកទៀតដោយមិនដឹងមូលហេតុនៃការឆាបឆេះនេះទេ ធ្វើឲ្យប្រជាពលរដ្ឋមានការព្រួយបារម្ភយ៉ាងខ្លាំង ខ្លាចរាលដាលឆេះដល់ផ្ទះសម្បែងរបស់ពួកគាត់ ក៏ប៉ុន្តែសមត្ថកិច្ចបានយករថយន្តពន្លត់អគ្គិភ័យចំនួន៥គ្រឿងមកជួយអន្តរាគមន៍ជួយពន្លត់បានទាន់ពេលវេលា ។
បើតាមសមត្ថកិច្ចបានឲ្យដឹងថា ករណីអគ្គីភ័យឆាបឆេះជញ្ជ្រាំងស្រូវ និងចំការប្រេងខ្យល់ខាងលើនេះ បានកើតឡើងកាលពីម៉ោង១និង៤៥នាទីរសៀល ថ្ងៃទី០៥ ខែមេសា ឆ្នាំ២០២០ នៅចំណុចភូមិជ្រៃធំ សង្កាត់ព្រៃអង្គុញ ក្រុងបាវិត ហើយអគ្គិភ័យនេះឆាបឆេះអស់ចំការប្រេងខ្យល់ជាង៩ហិកតា តែត្រូវសមត្ថកិច្ចជួយពន្លត់ទាន់។
សមត្ថកិច្ចបន្តថា ប៉ុន្តែស្រាប់តែនៅម៉ោង១១និង៤៥នាទីព្រឹក ថ្ងៃទី៦ ខែមេសានេះ ក៏មានភ្លើងឆេះជញ្ជ្រាំងស្រូវម្តងទៀតអស់ចំនួន៤៥ហិកតា និងដើមប្រេងខ្យល់មួយចំនួននៅភូមិទួលត្របែក ឃុំប្រសូតិ ស្រុកស្វាយទាប ហើយថែមទាំងបានរាលដាលទៅជិតដល់ផ្ទះប្រជាពលរដ្ឋ ធ្វើឲ្យប្រជាពលរដ្ឋមានការព្រួយបារម្ភណ៍យ៉ាងខ្លាំង និងនាំគ្នាជួយពន្លត់ ដើម្បីការពារផ្ទះរៀងៗខ្លួន។
ប្រភពដដែលបន្តទៀតថា ក្រោយពីទទួលដំណឹងថាមានភ្លើងឆេះភ្លាម កម្លាំងមូលដ្ឋានកងរាជអាវុធហត្ថក្រុងបាវិត សហការជាមួយកម្លាំងមូលដ្ឋានកងរាជអាវុធហត្ថខេត្ត និងកម្លាំងស្រុកទាំង៣ទៀត ព្រមកម្លាំងនគរបាលក្រុងបាវិត បានយករថយន្តពន្លត់អគ្គិភ័យចំនួន០៥គ្រឿង មកជួយបាញ់ពន្លត់នៅចំការដើមប្រេងខ្យល់អស់ទឹកចំនួន៩រថយន្ត ទើបគ្រប់គ្រងស្ថានការណ៍បានទាន់ពេលវេលា ដោយមិនបណ្ដាលឱ្យមនុស្សរងគ្រោះថ្នាក់ និងឆេះដល់ផ្ទះអ្នកភូមិនោះទេ។
ប្រភពដដែលបន្តទៀតថា ក្នុងខណៈនោះក៏មានវត្តមានលោកលឹម សៀងហេង អភិបាលក្រុងបាវិត និងលោកមេបញ្ជាការមូលដ្ឋានកងរាជអាវុធហត្ថក្រុងបាវិត មកជួយពន្លត់អគ្គិភ័យនេះ រហូតគ្រប់គ្រងស្ថានការទាន់ពេលដែរ។
គួរបញ្ជាក់ថា កាលពីនៅម៉ោង១១និង២៥នាទីព្រឹកថ្ងៃទី៦ ខែមេសានោះ គឺមានភ្លើងអគ្គិភ័យឆេះជញ្ជ្រាំងស្រូវទ្រង់ទ្រាយធំ បង្កឲ្យមានការភ័យខ្លាច ហើយការឆាបឆេះនេះ បានឆេះជញ្ជ្រាំងស្រូវអស់ចំនួន៤៥ហិកតា និងដើមប្រេងខ្យល់អស់មួយចំនួននៅភូមិទួលត្របែក ឃុំប្រសូតិ ស្រុកស្វាយទាប លុះរហូតដល់ម៉ោង១និង២៥នាទីរសៀល ទើបសមត្ថកិច្ចអាចគ្រប់គ្រង និងពន្លត់បានដោយជោគជ័យ ។
ប្រភពព័ត៌មានបានបន្តទៀតថា ការឆាបឆេះជាបន្តបន្ទាប់នៅកន្លែងផ្សេងគ្នានេះ សមត្ថកិច្ចមិនទាន់ដឹងពីមូលហេតុច្បាស់លាស់ ដែលបណ្ដាលឱ្យមានភ្លើងឆាបឆេះនេះនៅឡើយទេ ហើយសមត្ថកិច្ចកំពុងធ្វើការស្រាវជ្រាវ ដោយសង្ស័យថា មានមនុស្សលួចដុត ទើបភ្លើងឆាបឆេះមានលក្ខណៈទ្រង់ទ្រាយធំបែបនេះ៕ (កែសម្រួលដោយ ៖ បុប្ផា)
ចែករំលែកព័តមាននេះ