ខេត្តសៀមរាប៖ កាលពីរសៀលថ្ងៃទី០៥ មេសា ឆ្នាំ២០២០ ក្រុមគណៈកម្មការចម្រុះនៃអាជ្ញាធរជាតិអប្សរា ក្រោមការដឹកនាំរបស់លោកអគ្គនាយករង ទទួលបន្ទុកគ្រប់លើការងារសំណង់ក្នុងតំបន់អង្គរ បានដឹកនាំគ្រឿងចក្រចុះធ្វើការជីកគាស់កកាយគ្រឹះសំណង់អគារកុដ្ឋិ នៅក្នុងទីវត្តព្រះអង្គខ្មៅ ដែលបានសាងសង់ខុសទៅនឹងច្បាប់អនុញ្ញាតរបស់អាជ្ញាធរជាតិអប្សរា…
ខេត្តសៀមរាប៖ កាលពីរសៀលថ្ងៃទី០៥ មេសា ឆ្នាំ២០២០ ក្រុមគណៈកម្មការចម្រុះនៃអាជ្ញាធរជាតិអប្សរា ក្រោមការដឹកនាំរបស់លោកអគ្គនាយករង ទទួលបន្ទុកគ្រប់លើការងារសំណង់ក្នុងតំបន់អង្គរ បានដឹកនាំគ្រឿងចក្រចុះធ្វើការជីកគាស់កកាយគ្រឹះសំណង់អគារកុដ្ឋិ នៅក្នុងទីវត្តព្រះអង្គខ្មៅ ដែលបានសាងសង់ខុសទៅនឹងច្បាប់អនុញ្ញាតរបស់អាជ្ញាធរជាតិអប្សរា ។
តាមការបញ្ជាក់ពីលោកឡុង កុលស អ្នកនាំពាក្យនៃអាជ្ញាធរជាតិអប្សរាបានឲ្យដឹងថា លោកចៅអធិការវត្ត បានធ្វើការកសាងទីវត្ត ដោយបានសាងសង់កុដ្ឋិថ្មី ហើយព្រះអង្គក៏បានដាក់ពាក្យសុំច្បាប់សាងសង់កុដ្ឋិទៅអាជ្ញាធរជាតិអប្សរា ។ ដើម្បីបំពេញនូវតម្រូវការរបស់វត្ត អាជ្ញាធរជាតិអប្សរា ក៏បានអនុញ្ញាតច្បាប់ថ្វាយប្រគេនឲ្យធ្វើការសាងសង់ទៅ តាមសំណើរបស់វត្តផងដែរ។
លោកបន្តទៀតថា ក្នុងនោះ អាជ្ញាធរជាតិអប្សរាបានអនុញ្ញាតទៅតាមទំហំមួយដែល លោកបានដាក់សំណើមក តែនៅពេលដែលលោកចាប់ផ្តើមធ្វើគ្រឹះក្រោមនៃអគារនោះ មានទំហំធំជាងច្បាប់អនុញ្ញាត ឲ្យ ដោយអាជ្ញាធរជាតិអប្សរា បានអនុញ្ញាតឲ្យធ្វើតែកម្ពស់១ជាន់ផ្ទាល់ដី តែត្រូវលោកបានធ្វើគ្រឹះតម្រូវទៅកម្ពស់២ជាន់ទៅវិញ ។
ម្យ៉ាងទៀត ដោយទីវត្តនេះ ស្ថិតនៅចំតំបន់បេតិកភណ្ឌ ចំកណ្តាលបេះដូងនៃតំបន់អង្គរ ហើយអាជ្ញាធរ ជាតិអប្សរា មិនអាចអនុញ្ញាតលោកធ្វើទៅតាមព្រះទ័យរបស់លោកឡើយ ។ កត្តានេះ ទើបគណៈកម្មការគម្ពបាល ដែលមានព្រះមហាវិមលធម្ម ពិន សែម សិរីសុវណ្ណោ ព្រះរាជាគណៈថ្នាក់ទោ ឧត្តមទីប្រឹក្សាគណៈសង្ឃនាយក សមាជិកថេរៈសភាសង្ឃ ជាប្រធានកិត្តិយស បានបើកកិច្ចប្រជុំគណៈកម្មការវត្តអារាម បានធ្វើការសម្រេសជា ឯកច្ឆន័ ឲ្យព្រះគ្រូ ចៅ អធិការវត្តព្រះអង្គខ្មៅធ្វើការកែសម្រួលសំណង់អគារនេះឲ្យបានត្រឹមត្រូវទៅតាមច្បាប់ដែលអាជ្ញាធរជាតិអប្សរាបានអនុញ្ញាត ។
ដូច្នេះហើយ ទើបអាជ្ញាធរជាតិអប្សរាបានដាក់គ្រឿងចាក់ធ្វើការជីកកកាយគ្រឹះ ដើម្បីធ្វើការរៀបចំសាងសង់ឡើងវិញ ឲ្យត្រឹមត្រូវតាមគម្រោងបប្លង់ដែលអាជ្ញាធរជាតិអប្សរាបានអនុញ្ញាតតែប៉ុណ្ណោះ។
ចែករំលែកព័តមាននេះ