រាជធានីភ្នំពេញ ៖ សួនច្បារទីលានប្រជាធិបតេយ្យដែលសាលារាជធានីភ្នំពេញ ស្ថាបនាឡើងតាំងពីខែកក្កដា មកនោះ ពេលនេះស្ថាបនារួចរាល់ទាំងស្រុង១០០% ហើយដែលសាលារាជធានីភ្នំពេញ នឹងគ្រោងធ្វើពិធីសម្ពោធដាក់ឱ្យប្រើប្រាស់ជាផ្លូវការក្នុងអំឡុងថ្ងៃទី៣ ឬទី៤ វិចិ្ឆកា នេះតទៅ។ ការស្ថាបនាសួនប្រជាធិបតេយ្យដាក់ឱ្យប្រើប្រាស់មានន័យថា អាជ្ញាធររាជធានីភ្នំពេញ មានបំណងបញ្ចប់ការតវ៉ាផ្សេងៗរបស់ប្រជាពលរដ្ឋ ជាពិសេសគណបក្សជំទាស់នៅតាមទីសាធារណៈផ្សេងៗ ដែលតំរូវឱ្យមានការកំណត់ទីតាំងមួយច្បាស់លាស់ គឺនៅទីលានប្រជាធិបតេយ្យនេះតែម្តង។ ទីលានសួនប្រជាធិបតេយ្យ មានទីតាំងស្ថិតនៅខាងលិចសួនច្បារបង្កាន់ដៃស្ពាននាគខាងកើត មជ្ឈមណ្ឌលពាណិជ្ជកម្មកាណាឌីយ៉ា ស្ថិតក្នុងសង្កាត់វត្តភ្នំ ខណ្ឌដូនពេញ ឬខាងត្បូងស្ថានទូតសហរដ្ខអាមេរិក ប្រចាំនៅទីក្រុងភ្នំពេញ។
លោកសំ សាមុត ប្រធានសួនច្បារ និងជាបុគ្គលិកនៃមន្ទីរសាធារណការរាជធានីភ្នំពេញ បានឱ្យដឹងថា ទីលានប្រជាធិបតេយ្យនេះចាប់ផ្តើមស្ថាបនាកាលពីដើមខែកក្កដា ឆ្នាំ២០១០ នឹងត្រូវបញ្ចប់ក្នុងខែតុលា នេះ មានរយៈពេល៣ខែ ទើបរួចរាល់ជាស្ថាពរ។ ដោយមានរៀបការ៉ូឡាលើខឿនព័ទ្ធជុំវិញទីលានប្រជាធិបតេយ្យ។ ទីលាននេះមានទំហំផ្ទៃដីជាង១ហិកតា ដោយមានទទឹងប្រវែង៥៧ម៉ែត្រ បណ្តោយ២១០ម៉ែត្រ ហើយមានដាំស្មៅចែកសួនតូចៗពីរ និងរៀបការ៉ូឡាផ្ទៃឱ្យធំទូលាយងាយស្រួលឈរ ឬអង្គុយ ហើយមានការស្ថាបនាបង្គន់អនាម័យធំមួយមានចំនួន១០បន្ទប់ ដែលពេលនេះត្រូវបានស្ថាបនា រួចរាល់ទាំងស្រុងហើយ។
មន្ត្រីសាលារាជធានីភ្នំពេញ បានឱ្យកោះសន្តិភាពដឹងថា នេះជាលើកទី១ហើយ ដែលព្រះរាជាណាចក្រកម្ពុជា ដែលជាប្រទេសកាន់លទ្ធិប្រជាធិបតេយ្យសេរីពហុបក្សរយៈពេលតែ១៧ឆ្នាំប៉ុណ្ណោះ បានឈានដល់ការកសាងទីលានប្រជាធិបតេយ្យមួយត្រឹមត្រូវឱ្យប្រជាជន និងបក្សនយោបាយនានារាប់ទាំងបក្សប្រឆាំងផង សំរាប់ការបញ្ចេញមតិត្រឹមត្រូវងាយស្រួលក្នុងការការពារសន្តិសុខ សុវត្ថិភាព និងសណ្តាប់ធ្នាប់ជូនពួកគាត់ ដែលការសាងសង់នេះ គឺជាឆន្ទៈដ៏ល្អ និងគិតគូរសុខទុក្ខរបស់ប្រជាជន និងអ្នកនយោបាយពិតប្រាកដរបស់រាជរដ្ឋាភិបាលដែលមានសម្តេចតេជោ ហ៊ុន សែន ជាប្រមុខបានគិតគូរហើយ ដែលកាលពី៦០ឆ្នាំមុនពុំធ្លាប់មានទីលានបែបនេះទេ។
លោកលី សាវ៉េត នាយករដ្ឋបាលសាលារាជធានីភ្នំពេញ បានឱ្យកោះសន្តិភាពដឹងនៅព្រឹកថ្ងៃទី២៤ តុលា នេះថា សាលារាជធានីភ្នំពេញ មានគំរោងធ្វើពិធីសម្ពោធជាផ្លូវការនៅអំឡុងថ្ងៃទី៣ ឬទី៤ វិចិ្ឆកា ឆ្នាំ២០១០ ដើម្បីដាក់ឱ្យប្រើប្រាស់ជាផ្លូវ។ ឯកម្មវិធីសម្ពោធច្បាស់លាស់រង់ចាំការសំរេចរបស់លោកកែប ជុតិមា អភិបាលរាជធានីភ្នំពេញ នៅពេលក្រោយ។
មានន័យថា សួនទីលាននេះក្រោយថ្ងៃ សម្ពោធជាផ្លូវការហើយ គឺអាជ្ញាធរត្រូវតែបញ្ចប់រាល់ការតវ៉ា ឬទាមទារផ្សេងៗនៅតាមទីសាធារណៈ ឱ្យទៅលើសួនទីលាននេះចាប់ពីពេលនេះតទៅ។ ទីលានលើសួនច្បារនេះ មានបរិយាកាសល្អនៅចំណុចកណ្តាល រាជធានីភ្នំពេញ ដែលទីតាំងនេះប្រជុំទៅដោយទីតាំងរដ្ឋាភិបាលធំៗមាន ទីស្តីការគណៈរដ្ឋមន្ត្រី ទីស្តីការនាយករដ្ឋមន្ត្រី ទីស្តីការសាលារាជធានីភ្នំពេញ ក្រសួងសាធារណការ ក្រសួងសេដ្ឋកិច្ច និងហិរញ្ញវត្ថុ ស្ថានទូតអាមេរិក អូស្រ្តាលី និងស្ថានទូតបារាំង ម្យ៉ាងនៅតំបន់នោះក៏មានផ្សារធំៗ និងមន្ទីរពេទ្យកាល់ម៉ែតជាដើម៕
ចែករំលែកព័តមាននេះ