រាជធានីភ្នំពេញ ៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោកបានអំពាវនាវទប់ស្កាត់គ្រោះថ្នាក់ចរាចរណ៍ផ្លូវគោក១១ចំណុច ក្នុងឱកាសបុណ្យចូលឆ្នាំប្រពៃណីជាតិខ្មែរខាងមុខនេះ ។
យោងតាមសេចក្តីអំពាវនាវស្តីពីការបង្ការ ទប់ស្កាត់គ្រោះថ្នាក់ចរាចរណ៍ផ្លូវគោកក្នុងឱកាសពិធីបុណ្យចូលឆ្នាំប្រពៃណីជាតិនឹងចូលមកដល់នៅថ្ងៃទី១៣ ដល់១៦ ខែមេសា ឆ្នាំ២០២០ ខាងមុខនេះ សម្តេចក្រឡាហោម ស ខេង បានលើកឡើងថា គណៈកម្មាធិការជាតិ សុវត្ថិភាពចរាចរណ៍ផ្លូវគោករ សូមថ្លែងនូវការកោតសរសើរប្រកបដោយក្តីមោទនភាពជាទីបំផុតចំពោះអ្នកប្រើប្រាស់ផ្លូវដ៏ច្រើនលើសលប់ដែលមានឆន្ទះក្នុងការចូលរួមគោរព និងអនុវត្តច្បាប់ចរាចរណ៍ផ្លូវយ៉ាងផុលផុសក្នុងពេលធ្វើចរាចរណ៍ដែលរួចចំណែកការកាត់បន្ថយ ការបាត់បង់ជីវិតរងរបួស និងការខូចខាតទ្រព្យសម្បត្តិ ដោយគ្រោះថ្នាក់ចរាចរណ៍ផ្លូវគោកនាពេលកន្លងទៅ ។
សម្តេចបន្តថា ប៉ុន្តែគ្រោះថ្នាក់ចរាចរណ៍ផ្លូវគោកនៅតែជាបញ្ហាប្រឈមចំពោះមុខ និងយូរអង្វែងដែលអាចកើតឡើងភ្លាមៗ ក្នុងករណីអ្នកប្រើប្រាស់ផ្លូវមានការធ្វេសប្រហែស ឬខ្ជីខ្ជាមិន គោរច្បាប់ ។ ក្នុងឱកាសដែលទូទាំងប្រទេសកំពុងតែរួមគ្នាប្រយុទ្ធប្រឆាំងនឹងជំងឺកូវីដ១៩ ស្របពេលដែលយើងនឹងប្រារព្ធពិធីបុណ្យចូលឆ្នាំថ្មី ប្រពៃណីជាតិ ដែលនឹងប្រព្រឹត្តិទៅចាប់ពី ថ្ងៃទី១៣ ដល់ថ្ងៃទី១៦ខែមេសា ឆ្នាំ២០២០ខាងមុខនេះ គណៈកម្មាធិការជាតិសុវត្ថិភាពចរាចរណ៍ផ្លូវគ្នា សូមអំពាវនាវដល់សាធារណជនជាអ្នកប្រើប្រាស់ផ្លូវទាំងអស់បន្ថែមលើការអនុវត្តគ្រប់វិធានការការពារជំងឺកូវីដ១៩ សូមមេត្តាខិតខំយកចិត្តទុកដាក់ ដើម្បីបង្ការ និងទប់ស្កាត់គ្រោះថ្នាក់ចរាចរណ៍ផ្លូវគោកតាមវិធានការដូចជា
១. ត្រូវពាក់មួយសុវត្ថិភាពជានិច្ច ក្នុងពេលធ្វើដំណើរតាមទោចក្រយានយន្តទោះជិត ឬឆ្ងាយ គ្រប់ពេលវេលា ។ ២.មិនត្រូវបើកបរលើសល្បឿនកំណត់ជាដាច់ខាត ។ ៣.មិនត្រូវបើកបរក្រោមឥទ្ធិពលនៃគ្រឿងស្រវឹងជាដាច់ខាត ។ ៤.ត្រូវគោរពសិទ្ធិអាទិភាព គោរពសញ្ញាចរាចរណ៍ និងប្រកាន់ស្តាំជានិច្ច ។ ៥.ត្រូវពាក់ខ្សែក្រវ៉ាតសុវត្ថិភាពជានិច្ច ក្នុងពេលធ្វើដំណើរតាមរថយន្ត ។ ៦.មិនត្រូវបត់ ឬវ៉ាជែងក្នុងភាពប្រថុយប្រថាន ឬប្រើទូរស័ព្ទដោយគ្មានឧបករណ៍សំឡេងភ្ជាប់ទំនាក់ទំនង ។ ៧.ត្រូវត្រួតពិនិត្យលក្ខណៈបច្ចេកយានយន្តជាប្រចាំ ពិសេសត្រូតពិនិត្យកង់ ចង្កូត ហ្វ្រាំង ភ្លើងបំភ្លឺ ។ល។ ៨.សូមកុំផ្ទុកអ្នកដំណើរ ឬកម្មករលើដំបូល និងសូមមេត្តាកុំដំឡើងថ្លៃធ្វើដំណើរក្នុងឱកាសនេះ ។
៩. មិនត្រូវបើកបរក្នុងស្ថានភាពងងុយដេកជាដាច់ខាត ។ ១០. ត្រូវបើកបរក្នុងស្មារតីប្រុងប្រយ័ត្នជានិច្ច ប្រកបដោយសីលធម៌យោគយល់អាធ្យាស្រ័យ ។ ១១. សូមបងប្អូនប្រជាពលរដ្ឋអ្នកប្រើប្រាស់ផ្លូវទាំងអស់ មេត្តាយោគយល់ចំពោះការប្រកាន់យកវិធានការច្បាប់ដ៏តឹងរឹងចំពោះបទល្មើសចរាចរណ៍ផ្លូវគោក ។ ដើម្បីចៀងវាងពីការប្រឈមចំពោះផ្លូវច្បាប់ សូមបងប្អូនគោរពអនុវត្តច្បាប់ស្តីពីចរាចរណ៍ ឲ្យបានខ្ពាប់ខ្ជូន ដើម្បីការពារអាយុជីវិតខ្លួនផ្ទាល់ ដើម្បីភាពសុខដុមរម្យនាក្នុងសង្គមគ្រួសារ ដើម្បីការពារទ្រព្យសម្បត្តិរបស់បងប្អូន និងដើម្បីរួមគ្នាលើកកម្ពស់កិត្តិយស សេចក្តីថ្លៃថ្នូរបស់ប្រទេសជាតិយើង ៕
ចែករំលែកព័តមាននេះ