រាជធានីភ្នំពេញ៖ ការឆ្លងរាលដាលជាសកលនៃជំងឺកូវីដ១៩បានធ្វើឱ្យមានចលា
ចលលដល់ជីវិតរស់នៅនិងអាជីវកម្មគ្រប់ប្រភេទ រួមទាំងវិស័យកាត់ដេរសម្លៀកបំពាក់និងស្បែកជើងនៅកម្ពុជា ហេតុដូច្នេះហើយសមាគមរោងចក្រកាត់ដេរនៅកម្ពុជា ហៅថាGMAC បានអំពាវនាវជាថ្មីម្តងទៀតដល់អ្នកបញ្ជាទិញទាំងអស់ដែលទិញពីកម្ពុជាមេត្តាធ្វើការជាមួយយើងដើម្បីយើងទាំងអស់គ្នាអាចដោះស្រាយបញ្ហាទាំងនេះបាន។ នេះបើយោងតាមសមាគមរោងចក្រកាត់ដេរនៅកម្ពុជាហៅថា GMACកាលពីថ្ងៃទី ២ ខែមេសា ឆ្នាំ ២០២០ ។
បើតាមលិខិតចំហររបស់ GMAC បានគូសបញ្ជាក់ថា «ភាគីទាំងអស់នៅក្នុងចង្វាក់ផ្គត់ផ្គង់សម្លៀកបំពាក់សកលកំពុងទទួលរងបន្ទុកដ៏ធ្ងន់ក្រៃលែងដែលបង្កឡើងដោយជំងឺកូវីដ១៩។ ទោះយ៉ាងណាក្តីក្រុមហ៊ុន ឬរោងចក្រប្រតិបត្តិការលើប្រាក់ចំណូលតិចតួច ហើយមានសមត្ថភាពតិចតួចខ្លាំងណាស់ក្នុងការរែកបន្ទុកបែបនេះ បើធៀបនឹងអតិថិជនរបស់យើង (អ្នកបញ្ជាទិញ) ។ បន្ទុកដោយផ្ទាល់ដែលប្រឈមមុខដោយកម្មកររបស់យើងដែលនៅតែត្រូវការទទួលទានអាហារនិងដោះស្រាយតម្រូវការគ្រួសារគឺជាបន្ទុកដ៏ធំក្រៃលែង» ។
ដូចនេះសមាគមសូម «ជំរុញអ្នកបញ្ជាទិញមេត្តាគោរពតាមលក្ខខណ្ឌនៃកិច្ចសន្យាទិញរបស់ខ្លួន ហើយបំពេញកាតព្វកិច្ចរបស់ខ្លួនដោយទទួលយកការដឹកទំនិញ ហើយទូទាត់ប្រាក់សម្រាប់ទំនិញដែលបានផលិតរួចហើយ និងទិញដែលបច្ចុប្បន្នកំពុងផលិត។នេះនឹងធ្វើឱ្យយើងបន្តផ្តល់ការងារដល់កម្មករ៧៥ម៉ឺននាក់ របស់យើងនិងធ្វើឱ្យយើងមានសមត្ថភាពបើកប្រាក់ឈ្នួលជូនកម្មករនិងធានាដល់ជីវភាពរបស់ប្រជាពលរដ្ឋកម្ពុជារាប់លាននាក់»។
លោក ខេន លូ អគ្គលេខាធិការរបស់ GMAC ក៏បានចេញវីដេអូខ្លីអំពាវនាដល់ភាគីពាក់ព័ន្ធត្រូវជួយគ្នាក្នុងគ្រាលំបាកនេះ ព្រោះកម្មករ-កម្មការិនីរោងចក្រកាត់ដេរជាអ្នកងាយរងគ្រោះបំផុត ។លោក ខេន លូ បានមានប្រសាសន៍ «ស្ថិតក្នុងបរិការណ៍ដ៏តានតឹងបែបនេះ នៅក្នុងខ្សែសង្វាក់ផលិតកម្មវាយនភ័ណ្ឌកាត់ដេរពិភពលោក គឺមានភាពចាំបាច់កាន់តែខ្លាំងសម្រាប់អ្នកពាក់ព័ន្ធទាំងអស់ ដើម្បីរួមគ្នា និងជួយគ្នាទៅវិញទៅមក និងដើម្បីធានាថាកម្មករ និយោជិក អាជីវកម្ម និងឧស្សាហកម្មរបស់យើង អាចបន្តរស់រានមានជីវិតមិនថាមានព្យុះភ្លៀងយ៉ាងណាក៏ដោយ» ។ លោកបានបន្តថាគ្រប់គ្នាបាននិយាយជាច្រើនឆ្នាំមកហើយអំពីការទទួលខុសត្រូវសង្គមរបស់ក្រុមហ៊ុន (CSR) ដូច្នេះពេលនេះជាពេលវេលាដែលគ្រប់ភាគីត្រូវអនុវត្តដើម្បីជួយដល់កម្មករ-កម្មការិនីរោងចក្រកាត់ដេររបស់យើង ។អគ្គលេខាធិការបានបន្តថា «ឥឡូវនេះ វាដល់ពេលដែលយើងត្រូវអនុវត្តន៍និងបំពេញកាតព្វកិច្ចចំពោះគ្នាទៅវិញទៅមក ហើយអ្វីដែលសំខាន់បំផុតនោះ គឺកម្មកររបស់យើង ដែលពួកគេពិតជាងាយរងគ្រោះបំផុត » ។
ពាក់ព័ន្ធបញ្ហាខាងលើនេះបើតាមប្រធានសហជីពក្នុងស្រុកមួយមើលឃើញថា បើទោះបីខាងសមាគមរោងចក្រកាត់ដេរនៅកម្ពុជាចេញលិខិតបើកចំហរជូនចំពោះអ្នកបញ្ជាទិញទាំងអស់ដែលទិញពីកម្ពុជាខែមេសាឆ្នាំ២០២០ចំពោះការបើកប្រាក់ខែជូនកម្មករនៅគ្រាបន្ទាប់នេះមិនមានអ្វីជាបញ្ហានោះទេ។
លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជាបានឲ្យដឹងថា «ខ្ញុំគិតថាវាដូចជាមិនមានបញ្ហាអ្វីនោះទេចំពោះការបើកប្រាក់ខែដល់កម្មករ ដោយ
សារកម្មកររបស់យើងបានធ្វើការឱ្យខាងក្រុមហ៊ុនហើយ ហើយកន្លងមកខាងក្រុមហ៊ុនបានត្រៀមបើកប្រាក់ខែដល់កម្មករផងដែរ អីចឹងខ្ញុំគិតវាមិនជាបញ្ហាអ្វីនោះទេ»។ លោកបានបន្តថា ថ្មីៗនេះបើទោះជាអ្នកបញ្ជាទិញបានផ្ញើលិខិតមកខាងក្រុមហ៊ុនផ្គត់ផ្គង់ថាមិនបន្តទិញ ហើយការទិញនៅពេលកន្លងមកត្រូវផ្អាកសិនក៏មិនទាន់មានបញ្ហាទៅដល់ដំណើរការផលិតកម្មរបស់ក្រុមហ៊ុននោះទេ គឺនៅមានដំណើរការនៅឡើយ។
លោកបានលើកឡើងថា «នៅសប្តាហ៍មុននេះគឺខាងអ្នកបញ្ជាទិញបានផ្ញើលិខិតមកជាបន្តបន្ទាប់ថា ឥវ៉ាន់ត្រូវកម្ម៉ង់នៅខែ៣ ខែ៤ ឬខែ៥ អត់បញ្ជាទិញទៀតទេហើយចំពោះ
ឥវ៉ាន់ដែលកម្ម៉ង់រួចហើយក៏អត់យកដែរហើយចំពោះលុយមានក្នុងកិច្ចសន្យាក៏អត់ផ្តល់
ឱ្យដែរ ។ បើធ្វើដូច្នោះក្រុមហ៊ុននឹងដាច់ខ្យល់ ឬមានលំបាកតែម្តង អីចឹងហើយបានជាខាងសមាគមរោងកច្រកាត់ដេរនៅកម្ពុជាផ្ញើលិខិតទៅអ្នកបញ្ជាទិញចង់បញ្ជាក់ប្រាប់ថា ចំពោះកិច្ចសន្យាបានឯកភាពគ្នាហើយគួរផ្តល់ឱ្យគេ ចំពោះបញ្ហាខាងមុខទៀតគេមិនខ្វល់ ព្រោះជារឿងមួយទៅខាងមុខទៀត ហើយបើសិនបញ្ហាវាធំអាចថានៅមួយខែ ឬពីរខែក្រោយនឹងមានបញ្ហា ។ ប៉ុន្តែឥលូវនេះវាមិនទាន់ធ្ងន់ធ្ងរនោះទេ ខ្ញុំគិតថាក្នុងខែនេះនិយោជកមិនមានបញ្ហាបើកប្រាក់ខែជូនកម្មករនោះទេ»។
លោកបន្តថា បញ្ហាកូវីដ១៩នេះ អ្នកបញ្ជាទិញមិនគួររំលោភលើកិច្ចសន្យាទេ បញ្ហាដែលកើតឡើងមិនមែនមានបញ្ហាតែសម្រាប់អ្នកបញ្ជាទិញនោះទេ សូម្បីតែអ្នកផ្គត់ផ្គង់
ឥវ៉ាន់ឱ្យក៏ជួបបញ្ហា ហើយកម្មករក៏មានបញ្ហាដែរ គឺបញ្ហាទាំងអស់គ្នាមិនមែនបញ្ហាតែខ្លួនឯងនោះទេ ដោយយកលេសនេះហើយគេចពីការទទួលខុសត្រូវវាមិនសមហេតុសមផលសោះសម្រាប់អ្នកបញ្ជាទិញ៕
ចែករំលែកព័តមាននេះ