រាជធានីភ្នំពេញ ៖ ពិតជាដំណឹងល្អសម្រាប់កម្ពុជា នៅថ្ងៃទី០៥ ខែមេសា គ្មានអ្នកឆ្លងជំងឺកូវីដ១៩នោះទេ ផ្ទុយទៅវិញថែមបានព្យាបាលជាសះស្បើយ៣នាក់ ដែលចំនួនអ្នកជាសះស្បើយកើនដល់៥៣នាក់ ។ នេះបើតាមក្រសួងសុខាភិបាល ។
យោងតាមសេចក្តីប្រកាសព័ត៌មានរបស់ក្រសួងសុខាភិបាលចេញផ្សាយនៅថ្ងៃទី៦ ខែមេសាឆ្នាំ២០២០ បានឲ្យដឹងថា ក្រុមគ្រូពេទ្យបានព្យាបាលអ្នកឆ្លងជំងឺកូវីដ១៩ ជាសះស្បើយបាន៣នាក់ និងគ្មានករណីវិជ្ជមានកូវីដ១៩ថ្មីនោះទេ នៅថ្ងៃទី៥ ខែមេសា ។
ក្រសួងបានឲ្យដឹងថា ត្រឹមម៉ោង៧ព្រឹកថ្ងៃទី៦ ខែមេសា ស្ថានភាពជំងឺកូវីដ១៩ នៅកម្ពុជាមានអ្នកព្យាបាលសះស្បើយសរុបកើនដល់៥៣នាក់ ស្មើនឹង៤៦,៤៩% ធៀបនឹងចំនួនអ្នកមានវីរុសកូវីដ១៩ ទាំអស់ដែលមានបុរសជនជាតិចិន១នាក់ ស្ត្រីជនជាតិអង់គ្លេស២នាក់ បុរសជនជាតិអង់គ្លេស១នាក់ បុរសជនជាតិប៊ែលហ្សិក១នាក់ បុរសជនជាតិបារាំង៨នាក់ (ក្នុងនេះមានទារកអាយុ៤ខែ) ស្ត្រីជនជាតិបារាំង៩នាក់ បុរសជនជាតិម៉ាឡេស៊ី៧នាក់ បុរសជនជាតិខ្មែរ២៣នាក់ និងស្ត្រីជនជាតិខ្មែរ១នាក់ (គិតចាប់ពីខែមករាដល់បច្ចុប្បន្ន) ។ ក្រសួងក៏បានបញ្ជាក់ថា ៖«អ្នកដែលកំពុងសម្រាកព្យាបាលបានថយចុះ មកនៅសរុបចំនួន៦១នាក់ ស្ត្រី២០នាក់ និងបុរស៤១នាក់ នៅតាមមន្ទីពេទ្យរដ្ឋនៅថ្នាក់ជាតិ និងថ្នាក់ខេត្ត ។ អ្នកមានវីរុសកូវីដ១៩ ដែលបានរកឃើញទាំងអស់ រាប់អ្នកដែលបានព្យាបាលសះស្បើយ និងអ្នកដែលកំពុងព្យាបាល នៅទូទាំងប្រទេសសរុបចំនួន១១៤នាក់ ស្រី៣២នាក់ និងបុរស៨២នាក់ ដែលចំនួននេះ មិនមានកើនទេ» ។
ក្រសួងបានបន្តថា ករណីជាសះស្បើយ៣នាក់ មានបុរសជនជាតិម៉ាឡេស៊ី៣នាក់ អាយុ៣៩ឆ្នាំ អាចយុ២៦ឆ្នាំ និងអាយុ៤០ឆ្នាំមកធ្វើកាសាសនានៅស្រុកកងមាស ខេត្តកំពងចាម បានព្យាបាលសះស្បើយ ដោយទទួលបានលទ្ធផលតេស្តអវិជ្ជមានវីរុសកូវីដ១៩ ចំនួន២លើក ត្រូវបានអនុញ្ញាតឲ្យចេញពីមន្ទីពេទ្យខេត្តកំពង់ចាម ។ ទោះបីមានលទ្ធផលវិជ្ជមាននូវការព្យាបាលសះជាបណ្តើរក្តីក្រសួងបានអះអាងក្រុមការងាររបស់ក្រសួងសុខាភិបាល បានកំពុងតែធ្វើកិច្ចការស្រាវជ្រាវករណីថ្មីជាបន្តទៀត ហើយនឹងបន្តជម្រាបជូនដល់សាធារណជន ប្រសិនបើមានរកឃើញវិជ្ជមានវីរុសកូ វីដ១៩ថ្មីណាផ្សេងទៀត ៕
ចែករំលែកព័តមាននេះ