រាជធានីភ្នំពេញ ៖ ចាត់ទុកជាដំណឹងល្អប្រសើរឡើងមួយកម្រិតទៀតសម្រាប់កម្ពុជា បន្ទាប់ពីករណីវិជ្ជមានកូវីដ១៩ ថ្មីគឺរកឃើញមានត្រឹមតែមួយករណី ខណៈការព្យាបាលជាសះស្បើយមានចំនួន ៥ ករណីផ្សេងទៀត ដែលនាំឲ្យការព្យាបាលជាសះស្បើយទូទាំងប្រទេសកើនឡើងដល់ ៥៨ នាក់ ។ ដែលក្នុងចំណោមអ្នកជាសះស្បើយចំនួន៥រូបដែលជាជនជាតិខ្មែរ គឺមានបុរសវ័យជនជាតិខ្មែរវ័យ ៣០ ឆ្នាំ ជាអ្នកបម្រើការងារនៅស្តាធីវី ច្រកប៉ោយប៉ែត បានជាសះស្បើយនិងត្រូវបានអនុញ្ញាត្តឲ្យចេញពីមន្ទីរពេទ្យរួចហើយ បន្ទាប់ពីតេស្តអវិជ្ជមានចំនួន ២ ដង។
យោងតាមប្រកាសព័ត៌មានរបស់ក្រសួងសុខាភិបាលចុះថ្ងៃទី ៧ ខែមេសា ឆ្នាំ២០២០ បានបញ្ជាក់ឲ្យដឹងថាករណីវិជ្ជមានថ្មីគឺកើតមានលើ នារីទេសចរជនជាតិវៀតណាម អាយុ២៧ ឆ្នាំនិងត្រូវបានដាក់ឲ្យសម្រាកព្យាបាលនៅមន្ទីរពេទ្យខ្មែរ-សូវៀត ។
ក្រសួងសុខាភិបាលបានបញ្ជាក់ថា «ស្ត្រីរូបនេះ បានចេញពីបាវិតទៅវៀតណាម នៅថ្ងៃទី២ ខែមីនា ឆ្នាំ ២០២០ ហើយត្រឡប់មកកម្ពុជាវិញនៅថ្ងៃទី ១០ ខែមីនា ឆ្នាំ២០២០។ គាត់មានមិត្តប្រុសជាជនជាតិចិន ដែលបានចាកចេញពីកម្ពុជានៅថ្ងៃទី ០៣ ខែមេសា ឆ្នាំ២០២០» ៕
ចែករំលែកព័តមាននេះ